បន្ទាប់ពីមានការចាប់ខ្លួន ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ អ្នកសម្រប​សម្រួលសម្ព័ន្ធសហគមន៍កសិករកម្ពុជាលោក ថេង សាវឿន សកម្មជនដីធ្លី និងកម្មករទាំង ១០នាក់ កាលពិថ្ងៃទី២ ខែមករា ឆ្នាំ២០១៣ រួចមក ហើយថ្ងៃនេះជាថ្ងៃកាត់ក្តីលើជនជាប់ចោទទាំងនោះ ខណៈនោះដែរមានប្រជាពលរដ្ឋ​និងព្រះសង្ឃប្រមាណ ៣០០នាក់ បានមកធ្វើការតវ៉ានូវមុខតុលាការដើម្បីអោយមានការដោះលែងជនទាំងនោះ។

កងកម្លាំងត្រូវបានបញ្ជូនទៅមុខសាលាដំបូងរាជធានីភ្នំពេញ។ (រូបថត ហ្វេសប៊ុក)

បាតុកម្ម-  ព្រះតេជគុណ លួន សាវ៉ាត ដែលកំពុងស្ថិតនៅក្នុងការតវ៉ាថ្ងៃនេះ នៅមុខតុលការរាជធានី បានអោយ​ទស្សនាវដ្ដី​មនោរម្យព័ងអាំងហ្វូ ដឹងថា «ការមកធ្វើបាតុកម្មនៅថ្ងៃនេះ មិនមកដើម្បីបង្ករហឹង្សា ឬបញ្ហាណាមួយ​ជាមួយអ្នណា​ទេ មកដើម្បីគ្រាន់តែតវ៉ាទាមទារមនុស្ស ដែលត្រូវបានគេវាយដំច្រំធាក់ និងត្រូវបានគេ​ចោទ​ប្រកាន់។»

ព្រះតេជគុណបានអោយដឹងទៀតថា «យើងមិនដឹងថា គេចោទប៉ុន្មានករណីនោះទេ តែអោយតែសកម្មជនដីធ្លី និង​អ្នកកាពារសិទ្ធិមនុស្ស គ្មានអ្វីក្រៅពី ការញុះញង់ ការប្រើហឹង្សា បង្ករអន្តិសុខសណ្តាប់ធ្នាប់សង្គមជាដើម។»

ការកាត់ទោសនេះមិនទាន់បញ្ចប់នៅឡើយទេនោះ តែព្រះតេជគុណនៅបង្ហាញជំហរ​ថា «បើមិនទាន់​ទទួលបាន​យុត្តិធម៌ ជនរងគ្រោះមិនទទួលបានសេរីភាព ការតវ៉ានេះនឹងរីករាលជាទ្រង់ទ្រាយធំ»។

សូមបញ្ជាក់ថា លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក ថេង សាវឿន អ្នកសម្របសម្រួលសម្ព័ន្ធសហគមន៍កសិករកម្ពុជា សកម្មជនដីធ្លី និងកម្មករទាំង ១០នាក់ ត្រូវបានអាជ្ញាធរ​​ចាប់​ខ្លួន​កាលពីថ្ងៃទី២ ខែមករា ឆ្នាំ២០១៤ នៅមុខរោងចក្រយ៉ាកជីង ខណៈពេលមានការបង្ក្រាបមួយពីសំណាក់កងកម្លាំង​អាជ្ញាធរទៅលើក្រុមកម្មករ តែនៅតែមិនពេញចិត្តនឹងការតម្លើងប្រាក់ខែបន្តិចបន្ដួច របស់ក្រសួងការងារ។ ថ្ងៃនេះ អ្នកដែលបានចាប់ខ្លួនទាំងនោះ ត្រូវបញ្ជូនទៅ​កាន់​សាលាដំបូងរាជធានីភ្នំពេញ នៅព្រឹកថ្ងៃសុក្រនេះ ដើម្បី​ធ្វើការ​សាកសួរ និង​ចោទប្រកាន់តាមផ្លូវច្បាប់។

នៅមុខសាលាដំបូងរាជធានីនោះដែរ កងកម្លាំងសមត្ថកិច្ច ដែលមានចំនួនរាប់រយនាក់ ដែលមានប្រដាប់​ដោយ ដំបង កាំភ្លើង ខែល  បានប្រាប់​ដល់អ្នកតវ៉ាទាំងអស់ ឲ្យចេញពីមុខតុលាការ ដើម្បីបើកផ្លូវអោយគេ​ធ្វើដំណើរ ដែល​ពេលនេះ​នៅមិនទាន់ការប្រើ​ហិង្សា​ណាមួយ​ទៅលើក្រុមបាតុករនោះទេ។ តែក្រុមបាតុករ​នៅតែ​មិនព្រមបើកផ្លូវ​ដោយ​សំអាង​ថា គាត់មកទីនេះ​មិនបានបង្ករបញ្ហាណាមួយដល់សង្គមទេ ដោយគ្រាន់តែមកតវ៉ា​អោយមាន​ការ​ដោះលែងអ្នកដែល​គ្មានទោសប៉ុណ្ណោះ។

ដោយឡែងព្រះតេជគុណ ប៊ុត ប៊ុនតិញ ឯណោះវិញ បន្ទាប់ពីត្រូវបានដោះលែង ក្រោយការឃាត់ខ្លួននៅខេត្ត​ព្រះវិហារនោះមក បាន​បង្ហោះវីដេអូមួយនៅលើហ្វេសប៊ុក ដោយព្រះតេជគុណ បានអំពាវនាវ​អោយបងប្អូន​ប្រជា​ពលរដ្ឋខ្មែរទាំងអស់ ជួយ​តវ៉ាដើម្បីអោយមានការដោះលែង អ្នកដែលបានចាប់ខ្លួនទាំងនោះ៕

-------------------------------------------------
ដោយ ៖ ក. ចាន់នីតា - ភ្នំពេញ ថ្ងៃទី០៣ ខែមករា ឆ្នាំ២០១៤
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