យន្ដហោះ AirAsia បាត់ខ្លួន មានអ្នកដំណើរ៦ជនជាតិ តែគ្មានខ្មែរទេ
- ដោយ: សេក មនោរកុមារ អត្ថបទ៖ សេក មនោរកុមារ ([email protected]) - ប៉ារីស ថ្ងៃទី២៨ ធ្នូ ២០១៤
- កែប្រែចុងក្រោយ: December 28, 2014
- ប្រធានបទ: គ្រោះអាកាស
- អត្ថបទ: មានបញ្ហា?
- មតិ-យោបល់
-
ភ្លាមៗបន្ទាប់ពីបានទទួលស្គាល់ថា យន្ដហោះខ្លួនបានបាត់ដំណឹងសូន្យឈឹង ពីការទាក់ទងផ្លូវអាកាស ក្រុមហ៊ុនអាកាសចរណ៍លក់សំបុត្រថោក អ៊ែរអេសៀ របស់ប្រទេសម៉ាឡេស៊ី បានចេញមកបញ្ជាក់ថា នៅលើយន្ដហោះអ៊ែរប៊ូស ៣២០-២០០ (Airbus 320-200) ដែលបានភ្ជាប់ជើងហោះហើរលេខ QZ8501 ជាមួយនឹងមនុស្សជិះ១៦២នាក់នោះ មានជនជាតិមកពីប្រទេស៦។ ក្នុងនោះមាន ១៥៥ នាក់ជាជនជាតិឥណ្ឌូនេស៊ី ៣នាក់ជាជនជាតិកូរ៉េខាងត្បូង ១នាក់ជាជនជាតិបារាំង ១នាក់ជាជនជាតិអង់គ្លេស ១នាក់ជាជនជាតិម៉ាឡេស៊ី និងម្នាក់ទៀតជាជនជាតិសាំងហ្គាពួរ។
នៅក្នុងការប្រកាសពីដើមកំណើត របស់អ្នកដំណើរខាងលើនេះ គេមិនមានឃើញអ្នកដំណើរណាម្នាក់ជាជនជាតិខ្មែរនោះឡើយ។ សូមបញ្ជាក់ដែរថា មនុស្សដែលជិះនៅលើយន្ដហោះ មានចំនួនសរុប១៦២នាក់ ក្នុងនោះ១៥៥នាក់ជាអ្នកដំណើរ និង៧នាក់ជាអ្នកបម្រើការនៅលើយន្ដហោះ។ ក្នុងចំណោមអ្នកដំណើរទាំង១៥៥នាក់ មាន១៣៨នាក់ជាមនុស្សធំ ១៦នាក់ជាកុមារ និងមានទារកមួយនាក់។
ម្នាក់ជាជនជាតិបារាំង ជាជំនួយការបើកបរយន្ដហោះ ជាមួយនឹងសមាជិកបម្រើការ៦នាក់ផ្សេងទៀត ដែលសុទ្ធសឹងជាជនជាតិឥណ្ឌូនេស៊ី។
យន្ដហោះ QZ8501 បានបាត់ពីការត្រួតពិនិត្យដែនអាកាស ខណៈយន្ដហោះបានហោះមកដល់លំហរសមុទ្រហ្សាវ៉ា (Java) ចេញពីក្រុង ស៊ូរ៉ាប៉ាយ៉ា (Surabaya) ប្រទេសឥណ្ឌូនេស៊ី ឆ្ពោះមកកាន់ប្រទេសសាំងហ្គាពួរ។ យុទ្ធនាការរុករកបានធ្វើកម្រិតដ៏ខ្លាំងមួយ បើទោះជាស្ថានភាពឧត្តុនិយមមិនអំណោយផល នៅលើតំបន់នោះក៏ដោយ។ នេះបើតាមកងទ័ពឥណ្ឌូនេស៊ី ដែលទទួលបន្ទុកភារកិច្ចនេះ។
អ្នកនាំពាក្យកងទ័ពអាកាសរបស់ប្រទេសឥណ្ឌូនេស៊ី លោក ហាឌី កាអ៊ីយ៉ានតូ (Hadi Cahyanto) បានថ្លែងឲ្យដឹងថា៖ «អាកាសធាតុមានពពកក្រាស ហើយតំបន់នោះស្ថិតក្នុងភាពល្ហល្ហេវកណ្ដាលសមុទ្រ។ យើងកំពុងធ្វើដំណើរទៅកាន់តំបន់រុករក ប៉ុន្តែមិនអាចនិយាយពីហេតុការណ៍អ្វី ដែលកើតឡើងចំពោះយន្ដហោះ នៅពេលនេះបាននៅឡើយ។»
រីឯក្រុមគ្រួសារវិញ បានប្រមូលផ្ដុំគ្នានៅព្រលានយន្ដះហោះទាំងសងខាង និងបានបង្ហាញសភាពជ្រួលច្របល់កាន់តែខ្លាំងឡើង។ ស្ត្រីមួយរូបអាយុ៤៥ឆ្នាំ បានថ្លែងទាំងភាពរន្ថត់ថា គាត់មានសមាជិកក្រុមគ្រួសាររហូតដល់ទៅ៦នាក់ នៅលើយន្ដហោះ។ អ្នកស្រីបាននិយាយថា៖ «ពួកគេទៅកាន់ប្រទេសសាំងហ្គាពួរ ដើម្បីដើរលេង។ ពួកគេតែជិះយន្ដហោះ អ៊ែរអេសៀ នេះជាប់រហូតមក ដោយគ្មានបញ្ហាអ្វីទាំងអស់។ ខ្ញុំតក់ស្លុតណាស នឹងដំណឹងដែលនិយាយថា យន្ដហោះទំនងជាអាចធ្លាក់៕»