ក្នុងវេទិការ ជួបជាមួយនឹងសកម្មជន គណបក្សសង្គ្រោះជាតិ កាលពីថ្ងៃទី២១ ខែមេសា ម្សិលម៉ិញនេះ លោក មាជ សុវណ្ណារ៉ា បានធ្វើការប្តេជ្ញាចិត្តជាថ្មី បន្ទាប់ពីទទួលបានបទពិសោធ ក្នុងពន្ធគារ អស់រយៈពេលជិតប្រាំមួយខែ ក្រោម​បទ​ចោទ ពីការដឹកនាំការប្រើហិង្សា នៅស្ពាននាគ កាលពីថ្ងៃទី១៥ ខែកក្កដា ឆ្នាំ២០១៤ កន្លងមក។

កាលពីថ្ងៃទី១៣ ខែមេសា ឆ្នាំ២០១៥ សាលាដំបូងរាជធានីភ្នំពេញ បានដោះលែងលោកមាជ សុវណ្ណារ៉ា និងសកម្មជន​គណបក្សប្រឆាំង មួយចំនួនទៀត តាមការស្នើសុំរបស់មេធាវី និងស្របទៅតាមការធូរស្បើយ នៃភាពតានតឹង​ខាង​ផ្នែក​នយោបាយ។ សកម្មជនគណបក្សប្រឆាំងទាំងនោះ ត្រូវបានតុលាការសម្រេច ឲ្យដាក់ស្ថិតក្រោម ការត្រួតពិនិត្យ​តាម​ផ្លូវ​តុលាការ។

ប៉ុន្តែសម្រាប់លោក មាជ សុវណ្ណារ៉ា សកម្មជនគណបក្សសង្គ្រោះជាតិ ដែលទើបនឹង ត្រូវបានដោះលែងរូបនេះវិញ បាន​ចាត់ទុក ការសម្រេចរបស់តុលាការ ថាជាការ«គុកដាក់មនុស្ស តែដាក់ចិត្ត និងបញ្ញាមិនបានទេ»។ លោក សុវណ្ណារ៉ា បាន​ថ្លែងឲ្យដឹងថា៖ «វប្បធម៌សន្ទនាមានហើយ តែនៅឡើយ ការឈ្លោះគ្នាដោយចំណេះ»។ លោកបានបង្ហាញថា អ្វីៗ​ទាំងអស់ ដែលលោកបាននឹងកំពុងធ្វើ លោកនឹងមិនខ្លាយឡើយ បើទោះបីនៅក្រៅគុក តែលោកខ្លាចតែអ្វីដែលធ្វើខុស គេចោទប្រកាន់ថាខុសប៉ុណ្ណោះ។ លោកនិយាយថា៖ «កុំគិតថា ចេញពីគុកខ្លាច ខ្លាចតែខុសទេបាទ។»

នាស្រុកមង្គលបូរី ខេត្តបន្ទាយមានជ័យ ដែលជាស្រុកកំណើតរបស់ខ្លួននោះ សកម្មជនរូបនេះ បានរំលឹកនូវបណ្តាំ​របស់​លោកតា សឺន សាន កាលពីលោកតា កាន់ជានាយករដ្ឋមន្រ្តីកម្ពុជា ក្នុងទសវត្សន៍ឆ្នាំ១៩៥០ជាង ថា «បើតំបន់ណាំតាង នៅស្រុកភ្នំស្រុកគ្មានការអភិវឌ្ឍន៍ និងមនុស្សគ្មានការចេះដឹងទេ ប្រទេសកម្ពុជាមិនទាន់ចាត់ទុកថា មានការអភិវឌ្ឍន៍​នោះ​ដែរ។»

លោកបានស្មើឲ្យបញ្ឈប់ នូវការគម្រាម ខាងផ្នែកស្មារតី និងនយោបាយ តាមរយៈបុគ្គលមានអំណាច ឬពីគណបក្ស​កាន់អំណាចបច្ចុប្បន្ន ហើយងាកមកទទួលយក នូវទ្រឹស្រ្តី«ពាររំងាប់ ដោយការមិនចងពារ»ទាំងអស់គ្នាឡើង។ លោក​បានថ្លែងឲ្យដឹងទៀតថា៖ «ប្រើប្រាស់នូវវប្បធម៌សន្ទនា និងបញ្ឈប់ការប្រើប្រាស់ នូវអំណាច (...) ដែលអាចនាំឲ្យ​ប្រទេស​របស់ខ្លួន ឈានទៅរករបបផ្តាច់ការ»៕