នៅវេលាម៉ោង ១០ព្រឹក ថ្ងៃចន្ទកន្លងមកនេះ អ្នកជ្រមុជទឹកម្នាក់ បានទាក់ទង មកស្នងការនគរបាលតំបន់ ដើម្បី​រាយការណ៍​ថា ខ្លួនបានរកឃើញ សាកសពដែលនៅសល់តែជាឆ្អឹងខ្មោច នៅបាតស្ទឹង។ ក្រុមអាជ្ញាធរ បានបញ្ជូនកាណូតមួយ ទៅ​កាន់​ទីនោះ ដែលត្រូវបានគេស្គាល់ថា ស្ថិតក្នុងតំបន់ «Cienega Springs»។ សមាជិកអ្នកជួយសង្គ្រោះម្នាក់ ដែល​មាន​ជំនាញ​ខាង​ជ្រមុជទឹក បានចុះទៅកាន់ទីកន្លែង ដែលមានគ្រោងឆ្អឹងនោះ និងបានថតជាវីដេអូ មកបង្ហាញផង។

ប៉ុន្តែនៅទីបំផុត ការិយាល័យនគរបាលតំបន់ បានសរសេរអះអាង នៅតាមបណ្ដាញសង្គមថា៖ «អ្នកជួយសង្គ្រោះ បានចុះ​ទៅ​ដល់ កន្លែងដែលមានគ្រោងឆ្អឹងនោះ ស្ថិតនៅ។ ប៉ុន្តែតាមពិត វាគ្រាន់តែជាគ្រោងឆ្អឹង សិប្បនិមិត្តចំនួនពីរ ដែលត្រូវ​បាន​ដាក់​ឲ្យ​អង្គុយ នៅលើកៅអីសម្រាកកាយប៉ុណ្ណោះ។»

គ្រោងឆ្អឹងមួយ មានពាក់វែនតាខ្មៅ រីឯគ្រោងឆ្អឺងមួយទៀត មានកាន់ផ្លាកមួយ ដែលសរសេរអក្សរ នូវឃ្លានេះ៖ «ប៊ែរនី សុបិន្ត​បានរស់នៅ ក្នុងស្ទឹង (Bernie Livin the Dream in the River)» នឹងបានដាក់ថ្ងៃខែថា៖ «ថ្ងៃទី១៦ ខែសីហា ឆ្នាំ​២០១៤»។ មនុស្សមួយចំនួន បានគិតថា នេះអាចជាឈុតឆាកមួយ រៀបចំឡើងវិញ នៃភាពយន្ដ «Bernie Week-end» ដែល​ចេញបញ្ចាំង នៅឆ្នាំ១៩៨៩។

បើទោះជា ទូរស័ព្ទហៅមក របស់អ្នកជ្រមុជទឹក បានបង្កឲ្យអាជ្ញាធរ បញ្ជូនកម្លាំង និងមធ្យោបាយយ៉ាងច្រើន ទៅទីនោះ​ក៏ដោយ ប៉ុន្តែខាងអាជ្ញាធរវិញ បាននិយាយថា៖ «បានធូរស្រាលក្នុងចិត្ត ដោយគ្រោងឆ្អឹងទាំងនោះ មិនមែនជារបស់​មនុស្ស» និងសូមថ្លែងអំណរគុណ យ៉ាងខ្លាំង ទៅដល់អ្នកដែលបានរាយការណ៍ មកអាជ្ញាធរ។

អាជ្ញាធរ បានបញ្ជាក់ទៀតថា ខ្លួននឹងមិនបើកការស៊ើបអង្កេត ឲ្យបានស៊ីជម្រៅ ទៅលើសំនុំរឿងនេះទេ។ នាយ​នគរបាល​តំបន់ លោក គៀទីស ប៊េប៊ី (Curtis Bagby) បានថ្លែងឲ្យដឹងថា៖ «ខ្ញុំមិនគិតថា គ្រោងឆ្អឺងទាំងនេះ ចង់បង្កការតក់ស្លុត អ្វី​មួយ​នោះ​ទេ។ ប៉ុន្តែខ្ញុំគិតថា វាគ្រាន់តែចង់បង្កើតរឿងមួយ ដែលគួរឲ្យចង់សើចប៉ុណ្ណោះ។»៕