បន្ទាប់ពីមានការគម្រាមលោក សុខ ទូច ប្រធានក្រុមស្រាវជ្រាវ នៃរាជបណ្ឌិតសភាកម្ពុជា កាលពីថ្មីៗមុននេះ នាថ្ងៃទី៣០ បន្តមកថ្ងៃទី៣១ ខែសីហា ឆ្នាំ២០១៥ នេះ ជនអនាមិកផ្សេងទៀត បានប្រើភាសារគម្រាម ទៅលើ​អ្នកស្រី កុយ ពិសី អនុប្រធានគណៈកម្មាធិការ កិច្ចការចម្រុះព្រំដែនកម្ពុជា វិញម្តង។

ទស្សនាវដ្តីមនោរម្យ.អាំងហ្វូ បានព្យាយាម សុំការបញ្ជាក់ពីអ្នកស្រី ជុំវិញការគម្រាម របស់ជនអានាមិក​នោះ​បាន​នៅឡើយ ដោយទូរស័ព្ទអ្នកស្រី ពុំមានការលើកទទួល។ តាមព័ត៌មាន ដែលទស្សនាវដ្តី ទទួលបាន បាន​បញ្ជាក់ថា ការគម្រាមនេះបានកើតឡើង តាមរយៈការផ្ញើរសារក្នុងទូរស័ព្ទដៃផង និងតាមរយៈហ្វេសប៊ុក របស់​អ្នកស្រីផង។

គេនៅមិនទាន់ដឹង ពីព័ត៌មានណាមួយ ដែលបញ្ជាក់ពីជំហរអ្នកស្រី ថាតើនឹងត្រូវធ្វើការ ដោះស្រាយយ៉ាង​ណា​នៅឡើយ ហើយមកទល់ពេលនេះ និងថាតើការគម្រាម នៅមានបន្ត ឬបានបញ្ចប់ស្ងប់ស្ងាត់ ទៅវិញហើយ? ឯ​អ្នកស្រីនឹងដោះស្រាយបែបណា? តើអ្នកស្រី បានប្តឹងទៅអាជ្ញាធរ មានសមត្ថកិច្ចពាក់ព័ន្ធដែរឬទេ?

សារគម្រាមអ្នកស្រី កុយ ពិសី នៅបណ្តាញសង្គម ដែលត្រូវបានក្រុមអ្នកប្រើប្រាស់ ចែករំលែកតៗគ្នានោះ មាន​សេចក្តីថា៖ «ប្រយ័ត្នខ្លួនបន្តិចណា ម៉េចមីច្រម៉ក់ឯងថា លោក អ៊ុំ សំអាន ដើរកុហករឿងព្រំដែន។ ព្រោះកន្លង​មកថ្មី២នេះ លោកស្រីធ្លាប់បានលើកឡើងចំៗថា សកម្មភាពរបស់តំណាងរាស្ត្រ គណបក្សសង្គ្រោះជាតិ លោក អ៊ុំ សំអាន កំពុងធ្វើដើម្បីកេងចំណេញ ផ្នែកនយោបាយ ជាមួយនឹងការភរភូត កុហក បោកប្រាស់ប្រជាពលរដ្ឋ ដោយគ្មានសំអាងការពិតនោះ»។

ឯលោក សុខ ទូច ប្រធានក្រុមស្រាវជ្រាវ បញ្ហាព្រំដែន នៃរាជបណ្ឌិតសភាកម្ពុជា (ជាសេនាធិការមួយ របស់​រដ្ឋាភិបាល​កម្ពុជា) ក៏ត្រូវបានជនអនាមិកផ្សេងទៀត សរសេរគម្រាមដែរថា៖ «ទុកបាញ់ក្បាល សុខ ទូច អា​បណ្ឌិតខួរឆ្កែ អាបណ្ឌិត កែប្រែប្រវត្តិសាស្រ្ត អាបណ្ឌិតលក់ខួរឲ្យយួន»។ ម្ចាស់សំណេរ គម្រាមលោក សុខ ទូច នោះ ដាក់ឈ្មោះខ្លួន នៅលើហ្វេសប៊ុកថា «Sey Hu»។ ក្រៅពីការសរសេរពាក្យគម្រាមខាងលើ ម្ចាស់គណនី​មួយនេះ ក៏បានផុសភ្ជាប់ជាមួយ នូវរូបថតមួយចំនួន ដូចជារូបកាំភ្លើងខ្លីមួយដើម និងគ្រាប់ចំនួន ៣១ គ្រាប់ ជា​ពិសេសផង។

