ក្រោយពីមានការតវ៉ា ទាមទារឲ្យដកមេភូមិ ចេញពីដំណែង របស់ក្រុមអ្នកភូមិ ព្រៃព្រិច សង្កាត់ប៉ោយប៉ែត ក្រុង​ប៉ោយប៉ែត ខេត្តបន្ទាយមានជ័យ កាលពីថ្ងៃទី២៣ ខែកុម្ភៈ ឆ្នាំ២០១៥កន្លងមក នៅថ្ងៃនេះ ចៅសង្កាត់ប៉ោយប៉ែត បាន​ពន្យល់​ពី​ចំណាត់​ការ​របស់លោក ទៅលើពាក្យបណ្ដឹងរបស់ពលរដ្ឋទាំងនោះ។

ចៅសង្កាត់ប៉ោយប៉ែត លោក នុត លី បានឲ្យទស្សនាវដ្ដីមនោរម្យ.អាំងហ្វូដឹង នៅថ្ងៃទី២៤ ខែកុម្ភៈនេះថា លោកបានចាត់ ឲ្យក្រុមការងាររបស់លោក ចុះធ្វើការអង្កេត ទៅដល់ទីតាំងភូមិឃុំ ដែលកើតហេតុនេះភា្លមៗ បន្ទាប់ពីទទួលបានពាក្យ​បណ្តឹង។ ចំណាត់ការដ៏រហ័សនេះ ឈរលើជំហរមិនលំអៀង ទៅខាងណាមួយនោះទេ ព្រោះលោកគិតថា ប្រជា​ពលរដ្ឋ​ក៏ជាអ្នកស្លូតត្រង់ រីឯមេភូមិ ក៏ជាអ្នកបម្រើការងារ ជាយូរមកហើយដែរ។

លោក នុត លី បានបញ្ជាក់ថា អ្វីដែលអាចធ្វើបាន គឺរង់ចាំទទួលការចុះត្រួតពិនិត្យផ្ទាល់ របស់ក្រុមកាងារសង្កាត់សិន។ លោក បានថ្លែងទៀតថា លទ្ធផលយ៉ាងណា លោកមិនទាន់អាចឆ្លើយបានទេ។ តែលោកបានរៀបចំលិខិត ហៅ​សាកសួរ​រួចរាល់ហើយ ដើម្បីទទួលបានភាពយុត្តិធម៌ ទាំងសងខាង។ អ្វីដែលល្អ ហើយជាការពិត លោកនឹងធ្វើទៅតាមច្បាប់។

ពាក្យបណ្តឹង របស់អ្នកតវ៉ាប្រមាណជាជាង៥០នាក់ ដែលតំណាងឲ្យប្រជាជនក្នុងភូមិ ៥៨៩គ្រួសារនោះ បានទាមទារ​ឲ្យ​ដកមេភូមិ អ្នក ហុក លឿម ប្រធានភូមិព្រៃព្រិច ចេញពីដំណែង ដោយសង្កត់ធ្ងន់លើចំណុចសំខាន់បី៖ ទីមួយ ស្រ្តីមេភូមិ​ខាងលើមិនចេះអក្ស ទីពីរ ប្រើពាក្យសម្ដីមិនសមរម្យ ទៅកាន់ពលរដ្ឋក្នុងភូមិ (សម្តីអាក្រក់ ជេរ ប្រមាថ) និង​ទីបី ប្រើសិទ្ធ​អំណាច រំលោភលើពលរដ្ឋទន់ខ្សោយ។

តំណាងអ្នកភូមិព្រៃព្រិច សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យបានឲ្យដឹងថា ទោះស្ថិតនៅក្នុង​ពេល​វេលារង់ចាំក៏ដោយ ក៏អ្នកភូមិនៅតែបន្ត ការផ្តិតមេដៃតទៅទៀតដែរ រហូតដល់ខាងសង្កាត់ មានតំណោះស្រាយ ជូន​ពួក​គាត់ត្រឹមត្រូវមួយ ដែលអាចទទួលយកបាន។ ពលរដ្ឋអ្នកភូមិព្រៃព្រិចមួយរូប អ្នកស្រី តឿន វិត បានបញ្ជាក់ថា មេភូមិ​របស់​គាត់ នៅ​ពេល​ដែលអ្នកភូមិ មានការបំពេញឯកសារអ្វីផ្សេងៗនោះ គឺកូនស្រីរបស់គាត់ ជាអ្នកធ្វើជំនួស។ ព្រោះ​គាត់​មិនសូវចេះអក្សរ មានបញ្ហានេះជាញឹកញាប់ បានធ្វើឲ្យអ្នកភូមិទ្រាំមិនបាន ហើយរួមគ្នាបន្តការតវ៉ាមួយកំរិតទៀត ទោះ​ជា​មានអ្នកភូមិខ្លះ មិនហានចេញមុខក៏ដោយ។

ឆ្លើយតបនឹងការចោទប្រកាន់ របស់ក្រុមអ្នកភូមិ អ្នកស្រី ហុក លឿម មេភូមិព្រៃព្រិច បាននិយាយថា អ្នកស្រីមិនដឹង​រឿង​អ្វីនោះទេ។ អ្នកស្រីបានចាត់ទុករឿង ដែលកើតឡើងកន្លងមក ថាជារឿងបុគ្គល និងជារឿងរបស់ក្មេងៗ ដែល​មិន​មាន​ពាក់ព័ន្ធ ជាមួយអ្នកស្រីទេ។

ទោះជាយ៉ាងណា ចៅសង្កាត់ខាងលើបានថ្លែងឲ្យដឹងដែរថា វាជាការប្រសើរណាស់ ដែលអ្នកភូមិបានដាក់ពាក្យបណ្តឹង មកកាន់សង្កាត់ ដើម្បីឲ្យសង្កាត់ជួយ នូវអ្វីដែលពួកគេទទួលយកមិនបាន។ ហើយវាជារឿងមួយ ដែលត្រឹមត្រូវ ព្រោះ​ពលរដ្ឋ គឺជាកោសិកានៅក្នុងភូមិ មានសិទ្ធបញ្ចេញមតិ និងលើកឡើង នូវអ្វីដែលជាភាពអយុត្តិធម៌ នៅក្នុងមូលដ្ឋាន​របស់​ខ្លួន៕