ជាថ្មីម្ដងទៀត គណបក្សប្រជាជនកម្ពុជា ដែលជាគណបក្សគ្រប់គ្រងអំណាច បានប្រកាសថាកិច្ចប្រជុំសភាក្នុងថ្ងៃដំបូង នឹង​ប្រព្រឹត្តទៅតាមធម្មតា ដោយមិនមានការពន្យាពេលនោះទេ បើទោះជាគណបក្សសង្រ្គោះជាតិ ដែលជាគណបក្សប្រឆាំង​មិន​ចូលរួមប្រជុំក៏ដោយ។

លោក ជាម យៀប ឡើងថ្លែងក្នុងសម័យកាលប្រជុំសភា ទី៩ កាលពីថ្ងៃសុក្រទី១៥ខែកុម្ភះកន្លងមក។ (រូបថត MONOROOM.info/ O. Vary)

មន្រ្តីជាន់ខ្ពស់គណបក្សប្រជាជនកម្ពុជាលោក ជាម យៀប ថ្លែងប្រាប់ទស្សនាវដ្តីមនោរម្យព័ងអាំងហ្វូនៅថ្ងៃទី១០ ខែកញ្ញា ឆ្នាំ២០១៣ នេះថា៖ «បើទោះជាមិនមានការចូលរួមពីគណបក្សសង្រ្គោះជាតិ ក៏គណបក្សប្រជាជនកម្ពុជា នៅតែអាច​ដំណើរការប្រជុំសភាបានដែរ។ រទេះនៅតែបរ ឆ្កែនៅតែព្រុស»។

លោក ជាម យៀប ពន្យល់ថានៅពេលដែលសភា មានសមាជិកចាប់ពី៦២ឬ៦៣ឡើងទៅ សភានឹងអាចដំណើរការប្រជុំ លើកដំបូងបាន នេះជាការកណត់នៅក្នុងច្បាប់រដ្ឋធម្មនុញបន្ថែម ដែលរដ្ឋសភាបានអនុម័តនៅឆ្នាំ២០០៤ ហើយក៏​ជាច្បាប់​ដែលផ្តួចផ្តើម ឲ្យធ្វើវិសោធនកម្មដោយ លោក សម រង្ស៊ី កាលពីនីតិកាលទី៣ នៃរដ្ឋសភា ដូចច្នេះគណបក្សប្រជាជនកម្ពុជា ធ្វើសេចក្តីសម្រេចស្របទៅតាមគោលការណ៍ច្បាប់។

គួរម្លឹកថាព្រះមហាក្សត្រកម្ពុជាព្រះបាទនរោត្តម សីហមុនី បានចេញព្រះរាជសារមួយចុះថ្ងៃទី៩ ខែកញ្ញា ឆ្នាំ២០១៣ ផ្ញើរជូន​លោក អ៊ឹម សួរស្តី ប្រធានគណៈកម្មាធិការជាតិរៀបចំការបោះឆ្នោត គ.ជ.ប ដោយបានគូសបញ្ជាក់ក្នុងព្រះរាជសារនោះថា ព្រះមហាក្សត្រទ្រង់នឹងកោះអញ្ជើញ បេក្ខជនជាប់ឆ្នោតទាំងអស់ មកចូលរួមប្រជុំដំបូងក្នុងវិមានរដ្ឋសភា នៅថ្ងៃទី២៣ ខែ​កញ្ញាខាងមុខ។

លោក ជាម យៀប អះអាងថាព្រះរាជសារព្រះមហាក្សត្រ ត្រូវបានផ្សព្វផ្សាយជាសាធារណៈ ដែលមានការដឹងលឺជាទូទៅ ហើយក៏ជាការកោះអញ្ជើញសមាជិកសភា របស់គណបក្សសង្រ្គោះជាតិផងដែរ ដូច្នេះប្រសិនបើពួកគេមិនចូលរួមប្រជុំ​សភា​លើកដំបូង មានន័យថាពួកគេមិនគោរពច្បាប់ និងព្រះមហាក្សត្រ។