ទស្សនាវដ្តីក៏មិនអាច ស្វែងរកប្រតិកម្ម ពីលោក សុខ ទូច ដោយផ្ទាល់បាននៅឡើយ នាពេលនេះ។ តែលោក​បានបង្ហាញ តាមហ្វេសប៊ុកមានន័យថា សារគំរាមកំហែងនោះ បានធ្វើការចោទប្រកាន់រូបលោក ជាមនុស្ស​ក្បត់​ជាតិ និងលក់ដីឲ្យយួនជាដើម។ លោក សុខ ទូច បានសរសេរប្រតិកម្ម នឹងការគម្រាមនេះថា៖ «ជនរួមជាតិជា​ទីគោរព និងជាទីរាប់អាន ខ្ញុំនឹងធ្វើដំណើរទៅមុខ សម្រាប់ជាតិរបស់យើងទាំងអស់គ្នា និងប្រវត្តិសាស្ត្រ។ គ្មាន អ្វីដែលខ្ញុំត្រូវខ្លាច មនុស្សប្រភេទនេះទេ។ មិនបាច់មកគំរាម លើរូបខ្ញុំ (ទេ) ព្រោះមានប្រជាជនច្រើនណាស់ ធ្វើ​ជាសាក្សី។»។

នេះជារឿងមួយកម្រ ដែលមន្រ្តីទទួលខុសត្រូវ បញ្ហាព្រំដែនកម្ពុជាដ៏ចម្រូងចម្រាស់ ចំនួនពីររូប ត្រូវជនអនាមិក គម្រាមសម្លាប់ ជាបន្តបន្ទាប់ដូច្នេះ។ ការគម្រាមនេះ បានកើតឡើង នៅក្រោយការផ្ទៀងផ្ទាត់ផែនទី ព្រំដែន​កម្ពុជា រវាងផែនទី ដែលរដ្ឋាភិបាលប្រើប្រាស់ និងផែនទីមកពីប្រភពជាច្រើន ដែលត្រូវបានធ្វើជាបន្តបន្ទាប់ ក្នុង​រយៈពេលចុងក្រោយនេះ។ អ្នកស្រី កុយ ពិសី ជាអនុប្រធានគណៈកម្មាធិការ កិច្ចការចម្រុះព្រំដែនកម្ពុជា ត្រូវ​បានគេដឹងថា បានការពារយ៉ាងប្ដូរផ្ដាច់ នូវផែនទីព្រំដែនកម្ពុជា របស់រដ្ឋាភិបាល ដែលគណៈកម្មាធិការអ្នកស្រី តែងប្រកាន់ខ្ជាប់ ធ្វើជាគោលក្នុងការចរចា និងការបោះបង្គោលសីមា ជាមួយប្រទេសវៀតណាម។ ផែនទី​របស់​រដ្ឋាភិបាលកម្ពុជា ដែលគាំទ្រដោយលោក សុខ ទូច ប្រធានក្រុមស្រាវជ្រាវ បញ្ហាព្រំដែន នៃរាជបណ្ឌិត​សភា​កម្ពុជា តែត្រូវបានសកម្មជនព្រំដែន គិតថាជាផែនទី«ក្លែងក្លាយ»។

លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រី បានចាត់ទុកការគំរាមសម្លាប់ខាងលើ ជាករណី​ព្រហ្មទណ្ឌ។ លោកបានសរសេរ ក្នុងគណនីហ្វេសប៊ុករបល់លោកថា៖ «អាស្រ័យដោយបណ្តាញសារព័ត៌មាន សួរខ្ញុំអំពីករណី ការគំរាមសម្លាប់ ដល់បណ្ឌិត សុខ ទូច ចម្លើយរបស់ខ្ញុំ គឺយល់ឃើញថា គឺជាបទល្មើស​ព្រហ្មទណ្ឌ។ បន្ថែមពីលើនេះទៅទៀត គឺការប៉ុនប៉ងរារាំង ដល់ដំណើរការងារផ្ទៀងផ្ទាត់ផែនទី ដែលត្រូវ​ទទួល​ខុសត្រូវ ចំពោះមុខច្បាប់ជាធរមាន។ ខ្ញុំជឿជាក់ថាសមត្ថកិច្ច នឹងចាត់វិធានការជាបន្ទាន់។»៕