មិនមែន ឲ្យតែមាន«បំពង់បង្ហូទឹក»មួយ គេអាចកាន់បំពង់នេះ ទៅបាញ់ត្រង់ណា ក៏បាននោះទេ។ ហើយ​ដើម្បី​ឲ្យម្ចាស់«បំពង់បង្ហូទឹក»ទាំងនោះដឹងខ្លួន សាលាខណ្ឌដូនពេញ នៃរាជធានីភ្នំពេញ បានបង្កើតបែបបទ នៃ​ការ​ពិន័យមួយ យ៉ាងពិសេស នោះគឺបង្ខំឲ្យអ្នក ដែលបង្ហូទឹកនោមរបស់ខ្លួន តែពាសទាំងនោះ ទៅដងទឹក​ចំនួន​២០ធុង«ស្ពេត្រូ»ក្នុងម្នាក់ៗ យកមកលាងសំអាត កន្លែងដែលខ្លួន បន្ទោរបង់«តូច»នោះចេញ។

កន្លែងដែលត្រូវលាងសំអាតនោះ គឺខឿនជញ្ជាំង នៅមុខវេទិកាបុណ្យអ៊ុំទូក ខាងមុខព្រះបរមរាជវាំង។ ការ​ពិន័យបានតម្រូវ ឲ្យអ្នកទាំងនោះធ្វើ ដោយហេតុថាជនទាំងនោះ មិនស្តាប់ការណែនាំរបស់ប្រជាការពារ ប្រចាំ​នៅទីនោះ ហើយនៅតែបន្តនោម ដាក់វេទិកាអ៊ុំទូកមិនឈប់។ នេះបើតាមសេចក្ដីរាយការណ៍ របស់ទំព័រ​ហ្វេសប៊ុក​របស់​សាលាខណ្ឌដូនពេញ កាលពីដើមសប្ដាហ៍នេះ។

ក្រោយពីការព្រមាន ឲ្យដងទឹកពីទន្លេ មកចាក់លាងកន្លែង ដែលមានកក្លិនមិនល្អម្នាក់២០ធុងស្ពេត្រូ  មក​លាង​នៅមុខ​វេទិកា បុណ្យអ៊ុំទូករួច សាលាខណ្ឌដូនពេញ បានទាំងថតរូបអ្នកទាំងនោះ ផ្សាយនៅលើទំព័រ​ហ្វេសប៊ុក របស់ខ្លួនថែមទៀតផង ដោយសរសេរអមថា៖ «នេះជាការពិន័យមួយ ដើម្បីកុំឲ្យបងប្អូន នៅ​គឃ្លើន​តទៅទៀត។ សូមបងប្អូនដ៏ទៃទៀត កុំយកគំរូតាមពួកគាត់។» ការអនុវត្តន៍ខាងលើ បានធ្វើឡើង​នៅ​យប់​ថ្ងៃទី៣១ ខែតុលា និងថ្ងៃទី០១ ខែវិច្ឆិកា ឆ្នាំ២០១៥ កន្លងទៅនេះ។

ប៉ុន្តែការបង្ហោះរូបភាព និងការពិន័យនេះ ត្រូវបានក្រុមអ្នកប្រើប្រាស់​បណ្ដាញសង្គម​មួយចំនួន ធ្វើការរិះគន់ថា បើសាលារាជធានីបង្កើត​នូវបន្ទប់ទឹក​សាធារណៈ ដែលមានលក្ខណៈបើកទូលាយ នៅទីនោះ ម្លេះក្រុមអ្នក​កាន់​បំពង់​បង្ហូទឹកនោមទាំងនេះ មិនមកឈរនៅកណ្ដាលវាល បាញ់ដាក់ជញ្ជាំង​វេទិកាបុណ្យអ៊ុំទូកដូច្នេះ​ឡើយ៕