លួចគោ១យប់៣ក្បាល វះយកតែភ្លៅនិងសាច់
- ដោយ: ក. សោភណ្ឌ អត្ថបទ និងយកការណ៍៖ ក.សោភ័ណ្ឌ ([email protected]) - ភ្នំពេញថ្ងៃទី១០ មករា ២០១៥
- កែប្រែចុងក្រោយ: January 10, 2015
- ប្រធានបទ: ចោរកម្ម
- អត្ថបទ: មានបញ្ហា?
- មតិ-យោបល់
-
តើចោរទាំងនេះ មានជំនាញខាងកាប់គោយកសាច់ឬ? ព្រោះគោហូតដល់ទៅ៣ក្បាល ត្រូវបានក្រុមចោរយកទៅកាប់តែមួយយប់ រួចវះយកតែសាច់ទៅអស់។
ករណីលួចគោមួយយប់អស់បីក្បាលនេះ បានកើតឡើងនៅម៉ោងប្រមាណជា០១ រំលងអធ្រាត ឈានចូលថ្ងៃទី១០ ខែមករា ឆ្នាំ២០១៥នេះ ក្នុងភូមិត្រពាំងទួល ឃុំសំរោងលើ ស្រុកអង្គស្នួល ខេត្តកណ្តាល។ ជនរងគ្រោះដែលជាម្ចាស់គោ លោក ជឿន សុធា បានថ្លែងថា គោរបស់លោកដែលបានបាត់ទាំងបីក្បាលនេះ មានញី១ក្បាល និងឈ្មោល២ក្បាល។
ម្ចាស់គោជាកសិករ អាយុ៣៦ឆ្នាំ ដដែល បាននិយាយថា នៅមុនពេលកើតហេតុ ប្រហែលជាម៉ោង១១យប់ លោកបានបានចុះទៅដាក់ចំបើងឲ្យគោស៊ី មុននឹងត្រឡប់មកដេកនៅផ្ទះវិញ។ ប៉ុន្តែនៅពេលលោកភ្ញាក់ឡើង នៅវេលាម៉ោងប្រហែល០៤ទាបភ្លឺ ស្រាប់តែបាត់គោអស់ពីក្រោលរលីង។ លោកបានស្រែកឆោរឡោឡើង រហូតដឹងដល់អ្នកជិតខាង រួចបាននាំគ្នាដើររក ក៏ប្រទះឃើញសាកសពគោទាំងបីក្បាល ត្រូវចោរប្រលះយកសាច់ភ្លៅជើងមុខក្រោយអស់។ សំណល់សាកសពគោ ដែលគ្មានសាច់ និងគ្មានជើងទាំងនេះ ត្រូវបានរកឃើញនៅចំណុចវាលស្រែខាងលិច ភូមិសាំងដំរី ឃុំឆក់ឈើនាង ស្រុកអង្គស្នួល ខេត្តកណ្តាល។
ប្រជាពលរដ្ឋដែលដឹងពីហេតុការណ៍នេះបាននិយាយថា ក្រុមចោរលួចសត្វគោ គឺជាក្រុមបង្កទុក្ខសោកយ៉ាងខ្លាំង ដល់អ្នកស្រុកដែលមានជីវភាពយ៉ាងក្រីក្រ នៅក្នុងភូមិ។ នោះ ដោយសារតែពលរដ្ឋទាំងនោះ រំពឹងទៅលើសត្វគោក្របី ដើម្បីបានផ្គត់ផ្គងជីវភាព គ្រួសាររបស់ពួកគាត់ ទាំងកម្លាំងអូសទាញ និងជួយរកចំនូលឲ្យគ្រួសារ។ ប៉ុន្តែក្រុមចោរលួចយកសត្វគោរបស់ពួកគាត់អស់ទៅ ហាក់បីដូចជា ផ្តាច់ជីវិតគ្រួសារ របស់ពួកគាត់ទាំងរស់ដូច្នេះ។
នៅពេលនេះ ពលរដ្ឋនៅក្នុងភូមិស្រុកនោះ បានធ្វើសំណូមពរដល់សមត្ថកិច្ចអាជ្ញាធរ ធ្វើយ៉ាងណា ត្រូវជួយស្រាវជ្រាវវែកមុខ ក្រុមទាំងនេះឲ្យបាន រួចហើយដាក់ទោស ឲ្យសមទៅនឹងទង្វើដែលបានប្រព្រឹត្ត។ ប៉ុន្តែខាងសមត្ថកិច្ចអាជ្ញាធរវិញ ក៏បានអះអាងដែរថា ខ្លួនកំពុងបន្តធ្វើការស្រាវជ្រាវ ដើម្បីឈានទៅកំណត់មុខសញ្ញាជនសង្ស័យ ដែលធ្វើសកម្មភាពយ៉ាងជំនាញនេះ យកមកផ្តន្ទាទោសតាមច្បាប់៕