ទាំង​មន្ត្រី​អង្គការ​សង្គម​ស៊ីវិល លោក អំ សំអាត និង​អតីត​ព្រះសង្ឃ​កម្ពុជា​ក្រោម សឺន ហាយ ដែល​រង​ការ​ចោទ​ប្រកាន់ សុទ្ធ​តែ​បាន​លើក​ឡើង​ព្រម​គ្នា​ថា មូលហេតុ​ដែល​ព្រះ​សង្ឃ​កម្ពុជា​ក្រោម​ទាំង​បី​អង្គ ត្រូវ​បាន​ចាប់​ខ្លួន និង​ធ្វើ​ការ​ចោទ​ប្រកាន់​នេះ ទំនង​មាន​អ្នក​នៅ​ពី​ក្រោយ​ខ្នង ទាក់ទង​ករណី​​បាន​ដុត​ទង់​ជាតិ​វៀតណាម ក្នុង​អំឡុង​ពេល​មាន​ការ​តវ៉ា​ទាមទារ​ឱ្យ​វៀតណាម សុំ​ទោស​រឿង​ទឹកដី​កម្ពុជា​ក្រោម ទើប​មាន​ការ​រៀបចំ​ឱ្យ​មាន​ការ​ចាប់​ខ្លួន​តាម​រយៈ​បទ​ល្មើស​ផ្សេងៗ​នេះ។

ការលើក​ឡើង​របស់​មន្ត្រី​និង​ព្រះសង្ឃ​ខាង​លើ បាន​ធ្វើ​ឡើង បន្ទាប់​ពី​សាលា​ឧទ្ធរណ៍ នៅ​ព្រឹក​ថ្ងៃ​សុក្រ​ទី០៩ ខែ​មករា​នេះ បាន​សម្រេច​បន្ត​ឃុំ​​ខ្លួន អតីត​ព្រះ​សង្ឃ​ខ្មែរ​កម្ពុជា​ក្រោម​បី​អង្គ​ព្រះ​នាម ឃិត វណ្ណៈ សាន កុសល និង សឺន ហាយ ពាក់​ព័ន្ធ​ពី​បទ​ចូល​រួម​សមាគម​ជន​ទុច្ចរិត ប្រឆាំង​រាជការ​សាធារណៈ និង​បទ​ក្លែង​បន្លំ​ឆាយយ៉ា។

សេចក្ដីសម្រេចនេះ ត្រូវបានលោកអំ សំអាត មន្រ្តីជាន់ខ្ពស់មកអង្គការការពារសិទ្ធិមនុស្សលីកាដូ អះអាងថា ដោយសារតែព្រះសង្ឃទាំងបីអង្គ ធ្លាប់ធ្វើការតវ៉ាយ៉ាងផុសផុល នៅមុខស្ថានទូតវៀតណាម រឿងទឹកដី​កម្ពុជា​ក្រោម ដែលមានការដុតទង់ជិតវៀតណាមជាដើម ប្រឆាំងនឹងអ្នកនាំពាក្យស្ថានទូតវៀតណាម ដែល​និយាយ​អះអាងថាទឹកដីកម្ពុជាក្រោម ជារបស់ដូនតាវៀតណាម។

លោក អំ សំអាត បានថ្លែងឡើងថា៖ «អាហ្នឹងហើយ ដោយសារតែព្រះសង្ឃធ្វើការតវ៉ា នៅមុខស្ថានទូត​វៀតណាម​ម្តងហើយម្តងទៀត ហើយមានការដុតទង់ជាតិនេះហើយ ជាការកត់សម្គាល់មួយ ព្រោះបើសិនជា​ចាប់ពួកគាត់នៅមុខស្ថានទូតវៀតណាមហ្នឹងតែម្តង គឺវាមិនត្រូវហើយមានការរិះគន់ពីប្រជាពលរដ្ឋ អញ្ចឹង​ហើយបានជាគេរកបទល្មើសផ្សេងៗ ក្នុងការចាប់ព្រះសង្ឃទាំងអស់នេះ។ អញ្ចឹងការដែលចាប់ព្រះសង្ឃ​ទាំង​បីអង្គនេះ គឺមិនមែនចាប់បទល្មើសដោយសារតែគេចោទហ្នឹងទេ ការចាប់គឺបណ្តាលមកពីការតវ៉ា និងការដុត​ទង់ជាតិនៅមុខស្ថានទូតវៀតណាមតែប៉ុណ្ណោះ។»

