សហព័ន្ធសហជីព និងសមាគមចំនួន៩ គ្រោងនឹងដឹកនាំធ្វើមហាកូដកម្ម សាជាថ្មី ម្តងទៀត នៅទូទាំងប្រទេស នៅ​ក្នុងពេលដ៏ខ្លីខាងមុខនេះ ដើម្បីទាមទារដំឡើងប្រាក់ឈ្នួលគោល១៦០ដុល្លារអាមេរិក និងទាមទារ​ឲ្យមាន​ការដោះ​លែងជនទាំង២៣នាក់ ដែលត្រូវបានកម្លាំងសមត្ថកិច្ចចាប់ខ្លួន នៅក្នុងពេលប៉ះទង្គិចគ្នា កាលពីធ្វើកូដកម្មកន្លងមក។

ក្រុមកម្មករធ្វើបាតុកម្មនៅខាងមុខក្រសួងការងារ លើវិថីសហព័ន្ធរ៉ូស្ស៊ី កាល់ពីថ្ងៃទី៣១ខែធ្នូឆ្នាំ២០១៣។ (រូបថត MONOROOM.info/O.Vary)

វិបត្តិការងារ - ប្រធានសហជីពសេរីកម្មករ លោក ជា មុន្នី បានថ្លែងប្រាប់​ទស្សនាវដ្តីមនោរម្យ.អាំងហ្វូ នៅថ្ងៃទី៤ ខែកុម្ភៈ ឆ្នាំ២០១៤ នេះថា ក្នុងពេលឆាប់ៗនេះ សហជីពរបស់លោក និងសហជីព៨ផ្សេងទៀត​នឹងដឹកនាំ​មហា​កូដកម្មជាថ្មី ទាមទារដំឡើងប្រាក់ឈ្នួលគោល១៦០ដុល្លារអាមេរិក។ លោក ជា មុន្នី បញ្ជាក់ថា៖ «យើងជាសហជីព យើងការពារប្រយោជន៍កម្មករ ឥឡូវកម្មករហូបអត់គ្រាន់ ដូច្នេះយើងត្រូវតែធ្វើ។ យើងត្រូវតែដោះស្រាយ​ប្រាក់​ឈ្នួលឲ្យពួកគាត់»។

ជាមួយគ្នានេះ លោក រ៉ុង ឈុន ប្រធានសហភាពសហជីពកម្ពុជា និងជាប្រធានសមាគមគ្រូបង្រៀនកម្ពុជាឯករាជ្យ ក្នុងសិក្ខាសាលាពិគ្រោះយោបល់របស់សហជីព ស្តីពីការសម្របសម្រួលប្រាក់ឈ្នួលអប្បបរមា នៅថ្ងៃទី ០៤ ខែកុម្ភៈ ឆ្នាំ២០១៤ នេះ បានព្រមានថា បើរដ្ឋាភិបាល និងភាគីនិយោជក នៅតែមិនផ្តល់ដំណោះស្រាយសមរម្យឲ្យ​កម្មករ​ទេនោះ សហព័ន្ធសហជីពទាំង៩ នឹងដាក់លិខិតជូនដំណឹងទៅអាជ្ញាធរពាក់ព័ន្ធ ដើម្បីធ្វើការប្រមូលផ្តុំធ្វើកូដកម្ម​ឡើងវិញ។

គួររម្លឹកថា កាលពីថ្ងៃទី០២ និងទី០៣ ខែមករា ឆ្នាំ២០១៤ នៅរោងចក្រយ៉ាកជីង និងសួនឧស្សាហកម្ម កាណាឌីយ៉ា ផ្លូវវេងស្រេង លើទឹកដីរាជធានីភ្នំពេញសមត្ថកិច្ចគ្រប់គ្រងដោយរដ្ឋាភិបាលគណបក្សប្រជាជនកម្ពុជា ក្រោមហេតុ​ផលរក្សាសន្តិសុខ និងសណ្តាប់ធ្នាប់សាធារណៈ បានធ្វើការបង្រ្កាបយ៉ាងចាស់ដៃលើកម្មករដែលធ្វើកូដកម្ម និង​បដិសធប្រាក់ឈ្នួលគោល១០០ដុល្លារ ដែលសម្រេចដោយភាគីរដ្ឋាភិបាល និងភាគីនិយោជក ខណៈកម្មករចង់​បានប្រាក់ឈ្នួលគោល១៦០ដុល្លារ។ ក្រោយការបង្រ្កាបយ៉ាងហិង្សានោះ ក្រសួងមហាផ្ទៃ និងសាលារាធានីភ្នំពេញ បានដាក់កំហិត មិនអនុញ្ញាតឲ្យមានការជួបជុំ ឬធ្វើកូដកម្មបន្តទៀតទេ រហូតដល់ស្ថានការណ៍មានភាពល្អ​ប្រសើរ​ឡើងវិញ។

ជុំវិញករណីនេះ លោកស្រី យ៉ាង សុភ័ណ ប្រធានសម្ព័ន្ធសហជីពកម្ពុជា ដែលជាសហជីពមួយក្នុងចំណោម​សហជីពទាំង៩នោះ ក៏បានអត្ថាធិប្បាយដែរថា កូដកម្មជាថ្មីនេះ គឺដើម្បីទាមទារដំឡើងប្រាក់ឈ្នួលគោល​១៦០​ដុល្លារ និងទាមទារឲ្យដោះលែងជនទាំង២៣នាក់ផងដែរ។ លោកស្រី យ៉ាង សុភ័ណ បញ្ជាក់ថា៖ «ទោះជាគ្នាន​ការអនុញ្ញាត ក៏យើងនៅតែធ្វើ ព្រោះយើងផ្អាកកន្លងមក យើងរង់ចាំការដោះស្រាយ ។ តែរហូតមកដល់ពេលនេះ នៅតែគ្នានការដោះស្រាយ ឲ្យបានសមរម្យសម្រាប់កម្មករ៕»

--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី៤ ខែកុម្ភៈ ឆ្នាំ២០១៤