ប្រតិកម្មនឹងព័ត៌មាន «ថោង សារ៉ាត់ ជាកូនប្រសារ កឹម សុខា»
- ដោយ: អ៊ុម វ៉ារី អត្ថបទ និងយកការណ៍៖ អ៊ុម វ៉ារី ([email protected]) - ភ្នំពេញ ថ្ងៃទី១៤ មករា ២០១៤
- កែប្រែចុងក្រោយ: January 14, 2015
- ប្រធានបទ: ឧក្រិដ្ឋកម្ម
- អត្ថបទ: មានបញ្ហា?
- មតិ-យោបល់
-
មើលទៅ សំនុំរឿងលោក ថោង សារ៉ាត់ ដែលដូចជាស្ងាត់ទៅមួយរយៈនេះ នៅមានភាគបន្តច្រើនទៀត។ ជាពិសេស នៅពេលដែលបញ្ហាដ៏រំជើបរំជួលនេះ ត្រូវបានគេភ្ជាប់ចូលមកក្នុងបញ្ហានយោបាយ។ នៅថ្ងៃទី១៣ ខែមករា ឆ្នាំ២០១៤ សារព័ត៌មានភ្នំពេញថ្មី បានចេញផ្សាយអត្ថបទមួយ ដែលមានចំណងជើងថា «ទម្លាយពត៌មានលោក ថោង សារ៉ាត់ ជាកូនប្រសារលោក កឹម សុខា» ដោយលើកយកប្រភពមិនចេញអត្តសញ្ញាណ មកសំអាងថា លោកឧកញ៉ា ថោង សារ៉ាត់ គឺជាកូនប្រសាររបស់លោក កឹម សុខា អនុប្រធានទី១រដ្ឋសភា និងជាអនុប្រធានគណបក្សសង្គ្រោះជាតិ។
ព័ត៌មាននេះ ត្រូវបានទំព័រហ្វេសប៊ុកមួយចំនួន ដែលស្និតនឹងគណបក្សប្រជាជនកម្ពុជា និងរដ្ឋាភិបាលលោក ហ៊ុន សែន យកមកចុះផ្សាយជាបន្តបន្ទាប់ នៅព្រឹកថ្ងៃទី១៤ ខែមករា ឆ្នាំ២០១៥នេះ បង្កឲ្យមានអ្នកចែករំលែក និងផ្ដល់ជាយោបល់យ៉ាងច្រើនផុលផុស។ គេហទំព័រសារព័ត៌មានភ្នំពេញថ្មី បានដកស្រង់សម្ដីមន្ត្រីជាន់ខ្ពស់ ដោយមិនបញ្ជាក់អត្តសញ្ញាណមួយរូប មកអះអាងថា ពត៌មានលោក ថោង សារ៉ាត់ ជាកូនប្រសារលោក កឹម សុខា ត្រូវគេបិទបាំងដោយសារតែលោក ថោង សារ៉ាត់ មានប្រពន្ធច្រើនពេក ហើយមិនដឹងថាកូនស្រីលោក កឹម សុខា ជាប្រពន្ធទីប៉ុន្មាននោះឡើយ។ ទន្ទឹមនឹងនោះប្រសិនបើពត៌មានខាងលើនេះ ត្រូវបានគេទម្លាយជាផ្លូវការនោះ វាអាចនិងនាំឲ្យពិបាកក្នុងការស៊ើបអង្កេតការចាប់ខ្លួន ក្រោមលេសហេតុផលនយោបាយ។
សារព័ត៌មានដដែល បានស្រង់សម្ដីមន្ត្រីជាន់ខ្ពស់លាក់មុខរូបនោះ និងសម្ដីរបស់បុគ្គលិកក្រុមហ៊ុន 999 លាក់មុខដូចគ្នាម្នាក់ទៀត មកសរសេរបន្តថា លោក ថោង សារ៉ាត់ មានទំនាក់ទំនងជិតស្និត ជាមួយលោក កឹម សុខា និងគណបក្សសង្គ្រោះជាតិ ដូចជាបានចំណាយទុនរាប់សិបម៉ឺនដុល្លារ ដើម្បីជួយដល់គណបក្សប្រឆាំង និងណែនាំឲ្យបុគ្គលិក និងអង្គរ័ក្សទាំងអស់ បោះឆ្នោតឲ្យគណបក្សនេះ។
