ការសាកល្បងដាក់ឲ្យរត់ ត្រូវបានធ្វើ កាលពីព្រឹកថ្ងៃអង្គារ (ពេលវេលាក្នុងស្រុក) ជាមួយនឹងបុគ្គលិកជំនាញ ជាច្រើន​នាក់។ អ្នកនាំពាក្យរបស់ក្រុមហ៊ុន Central Japan Railways បានថ្លែងឲ្យដឹងថា៖ «ល្បឿងរហូតដល់ ៦០៣ គីឡូម៉ែត្រ ក្នុង​មួយ​ម៉ោង​នេះ ត្រូវបានដាក់ឲ្យរត់ ក្នុងរយៈពេល ១០,៨វិនាទី នៅពេលដែលរថភ្លើង បានរត់កាត់រូងក្រោមដីមួយ»។ បើ​តាម​ល្បឿន​ដែល​បង្ហាញនេះ បញ្ជាក់ថា រថភ្លើងនេះ នឹងមានល្បឿន លឿនជាងគេ នៅក្នុងពិភពលោក។

ការសាកល្បង ត្រូវបានដាក់ធ្វើ នៅលើផ្លូវដែក ដែលសង់ឡើងយ៉ាងពិសេស និងមានចំងាយ ៤២,៨ គីឡូម៉ែត្រ នៅក្នុង​ខេត្ត យ៉ាម៉ាណាស្សី (Yamanashi) ភាគកណ្ដាល នៃប្រទេសជប៉ុន។ រថភ្លើង «maglev» ត្រូវបានសិក្សាស្រាវជ្រាវ និង​ផលិត នៅក្នុងខេត្តនេះ តាំងពីច្រើនឆ្នាំមកហើយ។

កាលពីក្នុងពេលសាកល្បងលើកមុន ល្បឿនបានឡើង ខ្ពស់បំផុត ត្រឹមតែ ៥៩០គីឡូម៉ែត្រ ក្នុងមួយម៉ោង។ ចំណែកឯ​ការ​សាកល្បង នៅថ្ងៃអង្ការនេះ បានសង្កត់ធ្ងន់ទៅលើ ការសាកល្បងនៃភាពនឹងនរ របស់រថភ្លើង ជាពិសេសនៅពេល​ដែល​ល្បឿន បានកើតឡើងខ្លាំងជាងល្បឿន ៥០០ គីឡូម៉ែត្រ ក្នុងមួយម៉ោង ដែលត្រៀមដាក់ ឲ្យមានដំណើរការ ជាផ្លូវការ។

ក្រុមហ៊ុនឯកទេសខាងផ្លូវដែក របស់ជប៉ុនមួយនេះ កំពុងសង់ផ្លូវដែកមួយ ដែលភ្ជាប់រាជធានី តូក្យូ មកក្រុង ណាហ្គោយ៉ា (Nagoya) ដែលមានចំងាយ ប្រមាណជា២៨៦ គីឡូម៉ែត្រ។ នៅក្នុងចំងាយនេះ រថភ្លើងល្បឿនលឿននេះ នឹងប្រើពេល តែ​៤០នាទី​ប៉ុណ្ណោះ។

ក្រុមហ៊ុននេះ គ្រោងនឹងចំណាយប្រាក់ ប្រមាណជាង ៥០ពាន់លានដុល្លារទៀត ដើម្បីសង់ផ្លូវដែក តួរថភ្លើង និងការ​សាក​ល្បង ភ្ជាប់ពីរាជធានី មកកាន់ក្រុងឧស្សាហកម្មមួយ ដែលមានរោងចក្រ ផលិតរថយន្ដ តូយ៉ូតា មុននឹងបន្តគម្រោងនេះ រហូត​ដល់ខេត្ត អូសាកា (Osaka) ភាគខាងលិចប្រទេសជប៉ុន។ ជាមួយនឹងខ្សែររថភ្លើងថ្មី ដែលមានឈ្មោះ «Linear chuo Shinkansen» នេះ បណ្ដាជនជប៉ុននឹងប្រើពេល ត្រឹមតែ១ម៉ោងប៉ុណ្ណោះ ពីភាគខាងលិចប្រទេស មកកាន់រាជធានី ដែល​ពី​មុន​មក គេត្រូវប្រើពេល រហូតដល់២ម៉ោង ជាមួយរថភ្លើងល្បឿនលឿន សព្វថ្ងៃ៕

» វីដេអូផ្សេងទៀត នៃរថភ្លើងល្បឿនលឿន ដែលកំពុងដំណើរការ សព្វថ្ងៃ របស់ជប៉ុន និងបារាំង៖