«ពលរដ្ឋ​ជាង២០០​នាក់ ត្រូវ​បាន​ក្រុមហ៊ុន​ពីរ បោក​ក្នុង​ម្នាក់ៗ​៤០០ដុល្លា»

ក្រុមសកម្មជនសិទ្ធិមនុស្ស បានថ្លែងឲ្យដឹងថា ពលរដ្ឋកម្ពុជា ជាង២០០រយនាក់ ត្រូវបានក្រុមហ៊ុន ចំនួនពីរ«ឆបោក» យកប្រាក់ពីពលរដ្ឋ ក្នុងម្នាក់ៗ៤០០ដុល្លារ ជាសោហ៊ុយ នឹងការបញ្ជូនទៅធ្វើការ នៅប្រទេសជប៉ុន។
Loading...
  • ដោយ: អ៊ុម វ៉ារី អត្ថបទ៖ អ៊ុម វ៉ារី ([email protected]) - យកការណ៍៖ ស្រ៊ុន ទិត្យ -ភ្នំពេញថ្ងៃទី៧ ឧសភា ២០១៥
  • កែប្រែចុងក្រោយ: May 08, 2015
  • ប្រធានបទ: ពលករ
  • អត្ថបទ: មានបញ្ហា?
  • មតិ-យោបល់

លោក ធន សារាយ ប្រធានសមាគម ការពារសិទ្ធិមនុស្ស អាដហុក (Adhoc) កាលពីព្រឹកថ្ងៃទី៧ ខែឧសភានេះ បានបង្ហាញ​នូវឈ្មោះ ក្រុមហ៊ុនចំនួនពីរ ដែលមានចេតនា«ឆបោក» លុយប្រជាពលរដ្ឋ ជាង២០០នាក់។ ក្រុមហ៊ុនទីមួយឈ្មោះ ស៊ិនឆឺរី (Century) និងក្រុមហ៊ុនទីពីរឈ្មោះ រ៉ាយនេតឆរ៉ល (Rice Natural)។ ក្រុមហ៊ុនទាំងពីនេះ ត្រូវបានបិទទ្វា និងទម្លាក់ «ស្លាក​យីហោរ» របស់ខ្លួនភ្លាមៗ និងគេចខ្លួនបាត់ស្រមោល បន្ទាប់ពីប្រមូលលុយ របស់ពលរដ្ឋ ដែលមានបំណង​ទៅ​ធ្វើការ នៅប្រទេសជប៉ុន បានគ្រប់ចំនួន។

ដោយសារតែមូលហេតុនេះ ទើបពលរដ្ឋទាំងអស់ បាននាំគ្នាមកកាន់សមាគមអាដហុក និងស្នើឲ្យសមាគមមួយនេះ ជួយ​ជា​វិធានការផ្លូវច្បាប់ ទៅក្រសួងពាក់ព័ន្ធនានា ដើម្បីបានទទួលប្រាក់ ដែលក្រុមហ៊ុនទាំងពីរ បានឆបោកនៅ យកទៅសង​បំណុល ដែលបានខ្ចីគេវិញ និងក៏ស្នើ ឲ្យមានការដាក់ទោសជនល្មើស តាមផ្លូវច្បាប់។

ថ្លែងក្នុងសន្និសីទសារព័ត៌មាន នាទីស្នាក់ការសមាគម អាដហុក អ្នកស្រី កាន់ ស៊ីចាន់ ដែលអះអាងថា ជាជនរងគ្រោះ បាន​លើកឡើងថា ដើមហេតុដែលនាំឲ្យដឹងថា ក្រុមហ៊ុននេះឆបោក ព្រោះក្រោយពីការបិទទ្វាហើយ គ្រប់បុគ្គលិក នៃក្រុមហ៊ុន​ទាំង​អស់ មិនអាចទាក់ទងបានឡើយ ពិសេសតាមទូរស័ព្ទ ត្រូវបានបិទចោលទាំងអស់។ មានទីលំនៅពីខេត្តកំពង់ឆ្នាំង អ្នកស្រី​បានលើកឡើងថា មកទល់នឹងពេលនេះ មានរយៈពេលប្រាំខែ កន្លងទៅហើយ ក្រោយពីក្រុមហ៊ុន បានទទួលយក​លុយ​ពី​អ្នកស្រី។

