ការហោះហើរសាកល្បងលើកដំបូង ដែលមានរយៈពេលបួនម៉ោង បានប្រព្រឹត្តិទៅដោយជោគជ័យ ដើម្បីនឹងអនុញ្ញាត​ឲ្យ​យន្ដហោះថ្មីប្រភេទអា៣៥០ (A350) នេះ របស់ក្រុមហ៊ុនអ៊ែរប៊ូស (Airbus) អាចដាក់ឲ្យដំណើរការបាន នៅចុងឆ្នាំ២០១៤​ខាងមុខ។

យន្ដហោះដឹកអ្នកដំណើរថ្មី របស់ក្រុមហ៊ុនចម្រុះរបស់អ៊ឺរ៉ុប ឈ្មោះហៅថា អ៊ែរប៊ូស បានធ្វើការសាកល្បងជាលើក​ដំបូង​របស់ខ្លួនដោយជោគជ័យ ដោយបានត្រឡប់មកចុះចត នៅព្រលានយន្ដហោះនៃទីក្រុងទូលូស៍កាលពីថ្ងៃសុក្រវេលាម៉ោង ១៤និង៦នាទី។ ការហោះហើរសាកល្បងនេះ មានរយៈពេលបួនម៉ោង ដែលជាផ្នែកមួយនៃយុទ្ធនាការដាក់ឲ្យដំណើរការ យន្ដហោះទីមួយ នៅចុងឆ្នាំ២០១៤ខាងមុខ។ ចំនួនមនុស្សដែលអាចជិះនៅក្នុងយន្ដហោះនេះ មានចំនួនពី២៧០នាក់​រហូត​ដល់៣៥០នាក់ ហើយវាអាចហោះក្នុងចម្ងាយ១៥០០០គីឡូម៉ែត្រ ដែលសុទ្ធសឹងជាគុណសម្បត្តិយ៉ាងពិសេស ក្នុងការ​ប្រកួតប្រជែង ទល់នឹងយន្ដហោះប្រភេទ៧៧៧ ឬ៧៨៧ នៃក្រុមហ៊ុនប៊ូអ៊ីញ (Boeing) របស់អាមេរិក។

អាកាសយានិកដែលបានកាន់ចង្កូតក្នុងពេលសាកល្បង លោក ភីធើរ ឆេនដ័រ (Peter Chandler) បានថ្លែងប្រាប់ទូរទស្សន៍​របស់ក្រុមហ៊ុនអ៊ែរប៊ូស ក្នុងពេលនោះថា «យន្ដហោះថ្មីនេះ មានសភាពរឹងប៉ឹងល្អប្រសើរណាស់»។ សមាជិកម្នាក់ទៀតនៃ​កម្មវិធីហោះហើរសាកល្បង លោក ហ្វ្រេង ឆាពម៉េន (Frank Chapman) បាននិយាយដែរថា លោករំភើបណាស់ នឹងឃើញ​យន្ដហោះងើបក្បាលឡើងលើអាកាស បានសម្រេចយ៉ាងល្អដូច្នេះ។

នៅពេលយន្ដហោះ សំកាំងខ្លួនពីលើភ្នំពីរ៉េណេ (Pyrénées) នៅប្រទេសបារាំង អាកាសយានិករូបនោះបានបន្ថែមថា «យើងសង្ឃឹមថា នឹងហោះបានកំពស់៧៥០០ម៉ែត្រ ក្នុងពេលឆាប់ៗនេះ។ តែនៅពេលនេះ យើងគោរពគម្រោង​កម្មវិធី​របស់យើងសិន។»

ការហោះហើរសាកល្បងលើកទីមួយនេះ មានរយៈពេលបួនម៉ោង មិនបានបាញ់មុខព្រួញទៅគ្រប់​ភាពល្អប្រសើរ​នៃ​យន្ដហោះ​ទាំងស្រុង ឬដើម្បីហោះក្នុងកំពស់ខ្ពស់រហូតដល់១០០០០ម៉ែត្រនោះនៅឡើយ។ ប៉ុន្តែការហោះហើរសាកល្បង​លើកក្រោយ នឹងអាចធ្វើពី៦ទៅ៧ម៉ោង ដើម្បីមើលឲ្យដឹងពីការបំពាក់បន្ងែម នូវសម្ភារះផ្សេងៗទៀតនៅក្នុងតួយន្ដហោះ។ អ្នកជំនាញមិនបានបញ្ជាក់ថា តើនឹងត្រូវធ្វើនៅពេលណានោះទេ។

សូមបញ្ជាក់ថា មុននឹងធ្វើការហោះហើរសាកល្បងទៅលើអាកាសនេះ អ្នកជំនាញបានចំណាយពេលរាប់សិប​ពាន់ម៉ោង​រួចមកហើយ ក្នុងការសាកល្បងតួរយន្ដហោះនៅលើដី។ ហើយបន្ទាប់ពីការសាកល្បងលើកដំបូងនេះទៅ ក្រុមហ៊ុន​នឹង​ផលិតតួយន្ដហោះចំនួន៥គ្រឿងទៀត សម្រាប់ដាក់ឲ្យហោះសាកល្បង នៅគ្រប់លក្ខខ័ណ្ឌទាំងអស់ រាប់ទាំងតំបន់​ដែល​យន្ដហោះត្រូវហោះកាត់ ដែលចុះត្រជាក់ ឬឡើងក្ដៅខ្លាំងជាទីបំផុតនោះផង។

តួយន្ដហោះគំរូទីពីរ នឹងត្រូវដាក់ឲ្យហោះសាកល្បងនៅរដូចស្លឹកឈើជ្រុះក្រោយនេះ រីឯតួរយន្ដហោះទីមួយ​ដែលមាន​បន្ទប់ អាចទទួលអ្នកដំណើរបានពិតប្រាកដ នឹងត្រូវដាក់ឲ្យហោះសាកល្បងនៅដើមឆ្នាំ២០១៤ខាងមុខ។ យន្ដហោះ អា៣៥០ ដែលធ្វើពីលោហធាតុស្រាលបំផុតនេះ នឹងស៊ីសាំងតិចជាង២៥% បើប្រៀបធៀបទៅនឹងអ៊ែរប៊ូស អា៣៣០ ឬគូរ​ប្រជែងរបស់វា ប៊ូអ៊ីញ៧៧៧ និងតិចជាង៨% បើប្រៀបធៀបទៅនឹងយន្ដហោះ ៧៨៧ ដែលជាកូនទើបនឹងកើតមួយទៀត​របស់ប៊ូអ៊ីញ៕

សូមទស្សនាវីដេអូខ្លីមួយ ស្ដីសកម្មភាពសាកល្បងរបស់យន្ដហោះប្រភេទថ្មីនេះ៖

ចំណែកវីដេអូនេះ មានរយៈពេលជាង៥ម៉ោង នឹងនិយាយលំអិតពីសកម្មភាពនៃការសាកល្បងនេះ៖

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី១៤ ខែមិថុនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