សាយ សំអាល់៖ អស់ប្រាំលានដុល្លារ ភ្នំពេញនឹងលែងលិចទឹកទៀតហើយ!
- ដោយ: អ៊ុម វ៉ារី អត្ថបទ៖ អ៊ុម វ៉ារី ([email protected]) - យកការណ៍៖ ស្រ៊ុន ទិត្យ- ភ្នំពេញថ្ងៃទី០៦ មករា ២០១៤
- កែប្រែចុងក្រោយ: January 07, 2015
- ប្រធានបទ: លិចទឹក
- អត្ថបទ: មានបញ្ហា?
- មតិ-យោបល់
-
រដ្ឋមន្ត្រីក្រសួងបរិស្ថាន លោក សាយ សំអាល់ បានថ្លែងឡើងថា លោក និងក្រសួងរបស់លោក កំពុងធ្វើការជាមួយភាគីពាក់ព័ន្ធ ក្នុងការសិក្សាពីការស្ថាបនាប្រព័ន្ធប្រឡាយទឹក ប្រព័ន្ធលូ និងទឹកសម្អុយ ដើម្បីរំដោះទឹកលិចនៅរាជធានីភ្នំពេញ។ ការថ្លែងរបស់លោករដ្ឋមន្ត្រី បានធ្វើឡើង ក្នុងសន្និសីទសារព័ត៌មាន នាទីស្ដីការក្រសួងបរិស្ថាន កាលពីព្រឹកថ្ងៃទី៦ ខែមករា កន្លងទៅនេះ។
ក្នុងនាមជារដ្ឋមន្រ្តីវ័យក្មេង នឹងទើបឡើងកាន់ដំណែងនោះ លោកបានត្អូញឡើងថា ការងារដែលលោកបាននឹងកំពុងពិភាក្សា និងអនុវត្ត លើប្រព័ន្ធប្រឡាយទឹក ប្រព័ន្ធលូ និងទឹកសម្អុយនេះ វាជាការងារមួយដែលធំនិងពិបាក។ លោកបានថ្លែងថា «យើងសិក្សាមើលថា តើយើងត្រូវធ្វើប្រឡាយរំដោះទឹករបៀបម៉េច ដើម្បីកុំឲ្យមានការលិចទឹកនៅភ្នំពេញទៀត។ នេះជាការងារធំ ហើយក៏មានភាពលំបាកដែរ។ ព្រោះការងារធ្វើប្រឡាយទឹក និងប្រព័ន្ធលូដែលមាននៅទីក្រុងភ្នំពេញ យើងមិនធ្វើសម្រាប់តែថ្ងៃស្អែកទេ។ យើងត្រូវប្រមើល តើស្ថានភាព៣០ឆ្នាំទៅមុខទៀត ទីក្រុងភ្នំពេញរីកទៅប៉ុណ្ណា តើចំនួនប្រជាជននឹងកើនយ៉ាងដូចម៉េច?»
កាលពីថ្មីនេះនេះ លោកនាយករដ្ឋមន្រ្តី ហ៊ុន សែន បានស្នើអង្វរចិត្ត ប្រជាពលរដ្ឋ ដែលរងការលិចលង់ទឹកក្នុងទីក្រុងទាំងអស់ថា ឲ្យមានការងត់ធ្មត់ និងទ្រំទ្រនូវបញ្ហានេះឲ្យបាន។ លោកបាននឹងកំពុងព្យាយាមដោះស្រាយជូនជាបណ្តើរហើយ។
ប៉ុន្តែបញ្ហាទឹកជំនន់ក្នុងរាជធានីនេះ ត្រូវបានប្រជាពលរដ្ឋមួយចំនូនបរិហាថា ដោយសារតែអាជ្ញាធររដ្ឋាភិបាល បានលុប និងលក់បឹងដែលធ្លាប់តែស្តុកទឹក ទើបបណ្តាលឲ្យលិចលក់ស្ទើរតែទាំងរាជធានីនោះ។ ចំណែកអ្នកប្រើប្រាស់បណ្ដាញសង្គមវិញ បានរិះគន់យ៉ាងចាស់ដៃ ទៅលើភាពល្បីល្បាញថ្មី ខាងសម្បូរបឹងពេលភ្លៀងធ្លាក់ របស់រាជធានីគុជនេះ ដោយនិយាយបញ្ឆិតបញ្ឆៀងឲ្យថា ព្រោះរាជធានីនេះ ត្រូវបានសាងសង់ឡើងក្នុងតំបន់អូ និងបឹងភាគច្រើន មានដូចជាអូឬស្សី អូបែកក្អម អូឡាំពិក បឹងត្របែក បឹងកក់ជាដើម។
ការលើកឡើង ទាក់ទងនឹងការលប់បឹងខាងលើ ត្រូវបានលោក សាយ សំអាល់ បដិសេធថា មិនមានពាក់ព័ន្ធនឹងបញ្ហានេះទេ។ លោកបានបញ្ជាក់ផ្ទុយពីនេះថា ដោយសារតែចំនួនទឹកភ្លៀង និងទំហំនៃលូរចាស់មិនសមាមាត្រគ្នា។លូមួយចំនួនបានស្រុតបាក់បែក តែវាមិនស្រុតខ្លាំងទេ ស្រុតតែបន្តិចបន្តួចប៉ុណ្ណោះ។ លោកបន្តថា «ដោយសារយើងមិនបានធ្វើលូបន្ថែម សម្រាប់រំដោះទឹកភ្លៀងនោះ ទើបបានវាលិចលង់ដូចសព្វថ្ងៃ»៕