«មេត្តានាំឪពុកខ្ញុំ ឲ្យត្រឡប់មកផ្ទះវិញទាន់ពេលវេលាផង»
- ដោយ: សេក មនោរកុមារ អត្ថបទ៖ សេក មនោរកុមារ ([email protected]) - ប៉ារីស ថ្ងៃទី២៣ មករា ២០១៥
- កែប្រែចុងក្រោយ: January 24, 2015
- ប្រធានបទ: ជីវិត
- អត្ថបទ: មានបញ្ហា?
- មតិ-យោបល់
-
នាងតូចមិនសប្បាយចិត្តប៉ុន្មានទេ នៅពេលដែលនាង បានចូលទៅគេងជារៀងរាល់យប់ ដោយមិនមានវត្តមាននៃឪពុករបស់នាង ស្ថិតនៅក្បែរ។ នាងសម្ដែងការមិនសប្បាយចិត្ត ព្រោះនាងចង់បានឲ្យឪពុករបស់នាង ថ្នាក់ថ្នមនាងយ៉ាងហោចណាស់ ក៏មួយដងដែរនៅមុនពេលចូលគេង។ ដោយសារតែហេតុនេះហើយ ទើបនាងសម្រេចចិត្តធ្វើប្រតិកម្ម ដោយសរសេរជាញត្តិតវ៉ាមួយឡើង សំដៅក្រុមហ៊ុនគ្រប់គ្រងផ្លូវដែក និងរថភ្លើង របស់ប្រទេសអង់គ្លេស ដែលជាមធ្យោបាយដឹកជញ្ជូនប្រើប្រាស់ជាប្រចាំ ដោយឪពុករបស់នាង។
«សូមគោរពមកលោក ដែលជាអ្នកគ្រប់គ្រងផ្លូវដែក និងរថភ្លើងជាទីគោរព, ឪពុករបស់ខ្ញុំតែងតែត្រឡប់មកដល់ផ្ទះវិញយឺតជានិច្ច នៅពេលយប់ឡើង ហើយខ្ញុំនឹកគាត់ខ្លាំងណាស់ ព្រោះមានតែគាត់ទេ ដែលនៅជិត និងថ្នាក់ថ្នមខ្ញុំ។ រឿងនេះ ធ្វើឲ្យខ្ញុំពិបាកចិត្តជាខ្លាំង។ សូមអ្នកឯង មេត្តានាំឪពុកខ្ញុំ ឲ្យត្រឡប់មកផ្ទះវិញ ទាន់ពេលវេលាផង។ ឪពុកខ្ញុំនិយាយថា អ្នកឯងបានយកប្រាក់ពីគាត់អស់រលីងហើយ អញ្ចឹងហើយ បានជាខ្ញុំមិនអាចទៅលេង ឌីស្នេឡេន (Disneyland) បាន។ ខ្ញុំចង់ទៅលេង ឌីស្នេឡេន ខ្លាំងណាស់។ ពីនាងខ្ញុំ អែឡា (Ella) អាយុ៦ឆ្នាំ។»
ខាងលើនេះ ជាខ្លឹមសារទាំងស្រុង នៃញត្តិសរសេរដោយដៃ របស់នាងតូច អែឡា ដែលពន្យល់ថា នាងតូចមានការធុញទ្រាន់ រហូតទ្រាំលែងបាន ពីការវិលត្រឡប់ចូលផ្ទះយឺតពេលរបស់ឪពុកនាង។ លិខិតនេះ ត្រូវបានបុរសជាឪពុក យកទៅបង្ហោះផ្សាយនៅលើបណ្ដាញសង្គម រួចត្រូវបានក្រុមអ្នកប្រើប្រាស់ យកទៅចែករំលែកតៗគ្នាយ៉ាងសន្ធឹកសន្ធាប់។
សារព័ត៌មានតេឡេហ្គ្រាហ្វ (Telegraph) របស់អង់គ្លេស បានរាយការណ៍ថា បុរសជាឪពុកបានចំណាយប្រាក់ប្រមាណជា៤០០០ផោន (ប្រមាណជាង៥០០០អ៊ឺរ៉ូ ឬជិត ៦០០០ដុល្លាអាមេរិក) ក្នុងមួយឆ្នាំៗ។ ការចំណាយនេះ វាដូចជាមិនសមាមាត្រទៅនឹងចំនួនរថភ្លើង ដែលមានដំណើរយឺតយ៉ាវ ឬក៏ចំនួនរថភ្លើងដែលត្រូវបានលប់ចោល ដោយមិនបានជូនដំណឹងទុកជាមុន។
ភាពរយីករយាកនៃដំណើរការរបស់ប្រព័ន្ធផ្លូវដែក ដែលភ្ជាប់រវាងលំនៅដ្ឋាន និងកន្លែងធ្វើការរបស់បុរសនេះ បានបង្កឲ្យនាងតូច អែនឡា ក្ដៅក្រហាយ ជាពិសេស នៅរៀងរាល់ពេលរាត្រី ព្រោះជាធម្មតា ឪពុករបស់នាងត្រូវចូលមកថើបនាងមួយខ្សឺត មុននឹងនាងតូចបិទភ្នែកគេង៕
