សកម្មជន​ដី​ធ្លី​ជាង ៤០០​នាក់ មក​ពី​តាម​បណ្តា​ខេត្ត​ក្រុង​ចំនួន ១៦ បាន​ជួបជុំ​គ្នា​នៅ​ព្រឹក​ទី ១១ ខែ​កុម្ភៈ​នេះ ដើម្បី​ស្នើ​ទៅ​ក្រសួង​យុតិធម៌ និង​ក្រសួង​មហាផ្ទៃ ឲ្យ​ជួយ​ធ្វើ​អន្តាគមន៍​បញ្ឈប់​ការ​រំលោភ​បំពាន​ដី​ធ្លី និង​ជំរុញ​ឲ្យ​មាន​ការ​ដោះ​លែង​សកម្មជន​ដី​ធ្លី ដែល​កំពុង​ជាប់​ឃុំ នៅ​ពន្ធនាគារ​ព្រៃ​ស ដោយ​សារ​អំណាច​សាល​ក្រម​របស់​តុលាការ កាល​ពី​ពេល​កន្លង​ទៅ។

ការជួបជុំគ្នារបស់ប្រជាពលរដ្ឋទាំងនោះ បានដង្ហែក្បួនទៅដាក់ញត្តិ នៅក្រសួងមហាផ្ទៃមុនគេ បន្ទាប់មកពួកគេ​បានបន្តដំណើរ ទៅដាក់ញត្តិនៅក្រសួងយុត្តិធម៌បន្តទៀត នៅវេលាម៉ោង ១០:០០ព្រឹកនេះ។ តាមគោល​បំណង​នៃការដាក់ញត្តិនេះ ពួកគេមានគោលបំណង ដាក់បួនកន្លែងផ្សេងគ្នា ប៉ុន្តែដោយខ្លាចមានការប៉ះពាល់ ដល់​សណ្តាប់​ធ្នាប់សង្គម ឫមានការស្ទះចរាចរណ៍ នៅតាមដងផ្លូវ ដូច្នេះពួកគេបានបង្វែ ស្នើរទៅក្រសួងយុត្តធម៌​បញ្ជូន​សំណើរ ឫញត្តិនោះទៅសាលាដំបូង និងសាលាឧទ្ធរណ៍បន្តទៀត ដើម្បីជម្រុញឲ្យមានការធ្វើការ​អន្តរាគមន៍​ជាបន្ទាន់ ពាក់ព័ន្ធនឹងបញ្ហាដីធ្លី និងសកម្មជនដែលកំពុងជាប់ពន្ធនាគា។ នេះបើតាមការបញ្ជាក់ របស់តំណាងប្រជាសហគមន៍ ដែលបានចូលរួមតវ៉ានោះ។

អ្នកស្រី ប៊ូវ សោភា តំណាងមួយរូបរបស់ក្រុមពលរដ្ឋអ្នកដាក់ញត្តិ បានថ្លែងប្រាប់ទស្សនាវដ្ដីមនោរម្យ.អាំងហ្វូថា ចំពោះ​ជនរងគ្រោះ ដែលកំពុងជាប់ឃុំ វាជាអំពើអយុត្តិធម៌បំផុត ដែលរដ្ឋាភិបាលប្រើអំណាចតុលាការ ដើម្បី​បំបិទ​សិទ្ធិសេរីភាពរបស់ពួកគាត់ដូច្នេះ។

គួរំលឹកថា ស្ត្រីសកម្មជនដីធ្លី និងព្រះសង្ឃ ត្រូវបានត្រូវបានអាជ្ញាធរក្រុងភ្នំពេញ ចាប់ផ្សឹក និងដាក់ពន្ធនាគារ​ព្រៃ​ស ដោយចោទពីបទផ្សេងៗគ្នា ក្នុងនោះ អ្នកបឹងកក់ត្រូវបានតុលាការចោទ ពីបទបិទផ្លូវសាធារណៈ ដែលបាន​ប្រព្រឹត្តទៅ នៅមុខសាលារាជធានីភ្នំពេញកាលពីថ្ងៃទី១០ ខែវិច្ឆិកា ឆ្នាំ២០១៤កន្លងទៅនេះ ខណៈដែលពួកគាត់ បានទាមទារឲ្យមន្ត្រីសាលារាជធានី ជួយដោះស្រាយការបញ្ហាទឹកជន់លិចក្នុងតំបន់បឹងកក់ ។ ដោយឡែក ព្រះ​សង្ឃ និងសកម្មជនដីធ្លី មួយចំនួនទៀត ត្រូវបានចាប់ខ្លួននៅមុខសាលាដំបូងរាជធានីភ្នំពេញ៕