ពលរដ្ឋម្នាក់ទៀត លោក ជា វុត្ថា ដែលបានអះអាង ជាជនរងគ្រោះដែរនោះ បានលើកឡើងថា ដើម្បីឲ្យក្រុមហ៊ុន​ទាំងពីរ​ខាង​លើ បានធ្វើការផ្សព្វផ្សាយតាមវិទ្យុ ជ្រើសរើសពលករ ទៅធ្វើការនៅប្រទេសជប៉ុន ហើយលោក ក៏បានសម្រេចចិត្ត មកដាក់ពាក្យតែម្តង។ លោកបានបន្តថា ក្រុមហ៊ុនបានអះអាងថា ក្រោយការដាក់ពាក្យ ចាប់ពីបីខែ ទៅប្រាំខែ នឹងមាន​ឈ្មោះ​ធ្លាក់ ទៅប្រទេសជប៉ុន។

លោក ជា វុត្ថា បានអះអាងទៀតថា រយៈពេលជិតមួយឆ្នាំហើយ មកទល់នឹងពេលក្រុមហ៊ុនទាំងពីរ បានបិទទ្វានេះ សម្រាប់​លោក នៅតែគ្មានឈ្មោះ ទៅធ្វើការនៅជប៉ុនដដែល។ លោកបានថ្លែងឲ្យដឹងថា៖ «ក្រុមហ៊ុនចេះតែសន្យាថាថ្ងៃនេះ ថ្ងៃនោះ​ជាប់រហូត និងឲ្យរង់ចាំ។ ភាសាជប៉ុនក៏មិនបានរៀន ថាថ្ងៃនេះរវល់ ថ្ងៃនោះរវល់ដល់ឥឡូវ។ (…) គេយកលុយខ្ញុំ ៤០០ដុល្លា អាមេរិក មិនបានធ្វើអ្វីឲ្យខ្ញុំទាំងអស់។»

អ្នកស្រីមួរ សុខហួរ តំណាងរាស្រ្តមណ្ឌលបាត់ដំបង មកពីគណបក្សសង្ក្រោះជាតិ បានលើកឡើងថា បើមានករណី​បែប​នេះ​កើតឡើង ក្រសួងការងារត្រូវមានវិធានការ និងចាត់ការ ទៅលើក្រុមហ៊ុននោះ ជាបន្ទាន់។ អ្នកស្រីបានចាត់ទុកថា ទង្វើ​របស់​ក្រុមហ៊ុនទីបី ឬភាគីទីបី (ក្រសួងការងារ ជាភាគីទីមួយ ក្រុមហ៊ុនទទួលអាជ្ញាបណ្ណផ្ទាល់ ពីក្រសួងការងារ ជាភាគីទីពីរ និងក្រុមហ៊ុនទទួលបន្ត ពីក្រុមហ៊ុនទីពីរ ជាភាគីទីបី) បាននឹងកំពុង«ឆបោក»ពលកកម្ពុជា តាមរយៈមធ្យោបាយធ្វើការ ឬ​ធ្វើ​កម្មករ នៅក្រៅប្រទេស។ ការនាំពលករចេញ ដោយក្រុមហ៊ុនខុសច្បាប់នេះ អាចចាត់ទុកថា ជាការជួញដូរមនុស្ស ឬជួញ​ដូរ​កម្លាំងពលកម្មជាដើម។

បើយោងតាមតួលេខ របស់ក្រសួងការងារ ក្រុមហ៊ុនដែលបានចុះបញ្ជី មានចំនួន៦០ ដែលមានសិទ្ធិ ក្នុងការនាំពលករ ទៅ​ក្រៅ​ប្រទេស។ ក្រុមហ៊ុនទាំងនោះ អាចនាំពលករ ទៅកាន់ប្រទេសមួយចំនួន ដូចជាប្រទេសថៃ ម៉ាឡេស៊ី សិង្ហបូរី កូរ៉េ​ខាង​ត្បូង និងជប៉ុនជាដើម។

