អំ សំអាន៖ តុលាការកំពូលរំលោភរដ្ឋធម្មនុញ្ញ ព្រោះកោះហៅតំណាងរាស្រ្ត
- ដោយ: អ៊ុម វ៉ារី អត្ថបទ៖ អ៊ុម វ៉ា([email protected]) - យកការណ៍៖ ហេង វុទ្ធី ថ្ងៃទី៩ មករា ២០១៥
- កែប្រែចុងក្រោយ: January 09, 2015
- ប្រធានបទ: យុត្តិធម៌
- អត្ថបទ: មានបញ្ហា?
- មតិ-យោបល់
-
មុននឹងកោះហៅអ្នកតំណាងរាស្រ្ត តុលាការត្រូវធ្វើការស្នើសុំទៅរដ្ឋមន្រ្តីក្រសួងយុត្តិធម៌ ឲ្យដាក់សំណើរទៅកាន់រដ្ឋសភា ដើម្បីសុំដកអភ័យឯកសិទ្ធិសភាពីតំណាងរាស្រ្តណាម្នាក់ជាមុនសិន មុននឹងសម្រេចចេញដីកាកោះ។ នេះជាមេរៀនខ្លីៗ ដែលតំណាងរាស្ត្រមណ្ឌលសៀមរាប លោក អំ សំអាន ចង់ផ្ដល់ទៅឲ្យតុលាការកំពូល ដែលជាស្ថាប័នកាត់ក្ដីកំពូលរបស់កម្ពុជា ក្នុងការកោះហៅតំណាងរាស្រ្តនៃរដ្ឋសភាកម្ពុជា ដែលកំពុងស្ថិតក្នុងតួនាទីនៅឡើយ។
ការថ្លែងរបស់លោក អំ សំអាន បានធ្វើឡើងជាមួយទស្សនាវដ្តីមនោរម្យ.អាំងហ្វូ នៅមុខសាលាដំបូងរាជធានីភ្នំពេញ បន្ទាប់ពីអគ្គព្រះរាជអាជ្ញារងនៃតុលាការកំពូលរបស់ប្រទេសកម្ពុជា លោក ឈួន ចាន់ថា កាលពីថ្ងៃទី២៦ ខែធ្នូ ឆ្នាំ២០១៥ បានចេញដីកាកោះមួយ ហៅតំណាងរាស្រ្តប្រាំពីររូប របស់គណបក្សសង្គ្រោះជាតិ ឲ្យចូលខ្លួននៅចំពោះមុខតុលាការ នៅថ្ងៃទី១៩ ខែមករា ឆ្នាំ២០១៥ខាងមុខ។
លោកតំណាងរាស្រ្តរួបនេះ បង្ហាញនូវការហួសចិត្តចំពោះនីតិវិធីសព្វថ្ងៃរបស់តុលាការ ដែលលោកមើលមិនយល់ និងមិនដឹងអនុវត្តនូវច្បាប់ណា ឲ្យប្រាកដប្រជានោះ ព្រោះមិនត្រឹមតែហ៊ានកោះហៅតំណាងរាស្ត្រ ដោយមិនបានឆ្លងកាត់រដ្ឋសភានោះទេ តែថែមទាំងបានកោះហៅតំណាងរាស្រ្តទាំងប្រាំពីររូប របស់គណបក្សសង្គ្រោះជាតិមកសួនាំ មិនទាំងមានចំណាត់ការរបស់តុលាការសាលាដំបូង ឬសាលាឧទ្ទរណ៍នៅឡើយផង ក៏ស្រាប់តែលេចចេញដីកាកោះពីតុលាការកំពូល បាត់ទៅហើយ។
លោក អំ សំអាន បាននិយាយថា៖ «ធម្មតាត្រូវធ្វើការចោទប្រកាន់នៅតុលាការដំបូងសិន ឆ្លងកាត់ឧទ្ធណ៍ បន្ទាប់មកទើបលើតុលាការកំពូល។ នេះមិនទាន់មានការកោះហៅដោយតុលាការដំបូង ឧទ្ធរណ៍ផង ក៏មានការកោះហៅដោយតុលាការកំពូលទៅវិញ។ នេះជាការ(ខ្ញុំ)មិនយល់ ចំពោះនីតិវិធីរបស់តុលាការ។»
អគ្គព្រះរាជអាជ្ញារងនៃតុលាការកំពូល លោក ឈួន ចាន់ថា បានចេញ«ដីការកោះហៅជនជាប់ចោទឲ្យចូលសវនាការ» ទៅលើតំណាងរាស្រ្តចំនួនប្រាំពីរនាក់ រូមមានលោកស្រី មួ សុខហួរ, លោក ហូ វ៉ាន់, លោក កែវ ភារម្យ, លោក រៀល ខេមរិន្ទ្រ, លោក នុត រំដួល, លោក ឡុង រី, លោក ម៉ែន សុថាវរិន្រ្ទ, លោក អឿង ណារិទ្ធិ និងលោក ឃិន រឿន ក្រោមបទចោទប្រកាន់ ដឹកនាំកុប្បកម្ម ញុះញង់ឲ្យប្រព្រឹត្តបទឧក្រិដ្ឋជាអាទិ៍ ផ្តើមគំនិតក្នុងអំពើហិង្សាដោយចេតនា មានស្ថានទំងន់ទោស ដែលស្ថិតនៅចំណុចទីលានប្រជាធិបតេយ្យ កាលពីថ្ងៃទី១៥ ខែកក្កដា ឆ្នាំ២០១៤។
លោក ឃឹម ប៉ុណ្ណ ដែលជាប្រធានអង្គជំនុំជំរះ និងអមដោយចៅក្រមប្រឹក្សាបួនរូបផ្សេងទៀត បានបង្គាប់បញ្ជា ឲ្យអ្នតំណាងរាស្រ្តទាំងប្រាំពីរូបនេះ ចូលសវនាការពាក់ព័ន្ធនឹងដំណោះរឿង ប្រកាន់ ដឹកនាំកុប្បកម្ម ញុះញង់ឲ្យប្រព្រឹត្តបទឧក្រិដ្ឋជាអាទិ៍ ផ្តើមគំនិតក្នុងអំពើហិង្សាដោយចេតនា មានស្ថានទំងន់ទោស ដែលស្ថិតនៅចំណុចទីលានប្រជាធិបតេយ្យ កាលពីថ្ងៃទី១៥ ខែកក្កដា ឆ្នាំ២០១៤។
ទស្សនាវដ្តីមនោរម្យ.អាំងហ្វូមិនអាចសុំការបញ្ជាក់ពីលោក លោក ឃឹម ប៉ុណ្ណ ប្រធានអង្គជំនុំជំរះ ដើម្បីបំភ្លើលើករណីនៃការចេញដីកាកោះហៅ ដោយរំលងនីតិវិធីច្បាប់តាមការចោទប្រកាន់ខាងលើនេះបានឡើយ ព្រោះគ្មានអ្នកទទួលទូរស័ព្ទ។