ការបដិសេធមិនចូលរួមប្រជុំរបស់គណបក្សប្រឆាំង ទៅតាមការកោះប្រជុំរបស់ ព្រះមហាក្សត្រ ហើយត្រូវបានរង​ការចោទ​ប្រកាន់ ពីមន្រ្តីគណបក្សកាន់​អំណាចថាជាការ«ប្រមាថ»ព្រះមហាក្សត្រនោះ ត្រូវបានអនុប្រធានគណបក្សប្រឆាំង លោក កឹម សុខា បានបញ្ចេញប្រតិកម្មនៅក្នុងកម្មវិធីវិទ្យុអាស៊ីសេរី នៅយប់ថ្ងៃទី៩ កញ្ញា ថានោះជា «ការចោទប្រកាន់ដោយអគតិ ដោយគ្មានការពិចារណា នូវគោលបំណងរបស់ព្រះមហាក្សត្រ ដែលចង់បានភាពស្ងប់ស្ងៀមដោយថ្លៃថ្នូ»។ លោក កឹម សុខា បានវាយបកទៅវិញថា «គឺអ្នកណ្នឹងហើយ ដែលមិនគោរពព្រះមហាក្សត្រខ្លួនឯង»។

លោក សុក សំអឿន នាយកប្រតិបត្តិនៃក្រុមអ្នកច្បាប់ការពារសិទ្ធិកម្ពុជា ពន្យល់ថាគណបក្សប្រជាជនកម្ពុជា អាចបើកប្រជុំ​សភាលើកតំបូងបាន ប្រសិនបើពួកគេចង់ធ្វើ ទោះជាមានចំនួនសមាជិកសភា តែ១នាក់ឬ២នាក់ក៏ដោយ ហើយនាំគ្នាស្បថ​ចូលកាន់មុខដំណែងទៅ តែចំណុចសំខាន់គឺត្រង់ថាតើសភា និងរដ្ឋាភិបាលដែលកើតចេញពីកិច្ចប្រជុំសភាលើកដំបូងនោះ ស្របច្បាប់ឬអត់? ហើយអាចធ្វើសេចក្តីសម្រេចបានអត់? ហើយមានការទទួលស្គាល់ពីប្រជាពលរដ្ឋ និងគណបក្ស​នយោបាយ​ផ្សេងទៀតឬអត់។

ថ្លែងនៅក្នុងវេទិកាវិទ្យុអាស៊ីសេរី កាលពីយប់ថ្ងៃទី៩ខែកញ្ញាដដែល លោក សម រង្ស៊ី ប្រធានគណបក្សសង្គ្រោះជាតិ នៅតែ​ប្រកាន់គោលជំហរបដិសេធ មិនចូលរួមកិច្ចប្រជុំសភាលើកដំបូង ដរាបណាការបង្កើតគណៈកម្មការចម្រុះឯករាជ្យ ដើម្បី​ស៊ើបអង្កេតពីភាពមិនប្រក្រតី ក្នុងកំឡុងពេលបោះឆ្នោត មិនត្រូវបានបង្កើតតាមស្នើសុំរបស់គណបក្សសង្រ្គោះជាតិ ដើម្បី​ស្វែងរកយុត្តិធម៌ឲ្យរាស្ត្រម្ចាស់ឆ្នោត។ ប្រធានគណបក្សប្រឆាំង​រូបនេះ បានបញ្ជាក់ថា៖ «គោលការណ៍របស់យើង​នៅតែ​ដដែល គឺការគោរពឆន្ទះប្រជាពលរដ្ឋ។ (...) យើងនឹងពិចារណាចូលរួម ក្នុងកិច្ចប្រជុំសភាដំបូង ពេលណាដែលមាន​គណៈកម្មការឯករាជ្យ ឬមានយន្ដការមួយឯករាជ្យក្រៅពី គ.ជ.ប ដើម្បីស្វែងរកការពិត។ ការពិតគឺជាមូលដ្ឋាន ដើម្បីផ្ដល់​យុត្តិធម៌ជូនរាស្ត្រម្ចាស់ឆ្នោត៕»

-------------------------------------------------------
ដោយៈ អ៊ុំ បូរី - ភ្នំពេញថ្ងៃទី១០ ខែកញ្ញា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