ព្រះរាជាលើកលែងទោសឲ្យ សួន សេរីរដ្ឋា តាមការស្នើរបស់ ហ៊ុន សែន
- ដោយ: កេសរ កូល អត្ថបទ៖ កេសរកូល ([email protected]) - ភ្នំពេញ ថ្ងៃទី១០ កក្កដា ២០១៥
- កែប្រែចុងក្រោយ: July 10, 2015
- ប្រធានបទ: នយោបាយ
- អត្ថបទ: មានបញ្ហា?
- មតិ-យោបល់
-
លោក សួន សេរីរដ្ឋា ពលរដ្ឋខ្មែរអាមេរិក និងជាមេដឹកនាំ ចលនានយោបាយ «អំណាចពលរដ្ឋខ្មែរ» ដែលត្រូវបានតុលាការ សម្រេចផ្តន្ទាទោស កាលពីឆ្នាំ២០១៥នោះ ទើបនឹងត្រូវបាន សម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជា ព្រះរាជទានលើកលែងទោស ក្នុងថ្ងៃនេះ តាមសេចក្តីក្រាបបង្គំទូលថ្វាយ របស់លោកនាយករដ្ឋមន្ត្រី ហ៊ុន សែន។
ព្រះរាជក្រឹត្យរបស់ព្រះមហាក្សត្រកម្ពុជា ធ្វើនៅព្រះបរមរាជវាំង នៅថ្ងៃទី១០ ខែកក្កដា ឆ្នាំ២០១៥ និងចុះហត្ថលេខាវាយត្រា ដោយលោក សយ សុខា អគ្គលេខាធិការរាជរដ្ឋាភិបាល ក្នុងថ្ងៃដដែលនេះ បានត្រាស់បង្គាប់ថា ត្រូវលើកលែងទោស អោយទណ្ឌិតឈ្មោះ សួន សេរីរដ្ឋា ភេទប្រុស អាយុ៤៣ឆ្នាំ ដែលត្រូវបានតុលាការ សម្រេចផ្តន្ទាទោស ដាក់ពន្ឋនាគារ តាមអំណាចសាលដីកា ស្ថាពរលេខ៣១ប្រ.អ.ប ចុះថ្ងៃទី២៥ ខែឧសភា ឆ្នាំ២០១៥ របស់សាលាឧទ្ឋរណ៏។ ព្រះរាជក្រឹត្យនេះ បានបង្គាប់ឲ្យលោក ហ៊ុន សែន នាយករដ្ឋមន្ត្រីកម្ពុជា ត្រូវទទួលបន្ចុក អនុវត្តអោយបានសម្រេច និងត្រូវចូលជាធរមាន ចាប់ពីថ្ងៃឡាយព្រះហស្ថលេខាតទៅ។
ស្រង់សំដីដោយវិទ្យុអាស៊ីសេរី មន្ត្រីនាំពាក្យ ទីស្ដីការគណៈរដ្ឋមន្ត្រី លោក ផៃ ស៊ីផាន បានបញ្ជាក់ថា ការលើកលែងទោសនេះ ទំនងជាលោក ហ៊ុន សែន មិនចង់ឲ្យមាន ភាពមិនចុះសម្រុងគ្នា រវាងអ្នកនយោបាយខ្មែរ គ្នាឯង។ លោក ស៊ីផាន បានថ្លែងថា៖ «លោកចង់ឃើញថា អ្នកនយោបាយកុំឈ្លោះគ្នា នាំគ្នាមកបង្កើតគណបក្សនយោបាយទៅ ហើយយើងប្រជែង ទាញយកប្រជាប្រិយពីពលរដ្ឋ គឺប្រជាពលរដ្ឋទេ អ្នកជ្រើសរើសនរណា ឬគណបក្សណា ជាអ្នកកាន់អំណាច»។
ដោយឡែក នៅលើទំព័រហ្វេសប៊ុក របស់លោក សួន សេរីរដ្ឋា បែរជាថ្លែងបង្កា ឲ្យប្រុងប្រយ័ត្ន ពីការលើកលែងទោសនេះ ទៅវិញ។ លោក រដ្ឋា បានសរសេរ នៅលើជញ្ជាំងហ្វេសប៊ុកផ្លូវការ របស់លោកថា៖ «កុំអាលទាន់ត្រេកអរ ជាមួយនឹង ល្បិចបើកទ្វាមច្ចុរាជ របស់សត្រូវឲ្យសោះ។ ទ្វាមួយនេះ មើលទៅលំអរ ដោយផ្កាមាស មេអំបៅមាស ក្លឹនក្រអូបខ្លឹមច័ន្ទគ្រឹះស្នា មានចំហាយត្រជាក់ស្រេប និងអមដោយភ្លេងត្រែ បន្ទរកំដរផង។ តែកុំភ្លេចថា ចំរ៉ូងដែក ផ្សែងពុល និងអាវុធយុទ្ធោបករណ៍ សង្គ្រាមគ្រប់ប្រភេទ គេកំពុងតម្រ៉ង់មកយើង ជាមួយនឹងកែវភ្នែកស្រវឹង គ្មានព្រំដែន និងកំហឹងយ៉ាងក្រពុលមុខរបស់គេ។»
សូមរម្លឹកថា លោក សួន សេរីរដ្ឋា ត្រូវបានតុលាការ សាលាដំបូងរាជធានីភ្នំពេញ សម្រេចផ្តន្ទាទោសកំបាំងមុខ កាលពីខែមករា ឆ្នាំ២០១៥ ដាក់ពន្ធនាគារ ៧ឆ្នាំ ពីបទរួមគំនិតក្បត់ជាតិ អំពើប្រឆាំងប្រជាពលរដ្ឋ ដែលមានសិទ្ធិបោះឆ្នោត មិនឲ្យទៅបោះឆ្នោត ការរំខាន មិនឲ្យដំណើរការបោះឆ្នោតបាន និងញុះញង់ឲ្យប្រព្រឹត្តបទឧក្រិដ្ឋជាអាទិ៍។ រដ្ឋាភិបាលកម្ពុជា ក៏ធ្លាប់បានចោទប្រកាន់លោក សួន សេរីរដ្ឋា ថាជាមេដឹកនាំចលនាខុសច្បាប់ ដែលមានឈ្មោះថា ចលនាអំណាចពលរដ្ឋខ្មែរ ក្នុងបំណងផ្តួលរំលំ រដ្ឋាភិបាលកម្ពុជា៕
» ព្រះរាជក្រិត្យលើកលែងទោស៖
