សាឡាង​ដ៏​ធំ​មួយ ឆេះ​កណ្ដាល​សមុទ្រ រវាង​ពី​ប្រទេស​ក្រិច​មក​អ៊ីតាលី

គ្រោះអគ្កិភ័យឆេះសាឡាងនេះ បណ្ដាលឲ្យអ្នកដំណើរជាតិក្រិចម្នាក់ស្លាប់។ ក្រុមហ៊ុនអាណិច (Anek) ដែល​ធ្វើ​អាជីវកម្ម​លើ​សាឡាង បានអះអាងថា ស្ថានភាពអាសន្នរបស់សាឡាង ត្រូវបានគ្រប់គ្រងទាំងស្រុង នៅម៉ោង៨កន្លះ (ម៉ោងក្នុងស្រុក) យប់​ថ្ងៃ​ទី២៨ ខែធ្នូនេះ។
Loading...
  • ដោយ: សេក មនោរកុមារ អត្ថបទ៖ សេក មនោរកុមារ ([email protected]) - ប៉ារីស​ ថ្ងៃទី២៨ ធ្នូ ២០១៤
  • កែប្រែចុងក្រោយ: December 28, 2014
  • ប្រធានបទ: គ្រោះនាវា
  • អត្ថបទ: មានបញ្ហា?
  • មតិ-យោបល់

ឆ្នាំ២០១៤ បាន​បញ្ចប់​ទៅ​ដោយ​ទំព័រ​គ្រោះថ្នាក់​ដ៏​ខ្មៅ​ងងឹត ពាស​ពេញ​ទាំង​ពិភពលោក។ ប្រសិន​បើ​នៅ​អាស៊ី​អាគ្នេយ៍ មាន​គ្រោះ​បាត់​យន្ដហោះ​ទើប​នឹង​កើត​ឡើង​ទៀត ទៅ​លើ​ក្រុមហ៊ុន​អាកាសចរណ៍​លក់​សំបុត្រ​ថោក អ៊ែរអេសៀ (AirAsia) តែ​នៅ​ទ្វីប​អ៊ឺរ៉ុប​ឯ​ណេះ​ មាន​គ្រោះ​ថ្នាក់​អគ្គិភ័យ​មួយ​បាន​កើត​ឡើង​ដែរ ទៅ​លើ​សាឡាង​ចម្លង​ដែល​ធ្វើ​ដំណើរ​ចេញ​ពី​ក្រុង ប៉ាត្រាស (Patras) ប្រទេស​ក្រិច ឆ្ពោះ​មក​ទី​ក្រុង អង់គូន (Ancône) ប្រទេស​អ៊ីតាលី។

ទីភ្នាក់ងារ​សារព័ត៌មាន​របស់​ប្រទេស​ក្រិច ANA បាន​ប្រកាស​ដំណឹង​ថា៖ «មាន​នៅ​សល់​តែ​ផ្សែង​ប៉ុណ្ណោះ។ ហើយ​ការ​ព្យាយាម​ចូល​ទៅ​ជិត​សាឡាង​ឈ្មោះ ន័រម៉ង់ អាត្លង់ទិក (Norman Atlantic) របស់​នាវា​ផ្សេង​ទៀត កំពុង​ប្រព្រឹត្តិ​ទៅ​សារ​ជា​ថ្មី ដើម្បី​ជួយ​សង្គ្រោះ​អ្នក​ដំណើរ​ដែល​នៅ​សេស​សល់ ដោយ​មធ្យោបាយ​ដាក់​ជណ្ដើរ​ខ្សែរ។»

ក្រុមហ៊ុន អាណិច របស់ប្រទេសកិច្ច ដែលជួលសាឡាងនេះ ពីក្រុមហ៊ុនមួយទៀតនៅប្រទេសអ៊ីតាលី បាន​អះអាងថា ប្រតិបត្តិការអូសសាឡាងឲ្យចូលច្រាំង ត្រូវបានចាប់ផ្ដើមធ្វើ តែបានផ្អាកទៅវិញ ដោយ«ខ្សែរអូស​បានដាច់»។

រហូតមកដល់យប់នេះ នៅសល់អ្នកដំណើរប្រមាណជា១៦៧នាក់ទៀត ពីក្នុងចំណោម៤៧៨នាក់ ដែលត្រូវ​ជួយសង្គ្រោះយកចេញពីនាវា។ ប៉ុន្តែយុទ្ធនាការជួយសង្គ្រោះនេះ នៅមិនទាន់ត្រូវបានអះអាងថា មានសភាព​បែប​ណានៅឡើយ។ ក្រុមហ៊ុនបានបញ្ជាក់ទៀតថា អាជ្ញាធរប្រទេសអ៊ីតាលី ទទូចសុំអូសសាឡាងនេះ មក​ចូលច្រាំងដែលនៅជិតបំផុត នៅលើទឹកដីរបស់ខ្លួន ខណៈសាឡាងស្ថិតនៅក្បែរច្រាំង របស់ប្រទេស​អាល់បានី​ជាង។

បើតាមក្រុមហ៊ុនម្ចាស់សាឡាង បាននិយាយថា នាវាទើបនឹងឆ្លងកាត់ការត្រួតពិនិត្យសុវត្ថភាព ប្រកបដោយ​ជោគជ័យ កាលពីថ្ងៃទី១៩ ខែធ្នូកន្លង​មកនេះ។ ប្រធានក្រុមហ៊ុន លោក កាឡូ វីសេនទីនី (Carlo Visentini) បានថ្លែងប្រាប់បណ្ដាញសារព័ត៌មានអ៊ីតាលីថា នៅពេលត្រួតពិនិត្យនោះ ក្រៅតែពីទ្វាការពារអគ្គិភ័យ​មួយ​បាន​ខូច ហើយត្រូវបានជួសជុលជាបន្ទាន់នោះ សាឡាងមិនមានសភាពគួរឲ្យព្រួយបារម្ភនោះទេ។

សាឡាង ន័រម៉ង់អាត្លង់ទីក បានបញ្ជូនសារប្រកាសអាសន្ន នៅវេលាម៉ោងជាង ៩ ម៉ោងក្នុងស្រុក បន្ទាប់ពីបាន​ចេញដំណើរពីកំពង់ផែក្រុង ប៉ាត្រាស នៅម៉ោង៥កន្លះព្រហាម ព្រឹកថ្ងៃ​អាទិត្យនេះ។ នៅពេលវាបានមក​ដល់ ច្រក គ័រហ្វូ (Corfou) រវាងប្រទេសអ៊ីតាលី និងប្រទេសអាល់បានី ភ្លើងបានឆាបឆេះឡើង ចេញពី​កន្លែង​មួយ ​ដែលផ្ទុកទៅដោយរថយន្ដប្រមាណជា២០០គ្រឿង។ ប៉ុន្តែជាមួយនឹងកម្លាំងខ្យល់សមុទ្រ ដែលខ្លាំង​នោះ​ផង​ ការឆាបឆេះបានរាលដាលយ៉ាងសន្ធោសន្ធៅ ទៅដល់តួសាឡាងទាំងមូលតែម្ដង៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...