ទស្សនាវដ្តីមនោរម្យ.អាំងហ្វូមិនអាចសុំការបញ្ជាក់ពីកញ្ញា កឹម មនោវិទ្យា កូនស្រីច្បងរបស់លោក កឹម សុខា បាននៅឡើយទេ ក្នុងថ្ងៃទី១៤ ខែមករានេះ។ ឯអ្នកនាំពាក្យគណបក្សសង្គ្រោះជាតិលោក យ៉ែម ប៉ុញ្ញារិទ្ធ ក៏មិនអាចទំនាក់ទំនងបានដែរ ដោយគ្មានអ្នកទទួលទូរស័ព្ទ។ តែបើតាមការបញ្ជាក់របស់លោក រស់ សួរ មន្រ្តីជាន់ខ្ពស់របស់គណបក្សសង្គ្រោះជាតិ បានប្រានចោលនូវការលើកឡើងខាងលើ។ លោកបានចាត់ទុកថា ការលើកឡើងនេះ ជាការបង្កាច់បង្ខូច ការលាបពណ៌ មកលើមន្រ្តីរបស់គណបក្សសង្គ្រោះជាតិ បន្ទាប់ពីគណបក្សមួយនេះ មានប្រជាប្រិយ និងមានការគាំទ្រច្រើនពីប្រជាពលរដ្ឋ ពិសេសអ្នករងគ្រោះ ដោយការបាត់បង់ដីធ្លី ផ្ទះសំបែង និងស្រែចំការក្រោយការចូលរដ្ឋសភា។
មន្រ្តីគណបក្សប្រឆាំងរូបនេះបានបន្តថា យ៉ាងណាក៏ដោយ វាជារឿងមួយដែលកំពុងទាញភ្ជាប់ទៅរកបញ្ហានយោបាយ ពីសំណាក់មន្រ្តីខិលខូច ដែលមិនគាំទ្រនឹងការគាស់កកាយនូវអំពើពុករលួយ និងការនាំកម្ពុជាទៅរកនីតិរដ្ឋពិត តាមយន្តការរដ្ឋសភារបស់គណបក្សសង្គ្រោះជាតិនោះ។ លោក រស់ សួរ បាននិយាយទៀតថា ស្របពេលដែលអាជ្ញាធរមិនទាន់បានបង្ហាញនូវសមត្ថភាព និងលទ្ធភាពគ្រប់គ្រាន់ ក្នុងការស្វែងរកឃាតករ«ពិត» ដែលសម្លាប់លោក អ៊ឹង ម៉េងជឺ និងទន្ទឹមការបំបែក«គ្រិះ» នៃមន្រ្តីមួយចំនួនដែលបានកំពុងចាក់ឬសយ៉ាងជ្រៅ ក្នុងស្ថាប័ន គ.ជ.ប ឲ្យរលើងបន្តិចម្តងៗ ក៏កើតមានបញ្ហាមួយទៅបញ្ហាមួយជាបន្តបន្ទាប់។
មន្ត្រីជាន់ខ្ពស់រូបនេះ បានបន្តថា ការញុះញង់នេះ ក៏កើតឡើងពីការមិនពេញចិត្តចំពោះសកម្មភាព នៃការកោះហៅរដ្ឋមន្រ្តីនៃស្ថាប័នរដ្ឋនានា ដែលមកពីគណបក្សប្រជាជនកម្ពុជា មកធ្វើការសួរឆ្លើយចំពោះមុខសភា នូវអំណាច និងការអនុវត្តដែល«គ្មាន»ប្រសិទ្ធិភាព របស់គណបក្សប្រជាជនកម្ពុជាមួយចំនួន នាពេលកន្លងមកជាដើម។
ទាក់ទងនឹងកូនស្រីរបស់លោក កឹម សុខា ត្រូវបានលោក រស់ សួរ ចាត់ទុកថា នេះជាការបរិហារកេរ្តិ៍មួយ ដែលទំព័រហ្វេសប៊ុកមួយចំនួន បានភ្ជាប់រូបកញ្ញា កឹម មនោវិទ្យា មកជាមួយផង ក្នុងការផ្សព្វផ្សាយព័ត៌មានមិនពិតនេះ។ លោក រស់ សួរ បានបញ្ជាក់ថា៖ «កញ្ញាមានសិទ្ធិគ្រប់គ្រាន់ក្នុងការប្តឹង ពីបុគ្គលដែលបានប្រឌិតនូវរឿងនេះឡើង តាមនីតិវិធីតុលាការគ្រប់ពេល ចាប់ពីពេលនេះតទៅ»។
សូមរំលឹកថា មកទល់នឹងពេលនេះសមត្ថកិច្ចកម្ពុជានៅមិនទាន់បង្ហាញពីជំហរ ក្នុងការស្វែងរកចាប់ខ្លួនលោក ថោង សារ៉ាត់ ដែលសង្ស័យថាជាមេក្លោងនៅពីក្រោយ ការបាញ់សម្លាប់លោក អ៊ឹង ម៉េងជឺនៅឡើយ ខណៈដែលអង្គរ័ក្សរបស់លោក (ថោង សារ៉ាត់) ឪពុកម្តាយ និងមនុស្សមួយចំនួនបាននឹងកំពុងឃុំខ្លួន ក្នុងពន្ធនាគារព្រៃសរ៕
