«អត់ទេ គ្រាន់តែទំនាក់ទំនងគ្នា ធ្វើជាមិត្តភក្តិ បងប្អូនអីហ្នឹងណា ហើយបុរសហ្នឹងមានប្រពន្ធកូនបី» នេះជាការ​បញ្ជាក់​ជាថ្មី របស់បងប្រុសបង្កើត នារីជនគ្រោះ មាស វន្នីដែលបំរើការងារ ជាបុគ្គលិកសន្តិសុខ នៅរោងចក្រស៊ិនតាយ ដែល​ស្ថិត​នៅនៅមុខផ្សារ កាណាស៊ីធី ភូមិចោមចៅ សង្កាត់ចោមចៅ ខណ្ឌពោធិ៍សែនជ័យ ។

បងប្រុសនារីរងគ្រោះ ពីការជះទឹកអាស៊ីតដដែល បានប្រាប់ដឹងបន្តថា ប្អូនស្រីរបស់លោក មិនមាន​​ទំនាក់ទំនង​ស្នេហា​ស្អិតរមួតអ្វី ជាមួយបុរសឈ្មោះ ជុន ធឿន ជាសន្តិសុខធ្វើការ នៅរោងចក្រ ស៊ិនតាយ ជាមួយគ្នា ដូចការដែល​គេ​និយាយ​តៗគ្នាឡើយ ពួកគេគ្រាន់លេងសើច រាប់អានគ្នាធម្មតាតែប៉ុណ្ណោះ។

បើតាមបងរូបនេះ បានឱ្យដឹងពីស្ថានភាពជម្ងឺ របស់កញ្ញា មាស វន្នី វ័យ២០ឆ្នាំ ដែលកំពុងសម្រាកព្យាបាល នៅក្នុង​មន្ទីរពេទ្យកាល់ម៉ែតថា ឥលូវនេះនាងអាចដើរបានដើរ និងអង្គុយបានខ្លះៗហើយ។ ផ្ទៃមុខ និងដងខ្លួនរបស់នាង ត្រូវ​បាន​រលេះរលួយ ដោយសារតែឥទ្ធិពលទឹកអាស៊ីត។ តែអ្វីដែលគួរឱ្យសោកស្តាយបំផុតនោះ គឺភ្នែករបស់នាងម្ខាង ត្រូវ​បានពិការទាំងស្រុង និងភ្នែកម្ខាងទៀត មើលឃើញតែមិនសូវច្បាស់។

គួររម្លឹកថា កាលពីព្រលឹម ថ្ងៃទី០៦ ខែមិនា នារីជាបុគ្គលិកសន្តិសុខ របស់រោងចក្រ ស៊ិនតាយ ខាងលើ ត្រូវបានស្រ្តី​ម្នាក់ ឈ្មោះ ស្រឿន ណាន់ ជះទឹកអាស៊ីតស្រោចពីលើ ខណៈពេល ដែលនាងកំពុងដើរទៅធ្វើការ ជាមួយកម្មករ​រោង​ចក្រ​ផ្សេងៗ​ទៀត ស្ថិតនៅមុខផ្សារ កាណាស៊ីធី ភូមិចោមចៅ សង្កាត់ចោមចៅ ខណ្ឌពោធិ៍សែនជ័យ ។ មូលហេតុ នៃការ​ជះ​ទឹកអាស៊ីតនេះ ត្រូវបានស្រ្តីជាជនជាប់ចោទរូបនេះ អះអាងនៅចំពោះ នគរបាលស៊ើបអង្កេតថា ប្តីរបស់ខ្លួន និងជន​រង​គ្រោះ មានទំនាក់ទំនងស្នេហាជាមួយគ្នា៕