នាយកក្រុមហ៊ុន AirAsia៖ សូមបន់ស្រន់ ជូនអ្នកនៅលើយន្ដហោះបាត់ខ្លួន
- ដោយ: សេក មនោរកុមារ អត្ថបទ៖ សេក មនោរកុមារ ([email protected]) - ប៉ារីស ថ្ងៃទី២៨ ធ្នូ ២០១៤
- កែប្រែចុងក្រោយ: December 28, 2014
- ប្រធានបទ: គ្រោះអាកាស
- អត្ថបទ: មានបញ្ហា?
- មតិ-យោបល់
-
ភ្លាមៗបន្ទាប់ពីដំណឹងបាត់យន្ដហោះ បានធ្លាក់ចុះមកជាអកុសល គ្រប់ដណ្ដប់ទៅលើក្រុមហ៊ុនអាកាសចរណ៍លក់សំបុត្រថោករបស់ខ្លួនរួច លោក តូនី ហ្វែណង់ដេស អគ្គនាយកក្រុមហ៊ុន អ៊ែរអេសៀ បានចេញមកសម្ដែងសមានចិត្តដ៏ជ្រាលជ្រៅ ទៅកាន់អ្នកដំណើរនិងអ្នកបម្រើការទាំងអស់ នៅលើយន្ដហោះ តាមរយៈពេលទំព័រទ្វីសធើរផ្លូវការរបស់លោក។ លោកបានសរសេរជាដំបូងថា «សូមអរគុណចំពោះការបន់ស្រន់របស់អ្នករាល់គ្នា។ តែយើងត្រូវរឹងប៉ឹងទាំងអស់គ្នាឡើង។»
ហេតុការណ៍ដ៏អាក្រក់បានកើតឡើង ទៅលើក្រុមហ៊ុនដែលកំពុងមានប្រជាប្រិយភាព របស់ប្រទេសម៉ាឡេស៊ី៖ យន្ដហោះធុនអ៊ែរប៊ូស ៣២០-២០០ (Airbus 320-200) ដែលបានភ្ជាប់ជើងហោះហើរលេខ QZ8501 បានបាត់ពីការត្រួតពិនិត្យដែនអាកាស ខណៈយន្ដហោះបានហោះមកដល់លំហរសមុទ្រហ្សាវ៉ា (Java) ចេញពីក្រុង ស៊ូរ៉ាប៉ាយ៉ា (Surabaya) ប្រទេសឥណ្ឌូនេស៊ី ឆ្ពោះមកកាន់ប្រទេសសាំងហ្គាពួរ។ លោក តូនី បានសរសេរបន្តទៀតថា៖ «អ្វីដែលខ្ញុំគិតនៅពេលនេះ មានតែអ្នកដំណើរ និងអ្នកបម្រើការលើយន្ដហោះទាំងអស់របស់ខ្ញុំ»។
អគ្គនាយករូបនេះ បានចេញធ្វើដំណើរភ្លាម នៅថ្ងៃទី២៨ ខែធ្នូនេះ ទៅកាន់ព្រលានយន្ដហោះអន្តរជាតិក្រុង ស៊ូរ៉ាបាយ៉ា (Surabaya) ទីកន្លែងដែលយន្ដហោះ QZ8501 របស់ក្រុមហ៊ុនលោក បានងើបខ្លួនហោះឡើង។ លោកបានជួបជាមួយក្រុមគ្រួសាររបស់អ្នកដំណើរ ហើយបានថ្លែងទៅកាន់ពួកគេថា៖ «ជាការតក់ស្លុតមួយដ៏ធំសម្រាប់យើង ហើយយើងមានអារម្មណ៍រន្ធត់ណាស់ នឹងអ្វីដែលបានកើតឡើង។ វាជារឿងដែលមិនអាចឲ្យជឿទាល់តែសោះ។»
លោក តូនី ហ្វែណង់ដេស ជានរណា?