ប្រធានផ្នែកបច្ចេកទេសនៃអង្គការលីកាដូរូបនេះ បានពន្យល់ទៀតថា៖ «ព្រះអង្គ សឺន ហាយ នឹងលោក​គ្រាន់​ទៅមុខតុលាការ មិនទាន់ទាំងចុះពីលើម៉ូតូផង ត្រូវបានគេវាយគេចាប់ សួថាបទល្មើសអ្វី វាអត់មានបទ​ល្មើស»។ ចំណែកឯព្រះសង្ឃពីរអង្គទៀត ភិក្ខុ ឃិត វណ្ណៈ និង ថាច់ សាង (សាន កុសល) ដែលត្រូវបានចោទ​ប្រកាន់ពីបទចូលរួមជាមួយសមាគមជនទុច្ចរិត ព្រះអង្គគ្រាន់តែដឹកទង់សានា និងទង់ជាតិ វាគ្មានបទល្មើស​អ្វីនោះទេ ព្រោះថាព្រះសង្ឃអង្គណាក៏ត្រូវតែប្រើទង់សាសនា និងទង់ជាតិដែរ។

ចំណែកអតីតសង្ឃកម្ពុជាក្រោម សឺន ហាយ វិញ ក្នុងសំលៀកបំពាកជាអ្នកទោស បាននិយាយយ៉ាង​ដូច្នេះ​ដែរថា ការចាប់ខ្លូននេះ ដោយសារតែមានអ្នកនៅពីក្រោយខ្នង ជាពិសេសការដាក់សម្ពាធពីប្រទេស​វៀតណាម។ ព្រះសង្ឃដែលត្រូវគេចាប់ផ្សិក ឲ្យក្លាយជនជាប់ចោទអង្គនេះ បានបញ្ជាក់យ៉ាងដូច្នេះថា៖ «តាម​ពិតទៅ អាត្មាមិនមានរឿងអីដែលត្រូវចាប់ខ្លួននោះទេ គឺការចាប់ខ្លួននេះ មានអ្នកនៅពីក្រោយខ្នង​យ៉ាងពិត​ប្រាកដតែម្តង»។

យ៉ាងណាក៏ដោយ ក៏មកទល់នឹងពេលនេះ មិនទាន់មានប្រភពណាផ្សេងបានអះអាង ដូចទៅនឹងការលើក​ឡើងរបស់មន្ត្រីឃ្លាំមើលសិទ្ធិមនុស្ស និងព្រះសង្ឃ សឺន ហាយ នោះទេ។ ហើយលោក អំ សំអាត ក៏មិនបាន​បញ្ជាក់ថា តើនរណាដែលនៅពីក្រោយការចាប់ខ្លួននេះ ឲ្យពិតប្រាកដដែរ។រីឯស្ថាប័នតុលាការវិញ គេពិបាក​នឹងធ្វើការទាក់ទង ដើម្បីធ្វើការបកស្រាយពីការចោទប្រកាន់នានានោះណាស់ ព្រោះមិនដែលលើកទូរស័ព្ទ ដើម្បីឆ្លើយទៅនឹងការសាកសួររបស់អ្នកការសែតឡើយ។

សូមបញ្ជាក់ដែរថា ព្រះអង្គកម្ពុជាក្រោមទាំងបីអង្គ បានធ្វើសកម្មភាពតវ៉ាយ៉ាងសកម្មជាមួយអ្នកមានជម្លោះដីធ្លី និងទាមទារឱ្យវៀតណាមសុំទោស ពីការបំភ្លៃប្រវត្តិសាស្ត្រនៃការបាត់បង់ទឹកដីកម្ពុជាក្រោម។ អតីតព្រះសង្ឃ សឺន ហាយ ជាសង្ឃមូយអង្គដែលចេញមុខជាងគេក្នុងការតវ៉ា និងដុតទង់ជាតិវៀតណាមរឿង​ទឹកដីខ្មែរ​កម្ពុជា​ក្រោម ត្រូវតុលាការចោទពីបទប្រឆាំងរាជការសាធារណៈ និងបទក្លែងបន្លំឆាយយ៉ា។ ចំណែកអតីតព្រះសង្ឃ​ពីរអង្គទៀតត្រូវបានចោទពីបទ ចូលរួមសមាគមជនទុច្ចរិតប្រព្រឹត្តនៅមុខវត្តសាមគ្គីរង្សី ដែលប្រឈមជាប់​ទោសពី ២ ឆ្នាំ ទៅ ៥ឆ្នាំ តាមមាត្រា ៤៩៩នៃក្រមព្រហ្មទណ្ឌ៕