បញ្ហាកកស្ទះចរាចរណ៍ ក្នុងរាជធានីភ្នំពេញ នៅតែបន្ត ដោយសារចំនួនពលរដ្ឋ និងចំនួនយានជំនិះ ចេះតែ​មានការកើនឡើងជាលំដាប់ ពីមួយឆ្នាំ ទៅមួយឆ្នាំ។ តាមរបាយការណ៍ ចំនួនអ្នកធ្វើដំណើរ តាមរយៈ​សេវា​រថយន្ដក្រុង របស់សាលារាជធានីភ្នំពេញ ដែលគិតត្រឹមតែមួយថ្ងៃ គឹថ្ងៃទី៣១ ខែតុលា កាលពីឆ្នាំ២០១៤ កន្លង​ទៅ មានអ្នកដំណើរសរុបចំនួន៥,៥២៩នាក់ ក្នុងនោះប្រភេទអ្នកដំណើរបង់ប្រាក់ មានចំនួន ៣,៥២៤​នាក់ និងអ្នកដំណើរមិនបង់ប្រាក់ មានចំនួន ២,០០៥នាក់។

ដោយឡែក នៅឆ្នាំ២០១៥ គឹនៅថ្ងៃទី៣១ ខែតុលានេះ (ថ្ងៃតែមួយ នៅមួយឆ្នាំក្រោយមក) មានអ្នក​ដំណើរ​សរុប ៦,១១៣នាក់ ក្នុងនោះប្រភេទអ្នកដំណើរ មិនបង់ប្រាក់ មានចំនួន២,១៧១នាក់ និងប្រភេទ​អ្នក​ដំណើរ​បង់ប្រាក់ មានចំនួន៣,៩៤២នាក់។ អ្នកដំណើរដូចជា ព្រះសង្ឃ ជនពិការ ចាស់ជរា កុមារ និងសិស្ស និស្សិត​ជាដើម មិនត្រូវបានគិតប្រាក់នោះទេ។

របាយការណ៍ខាងលើ ធ្វើឡើងជាមួយនឹងរថយន្ដក្រុង ទាំង៥០គ្រឿង ដែលសាលារាជធានីបានដាក់ ឲ្យ​ដំណើរ​ការដឹកអ្នកដំណើរ នៅក្នុងរាជធានីភ្នំពេញ ដោយមានផ្លូវធ្វើដំណើរ ចំនួនបីខ្សែ ដើម្បីរំដោះការ​កក​ស្ទះ​ចរាចរណ៍។

តែបើទោះជាទិន្នន័យ ក្នុងថ្ងៃតែមួយ ពីឆ្នាំមុន មកឆ្នាំ២០១៥ បានកើនឡើងក៏ដោយ ក៏ការព្រួយបារម្ភ​ពី​បញ្ហា​កកស្ទះចរាចរណ៍ នៅក្នុងរាជធានីមួយនេះ នៅតែមាន។ ដោយសារមូលហេតុ ឈានទៅកាត់បន្ថយ​ការកក​ស្ទះនេះហើយ ទើបកាលពីពេលថ្មីៗនេះ សាលារាជធានីភ្នំពេញ កំពុងរៀបចំគម្រោង ដើម្បីស្នើសុំរថយន្ត​ក្រុង​ថ្មី ចំនួន១៥០គ្រឿង ពីប្រទេសជប៉ុន និង១០០គ្រឿង ពីប្រទេសចិន ដើម្បីដាក់ឲ្យដំណើរការបន្ថែមទៀត។

អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ បានមានប្រសាសន៍ ឲ្យដឹងថា៖ «ប្រសិនបើ​សាលា​រាជធានីភ្នំពេញ នឹងទទួលបានរថយន្តក្រុង ចំនួន២៥០គ្រឿងបន្ថែមទៀត តាមការគ្រោងទុកនោះ ភ្នំពេញ​អាចពង្រីកជើងធ្វើដំណើរ រហូតដល់ទៅ១០ខ្សែ»៕