សេចក្តីថ្លែងការណ៍​ដែល​ចេញ​ប្រកាស​កាល​ពី​ថ្ងៃ​ទី៦ មករា របស់​រណៈសិរ្យ​រំដោះ​ជាតិខ្មែរ ដែល​មាន​ទីតាំង​ក្នុង​ប្រទេស​ដាណឺម៉ាក បាន​សរសេរ​​​ជា​អាថ៌​ថា ថ្ងៃ​៧មករា វៀតណាម​បាន​បន្ត​សម្លាប់ និង​រឹប​អូស​យក​ទ្រព្យ​របស់​កម្ពុជា មិន​មែន​ជា​ថ្ងៃ​រំដោះ​ជាតិ​ខ្មែរ ដូច​អ្វី​ដែល​លោក​នាយក​រដ្ឋ​មន្រ្តី ហ៊ុន សែន បាន​ថ្លែង​កាល​ពី​ថ្ងៃ​ទី​៥ មករា ២០១៥ នោះ​ទេ។

សេចក្តី​ថ្លែង​ការណ៍​ដដែល​បាន​សរសេរ​បន្ត​ថា៖ «តាម​ពិត​របប​ផ្តាច់ការ លោក ហ៊ុន សែន ទៅ​វិញ​ទេ ដែល​ជា​របប​ប៉ុលពត​ទី​២ ពី​ព្រោះ​ថា​ប្រជា​ពលរដ្ឋ​ខ្មែរ នៅ​តែ​បន្ត​រង​គ្រោះ​ក្រោម​ការ​ដឹកនាំ​ក្នុង​របប​លោក ហ៊ុន សែន រយៈ​ពេល​៥​ឆ្នាំ​ចុង​ក្រោយ​នេះ ជាក់​ស្តែង​ប្រជា​ពលរដ្ឋ​ខ្មែរ ត្រូវ​បាន​គេ​សម្លាប់​តាម​គ្រប់​រូបភាព (បាញ់​សម្លាប់ គប់​គ្រាប់​បែក ថ្នាំ​ពុល និង​គ្រោះ​ថ្នាក់​ចរាចរណ៍)»។

រណសិរ្សរំដោះជាតិខ្មែរបានបរិហារលោកនាយករដ្ឋមន្រ្តី ហុន សែន ទៀតថា បុរសខ្លាំងកាន់អំណាច​៣០ឆ្នាំ​មកនេះ ធ្លាប់បានធ្វើជាយោធាខ្មែរក្រហម ចូលព្រៃម៉ាគីជាមួយយៀកកុង តាមការអំពាវនាវរបស់អតីត​ព្រះ​មហាក្សត្រ ព្រះបាទនរោត្តម សីហនុ។ ជាពិសេសលោក នាយករដ្ឋមន្ត្រី ហ៊ុន សែន បានជ្រៀតជ្រែកក្នុង​តុលាការ​កាត់ទោសខ្មែរក្រហម ដោយមិនអនុញ្ញាតឱ្យតុលាការកាត់ទោសមេដឹកនាំខ្មែរក្រហមបន្តទៀត។

ក្នុងពិធីបើកការដ្ឋានសាងសង់អគាររដ្ឋបាលសាលាខេត្តត្បូងឃ្មុំ កាលពីព្រឹកថ្ងៃទី៥ ខែមករា ឆ្នាំ២០១៥ លោក ហ៊ុន សែន បានថ្លែងថា អ្នកដែលប្រឆាំងនឹង៧មករា គឺជាអ្នកដែលមានសម្ពន្ធ័ភាពជាមួយខ្មែរក្រហម។ លោក​នាយករដ្ឋមន្រ្តីថ្លែងការពារថ្ងៃ៧មករា បន្តថា ជាថ្ងៃរំដោះជាតិកម្ពុជាចេញពីការរបបកាប់សម្លាប់របស់ ប៉ុល ពត។ លោកថា បើគ្មាន៧ មករាទេ កម្ពុជាក៏គ្មានសន្តិភាពដូចបច្ចុប្បន្ននេះដែរ។

ថ្ងៃទី ៧ មករា ជាថ្ងៃដែលកងទព័វៀតណាម និងគណបក្សប្រជាជនកម្ពុជា បានដេញកងទ័ពខ្មែរក្រហមចេញ​ពីទីក្រុងភ្នំពេញ និងប្រកាសជ័យជំនះលើកងទ័ព ខ្មែរក្រហម ដែលប្រជាជនកម្ពុជានិងអន្តរជាតិទទួល​ស្គាល់​ថា​ជារបបប្រលយ័ពូជសាសន៍។ ជារៀងរាល់ឆ្នាំ ថ្ងៃ៧មករា ត្រូវបានគណបក្សប្រជាជនកម្ពុជាតែងនាំគ្នាប្រារព្ធ​ពិធី​រំលឹកខួប និងដឹងគុណ។ គណបក្សប្រជាជនកម្ពុជាបានចាត់ទុកជ័យជំនះ ៧ មករា ឆ្នាំ១៩៧៩ ថាបានធ្វើឱ្យ​ប្រជាជនកម្ពុជា មានអ្វីៗនៅថ្ងៃនេះ និងមានហេដ្ឋារចនាសម្ព័ន្ធដ៏ត្រចះត្រចង់។ ថ្ងៃ៧មករា ក៏ឧបករណ៍មួយ​សម្រាប់​ការឃោសនា របស់បក្សកាន់អំណាច នៅក្នុងការបោះឆ្នោតម្តងៗផងដែរ៕