សេដ្ឋីជនជាតិម៉ាឡេសី លោក ហ្វែណង់ដេស បានទិញក្រុមហ៊ុនអ៊ែរអេសៀ នៅឆ្នាំ២០០១ ខណៈពេលដែលក្រុមហ៊ុន បានជាប់ជំពាក់ប្រាក់វ័ណករ ប្រមាណជា១១លានដុល្លារ និងមានយន្ដហោះតែពីរប៉ុណ្ណោះ សម្រាប់ការហោះហើរក្នុងប្រទេសម៉ាឡេស៊ី។ ឆ្នាំ២០០១ ដែលលោកបានទិញក្រុមហ៊ុននេះ ក៏ជាឆ្នាំមិនល្អសម្រាប់វិស័យអាកាសចរណ៍ពិភពលោកដែរ ដោយព្រឹត្តិការណ៍ភេវរកម្ម នៅទីក្រុងញ៉ូយក ថ្ងៃទី១១ ខែកញ្ញា។
ប៉ុន្តែបទពិសោធដែលលោក ហ្វែណង់ដេស ធ្លាប់មាន ក្នុងអំឡុងពេលដែលលោកធ្វើការឲ្យក្រុមហ៊ុន វៀជីន (Virgin) នៅទសវត្សន៍ឆ្នាំ៨០ និងបន្ទាប់មកនៅក្រុមហ៊ុន ថែម៍វរន័រ (Time Warner) បានធ្វើឲ្យលោកដឹកនាំក្រុមហ៊ុន អ៊ែរអេសៀ ក្លាយជាក្រុមហ៊ុនដ៏ធំមួយ ដែលលក់តម្លៃសំបុត្រយន្ដហោះថោកជាងគេ និងមុនគេនៅអាស៊ីអាគ្នេយ៍។ អគ្គនាយកដែលចូលចិត្តស្លៀកខោខូប៊យ ពាក់មួកកន្តឹប ជាងពាក់ក្រវ៉ាត់កនិងអាវធំរូបនេះ បានបញ្ចេញប្រយោគពាណិជ្ជកម្មមួយឡើងថា៖ «ពីពេលនេះតទៅ នរណាៗក៏អាចហោះហើរបានដែរ»។
បន្ទាប់ពីបានសងប្រាក់ជំពាក់អស់ នៅឆ្នាំ២០០៣ លោក តូនី ហ្វែណង់ដេស ចាប់ផ្ដើមបង្កើតបន្តិចម្ដងៗ រហូតមកដល់ពេលនេះ សាខាក្រុមហ៊ុនរបស់លោក នៅពាសពេញទាំងប្រទេសនៅអាស៊ីអាគ្នេយ៍។ ក្រុមហ៊ុន អ៊ែរអេសៀ បច្ចុប្បន្ន មានជើងហោះហើរទាំងក្នុងស្រុកទាំងក្រៅស្រុក ប្រមាណជា១២០ទិសដៅ។
ទស្សនាវដ្ដីហ្វូប (Forbes) បានប៉ាន់ប្រមាណថា បុរសអាយុ៥០ឆ្នាំ ដែលមានកូនពីរនាក់រូបនេះ មានទ្រព្យសម្បត្តិប្រមាណជា ៦៥០លានដុល្លារ (៥៣០លានអ៊ឺរ៉ូ)។ ទស្សនាវដ្ដីបានប្រសិទ្ធិនាមឲ្យលោក ថាជាអ្នកជំនួយប្រចាំទ្វីបអាស៊ី ក្នុងឆ្នាំ២០១០។ នៅឆ្នាំ២០១៣ លោក តូនី ហ្វែណង់ដេស ទទួលបានមេដាយកិត្តិយស ពីប្រធានាធិបតីបារាំងលោក ហ្វ្រង់ស៊័រ ហូឡង់ (François Hollande) ដោយសារតែក្រុមហ៊ុន អ៊ែរអេសៀ របស់លោកបានប្រើប្រាស់តែយន្ដហោះ អ៊ែរប៊ូស ដែលផលិតក្នុងប្រទេសបារាំង។
សម្រាប់គ្រោះថ្នាក់យន្ដហោះ នៅពេលនេះ អ្នកជំនាញខាងអាកាសចរណ៍ឯករាជ្យមួយរូប បានថ្លែងឡើងថា គោលជំហរដ៏រឹងប៉ឹងរបស់ក្រុមហ៊ុន អ៊ែរអេសៀ នឹងមិនធ្វើឲ្យក្រុមហ៊ុន ធ្លាក់ខ្លួនចុះអាប់អោន នៅចំពោះហេតុការណ៍នេះឡើយ។ លោក ស៊ូក័រ យូសូហ្វ (Shukor Yusof) អ្នកវិភាគជាតិសាំងហ្គាពួរ បានជឿជាក់ថា គ្រោះថ្នាក់នេះជាឧប្បទេវហេតុមួយ។ លោកបានអះអាងថា៖ «អ៊ែអេសៀ នៅតែជាក្រុមហ៊ុនអាកាសចរណ៍លក់សំបុត្រថោក ដែលមានលក្ខណៈរឹងប៉ឹង។ ខ្ញុំគិតថា អ្នកដំណើរទាំងឡាយ នៅតែគាំទ្រ អ៊ែរអេសៀ។»៕