ថ្លែងនៅក្នុងទិវាជាតិ ទីក្រុងស្អាត ឆ្នាំ២០១៥ និងប្រគល់ជ័យលាភី ទីក្រុងស្អាត ឆ្នាំ២០១៥-២០១៨ នៅមជ្ឈមណ្ឌល​កោះ​ពេជ្រ នាព្រឹកថ្ងៃទី២៤ ខែកុម្ភៈនេះ លោកនាយករដ្ឋមន្រ្តី ហ៊ុន សែន បានប្រកាស់ថា នឹងគ្មានការសាងសង់ ទំនប់វារី​អគ្គីសនី នៅតំបន់អារ៉ែង ក្នុងអាណត្តិរបស់លោកឡើយ។ ហើយចង់ឱ្យប្រជាពលរដ្ឋ ឈប់លើកបញ្ហានេះ មកនិយាយ​ទៀត ព្រោះវាស្ថិតក្នុងការសិក្សាស្រាវជ្រាវ។

លោកនាយរដ្ឋមន្រ្តី បានថ្លែងហាម មិនឱ្យលើកយកបញ្ហាសាងសង់ ទំនប់វារីអគ្គីសនីថា៖ «ហេតុអីបានលឺសូអារ៉ែងៗ សម្បើមម្លេះ អារ៉ែងហ្នឹងវ៉ី។ បើចង់ដឹងថា អារ៉ែងហ្នឹងវាយ៉ាងម៉េច វាទាល់តែសិក្សាឱ្យបានច្បាស់សិន។ ហើយខ្ញុំសូម​បញ្ជាក់ កុំនិយាយអារ៉ែងតទៅទៀត។ សិក្សាមើល ឱ្យខ្ញុំមានគោលគំនិតថា ទោះបីជាសិក្សាច្បាស់ ឬមិនច្បាស់ ឬយ៉ាង​ម៉េច ពីនេះដល់ឆ្នាំ២០១៨ អត់មានទេ អត់មានឱ្យធ្វើទេ។ ហើយគំនិតរបស់ខ្ញុំ ចង់ទុកឱ្យក្មេងជំនាន់ក្រោយ កុំឱ្យវា​ពិបាក​ពេក។»

លោកធ្លាប់បានសរសេរលិខិត ទៅរដ្ឋសភាថា រដ្ឋាភិបាលមិនទាន់សម្រេច យ៉ាងណាឡើយទេ ដោយទាមទារ ​ឲ្យមាន​ការ​សិក្សាបន្ថែមទៀត នៅតំបន់អារ៉ែងនេះ។

ការថ្លែងរបស់នាយករដ្ឋមន្រ្តី ធ្វើឡើងក្រោយពេលមួយថ្ងៃ ដែលសកម្មជនការពារបរិស្ថាន និងតស៊ូមតិ កុំឱ្យមានការ​សាង​សង់ ទំនប់វារីអគ្គីសនី នៅតំបន់អារ៉ែង លោក អាឡិចហ្សង់ដ្រូ ហ្គន់សាឡេស ដេវិតសិន ត្រូវបានចាប់ខ្លួន និង​បណ្ដេញ​ចេញពីកម្ពុជា ទាំងបង្ខំ។

លោក ព្រាប កុល ប្រធានអង្គការតម្លាភាពកម្ពុជា បានអបអរសាទរ នូវការប្រកាស របស់លោកនាយករដ្ឋមន្រ្តី ដែលថា​គ្មានការសាងសង់ ទំបន់វារីអគ្គីសនីនៅតំបន់អារ៉ែង។ លោកបានថ្លែងឲ្យដឹងថា រដ្ឋាភិបាលគួរមានវិធានការច្បាស់លាស់ ក្នុងការអភិវឌ្ឍនៅតំបន់នោះ ពីព្រោះព្រៃនៅប្រទេសកម្ពុជាមានការរិចរិល និងបាត់បង់ច្រើនណាស់ ហើយ​តំបន់​អារ៉ែង​នេះ គឺជាព្រៃចុងក្រោយរបស់កម្ពុជា ដែលនៅសល់។

ស្របពេល ដែលប្រកាសថា នឹងគ្មានការសាងសង់ទំនប់វារីអគ្គសនីមួយ តំបន់អារ៉ែង ក្នុងអាណត្តិកាន់អំណាច របស់​លោក​នេះ លោកនាយករដ្ឋមន្រ្តី ហ៊ុន សែន ក៏បានរិះគន់ ទៅលើសកម្មជនតំបន់អារ៉ែង លោក អាឡិច ផងដែរ។ លោក​ថា គ្មានអ្នកណាស្រលាញ់ជាតិសាសន៍ខ្មែរ ជាងខ្មែរស្រលាញ់ខ្លួនឯងនោះទេ។ ហើយខ្មែរក៏មានគំនិតចេះដឹង មិនមែន​ចាំតែ បរទេសមកប្រដៅនោះទេ៕