ទស្សនាវដ្តីមនោរម្យ.អាងហ្វូ មិនអាចសុំការបំភ្លឺ ពីអ្នកនាំពាក្យក្រសួងការងារ លោក ហេង សួរ ជុំវិញករណីខាងលើបានទេ ដោយទូរស័ព្ទរបស់លោក មិនអាចភ្ជាប់ទំនាក់ទំនងបាន។ តាមសេចក្តីថ្លែងការណ៍ របស់សមាគមអាដហុក ចេញផ្សាយ​ក្នុង​ថ្ងៃទី៧ ខែឧសភានេះ បានធ្វើការរំលឹកថា កាលបីថ្ងៃទី១០ ខែមេសា ឆ្នាំ២០១៥នេះ រដ្ឋមន្រ្តីក្រសួងការងារ លោក អ៊ិត សំហេង ធ្លាប់បានប្រាប់ ទៅអគ្គនាយកក្រុមហ៊ុន ឲ្យផ្អាកសកម្មភាព ជ្រើសរើសពលករថ្មី រហូតដល់មានដំណោះស្រាយ ជាមួយ​ពលករ មិនឲ្យលើសពី៤៥ថ្ងៃ។

សេចក្តីថ្លែងការណ៍របស់សមាគមអាដហុក បានសរសេរទៀតថា ករណីខាងលើនេះ សមាគមបានស្នើទៅក្រសួងការងារ និងអគ្គស្នងការនគរបាលជាតិ រួចរាល់ហើយ។ ជាមួយនឹងសំណើរនេះ ក៏បានតម្រូវឲ្យក្រសួង ដកប្រាក់ធានា របស់​ក្រុមហ៊ុន ទូទាត់សងមកប្រជាពលរដ្ឋវិញ និងស្នើឲ្យស្វែងរកជនល្មើស មកផ្តន្ទាទោសតាមច្បាប់។

ដោយឡែក អ្នកស្រី មួរ សុខហួរ បានព្រមានទៅក្រសួងការងារថា បើមិនមានវិធានការដោះស្រាយ តាមផ្លូវច្បាប់ ពីក្រសួង​ការងារជូនពលករដែលរងគ្រោះ និងមិនមានចំណាត់ការ តាមផ្លូវច្បាប់ ក្នុងការដាក់ទោស ទៅលើក្រុមហ៊ុនទាំងនោះទេ ក្នុង​នាម​អ្នកស្រីជាតំណាងរបស់រាស្រ្ត នឹងស្នើទៅគណកម្មការទី៨ នៃរដ្ឋសភា ធ្វើការកោះហៅរដ្ឋមន្រ្តីរុបនោះ មកឆ្លើយ​ចំពោះ​មុខ គណកម្មការទីប្រាំបី និងអាចឈានទៅដល់ការ ឆ្លើយចំពោះមុខរដ្ឋសភាទាំងមូល។

អ្នកស្រីបានលើកផ្លូវច្បាប់ មកបញ្ជាក់ថា «មិន»អនុញ្ញាតិឲ្យក្រុមហ៊ុនមួយ ដែលទទួលបានអាជ្ញាប័ណ្ណ ពីក្រសួងការងារ បន្ត​ជួល លក់ ឬប្រគល់ អាជ្ញាប័ណ្ណនេះ ទៅឲ្យក្រុមហ៊ុនណាមួយ ផ្សេងទៀតឡើយ។ ប្រាក់ក្រុមហ៊ុន ដែលមានតំកល់នៅ​ក្រសួង ត្រូវយកមកធ្វើការទូទាត់ជាបន្ទាន់ ដល់ប្រជាពលរដ្ឋរងគ្រោះទាំងអស់។ អ្នកស្រី បានថ្លែងឲ្យដឹងថា៖ «ការឆរ​បោក​នេះ ខាង​ក្រសួង(ការងារ) ជាអ្នកទទួលខុសត្រូវ។ (...) លុយចំនួន១០ម៉ឺនដុល្លា ដែលក្រុមហ៊ុននោះដំកល់ ត្រូវយកមកដោះ​ស្រាយជូនជនរងគ្រោះ... និងចាត់វិធានការ តាមផ្លូវច្បាប់ ចំពោះក្រុមហ៊ុននោះជាដាច់ខាត។»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...