វីដេអូមួយ ដែលត្រូវបានបង្ហោះ និងធ្វើការចែកចាយ យ៉ាងព្រោងព្រាត នៅក្នុងហ្វេសប៊ុក បានបង្កឱ្យមាន​ប្រតិកម្ម​យ៉ាងច្រើន ពីសំណាក់អ្នកប្រើប្រាស់ បណ្តាញសង្គមមួយនេះ។ មូលហេតុ ដែលនាំឱ្យមានប្រតិកម្ម ដោយ​សារ​តែវីដេអូនេះ បានបង្ហាញពីសកម្មភាព របស់ជនបរទេសម្នាក់ មើលងាយ និងប្រមាថ​ទៅលើ​ក្រដាស​ប្រាក់​របស់​ខ្មែរ ដូចជាយកលុយទៅដុត បាចឱ្យក្មេងរើស និងយកមកធ្វើជាក្រដាស ជំនួសក្រដាសអនាម័យ ដែល​គេ​ដាក់​ក្នុងបន្ទប់ទឹកជាដើម។

តាមពិតទៅវីដេអូនេះ មានចំណងជើងថា «២០ដុល្លា ដូរបាន ១០០រៀល មួយបាវ (20 USD in notes of 100 Cambodian Riel)» និងត្រូវបានបង្ហោះ ឡើងលើគេហទំព័រយូធូប កាលពីថ្ងៃទី ៨ ខែវិច្ឆិកា ឆ្នាំ២០១៤កន្លងទៅ ដោយ​ម្ចាស់គណនីមួយរូប ឈ្មោះ ដេនី ឆើនណូ (Danny Cherno)។ ប៉ុន្តែទំនងជាប្រិយមិត្ត អ្នកប្រើប្រាស់​ហ្វេសប៊ុក នៅកម្ពុជា មិនយល់ និងមិនស្គាល់ពីមូលហេតុ នៃការធ្វើវីដេអូនេះ ទើបបង្កឲ្យមានការតបតរ​យ៉ាង​ខ្លាំងក្លា ពីសំណាក់អ្នកទាំងនោះ ដោយពួកគេយល់ថា វាការយករូបិយប័ណ្ណខ្មែរ មកលេងសើចរម៉ាកងាយ។

ប្រសិនបើនិយាយពីផ្លូវច្បាប់ មិនមែនតែនៅក្នុងប្រទេសកម្ពុជាទេ នៅប្រទេសណាផ្សេង ក៏មានច្បាប់ការពារ កុំ​ឲ្យ​យករូបិយវត្ថុជាតិមកម៉ាកងាយ ដូចយ៉ាងដុតចោល ឬជាន់នឹងជើងនោះដែរ។ ដូច្នេះប្រតិកម្ម របស់អ្នកប្រើប្រាស់​ហ្វេសប៊ុក មិនខុសទេ។ យុវជនម្នាក់ បានសរសេរឡើងថា៖ «ពិតជាឆ្កួតហើយ វាយករូបិយវត្ថុខ្មែរ ទៅធ្វើជាល្បែង​មើលងាយ ថោកទាប។ ជនបរទេសនេះ មើលងាយលុយខ្មែរ មើលងាយជាតិ បានន័យថាមើលងាយខ្មែ។» មិន​ត្រឹមតែប៉ុណ្ណឺង អ្នកប្រើប្រាស់ហ្វេសប៊ុកភាគច្រើន សុទ្ធតែស្នើឱ្យអាជ្ញាធរកម្ពុជា តាមស៊ើបអង្កេតចាប់ជនបរទេស ដែលផលិតវីដេអូនេះ មកធ្វើការផ្តន្ទាទោសតាមច្បាប់ ដើម្បីជាការព្រមាន ដល់ជនបរទេសដ៏ទៃទៀត ដែលចូល​មក​រស់នៅស្រុកខ្មែរ ហើយប្រព្រឹត្តអំពើមិនគួរគប្បី។

រីឯអ្នកមួយចំនួនទៀត បានលើកឡើងថា ការដែលជនបរទេសរូបនេះ ធ្វើបែបនេះ ព្រោះតែខ្មែរជាប្រទេស​សេរី​ពេក ក្នុងការប្រើប្រាស់ក្រដាសប្រាក់ មិនថាលុយដុល្លារ លុយបាតថៃ ឬលុយដុងវៀតណាមជាដើម គឺសុទ្ធ​ប្រើ​ប្រាស់ ឬចាយវាយក្នុងស្រុកបានទាំងអស់ ខុសប្លែកពីប្រទេសដទៃ ដែលគេកំណត់ឱ្យចាយតែ​ប្រាក់របស់​ជាតិ​គេ។ ម្ចាសសគណនីមួយរូបទៀត បន្ទរទៅជាមួយដែរថា៖ «គេធ្វើបែបហ្នឹងវាសមហើយ មកពីយើងមិនឱ្យតម្លៃ​លុយ​ខ្មែរខ្លួនឯង ទើបបានគេមើលបែបនេះ គួរតែឈប់ចាយ លុយបរទេសទៅ។»។

ប៉ុន្តែអ្នកលេងហ្វេសប៊ុកម្នាក់ទៀត បានយល់ថា៖ «គេធ្វើអញ្ចឹងត្រូវហើយ យើងវាអន់មែន បានគេមើលងាយ​អញ្ចឹង។ ទៅអង្គរវត្តមើល អ្នកសុំទានជនជាតិអ្វី? ខ្ញុំគិតថា គេធ្វើនេះ មិនមែនគ្មានហេតុផលទេ អ្នកទាំងអស់គ្នា​ទៅសួរ​គាត់ដោយផ្ទាល់ ថាហេតុអ្វីបានជាថតវីដេអូបែបនេះ មិនមែនចេះត្រឹមតែ Comment ស្តីថា ឬក៏ជេគាត់ បានតែក្នុងហ្វេសប៊ុកអញ្ចឹងទេ?»។

មិនខុសទេ គប្បីត្រូវដឹងថា តើវីដេអូនេះ និយាយពីអ្វីសិន មុននឹងប្រតិកម្ម។ នៅជាមួយនឹងវីដេអូ ដែលត្រូវបាន​បង្ហោះ​​នៅ​លើ​យូធូបនោះ ម្ចាស់គណនី ដេនី ឆើនណូ បានសរសេរពន្យល់ពីវីដេអូខ្លួន ដូច្នេះថា៖ «ក្រដាសប្រាក់ ១០០​រៀល​ខ្មែរ មានតម្លៃប្រមាណជា ២សេន ដុល្លារ។ តើធ្វើដូចម្ដេចទៅ នៅពេលដែលអ្នកមានលុយ មួយបាវ ដែលមាន​ចំនួន​ច្រើនបែបនេះ ហើយឧបមាថា ខ្លួនអ្នក គឺជាអ្នកមានថ្មី ដ៏ល្ងីល្ងើរម្នាក់ ក្នុងថ្ងៃណាមួយ? វាជារឿង ដែលខ្ញុំចង់ក្លាយ​ទៅ​ជា​អញ្ចឹង រាល់តែថ្ងៃណ្នឹង។»៕

សូមទស្សនាវីដេអូ៖