វង្ស ណយ នឹងប្រឡូកចូលសង្វៀនប្រដាល់វិញ បើតម្លៃខ្លួនខ្ពស់
- ដោយ: ប្រាថ្នា ដោយ ប្រាថ្នា (ទាក់ទង៖ [email protected] ) - ភ្នំពេញ ថ្ងៃទី១៥ វិច្ឆិកា ២០១៤
- កែប្រែចុងក្រោយ: November 16, 2014
- ប្រធានបទ: ប្រដាល់
- អត្ថបទ: មានបញ្ហា?
- មតិ-យោបល់
-
កីឡាករ វង្ស ណយ អ្នកប្រដាល់ក្បាច់បុរាណខ្មែរ ដែលជាកូនសិស្សរបស់លោក ឈិត សារឹម និងជារឿយៗតែងតែរអ៊ូរទាំជានិច្ច ពីជីវភាពដ៏លំបាករបស់អ្នកប្រដាល់ ព្រោះតែគ្មានការយកចិត្តទុកដាក់ពីអ្នកពាក់ព័ន្ធ និងទទួលបានតម្លៃខ្លួនទាប ដែលជាមូលហេតុធ្វើឱ្យលោក ដើរចេញពីសង្វៀនប្រដាល់ទាំងមិនងាកក្រោយនោះ ឥលូវនេះ លោកហាក់បង្ហាញជំហរជាថ្មី ចង់ងាកចូលប្រលូកក្នុងវិស័យនេះឡើងវិញ។ ការអះអាងចង់ត្រឡប់ក្រោយរបស់លោក បានធ្វើឡើងបន្ទាប់ពីមានដំណឹងលេចឮថា សហព័ន្ធកីឡាប្រដាល់ក្បាច់គុណបុរាណខ្មែរ កំពុងរៀបចំតម្លៃខ្លួនឲ្យកីឡាករ។
កីឡារករដែលគេទទួលស្គាល់ថា ពោរពេញទៅដោយសមត្ថភាពរូបនេះ បានសរសេរនៅលើទំព័រហ្វេសប៊ុករបស់ខ្លួនថា ស្របពេលដែលសហព័ន្ធ កំពុងតែរៀបចំតម្លៃខ្លួនកីឡាករឡើងវិញ លោកសប្បាយរីករាយណាស់ ដែលលោកនឹងជិតបានឡើងវ៉ៃឡើងវិញ ប្រសិនបើតម្លៃខ្លួនឡើងខ្ពស់ ជីវភាពធូធារ។
កីឡាករជើងខ្លាំងវ័យ២៨ឆ្នាំ ដែលអាចផ្តួលគូប្រកួតឱ្យសន្លប់ជាច្រើនដង រូបនេះបាននឹងសន្យាថា នឹងខំប្រឹងពង្រឹងសមត្ថភាព នៃការវ៉ៃឱ្យលោកឱ្យកាន់តែខ្លាំងជាងមុន ដើម្បីលោកខ្លួនឯងផ្ទាល់ ក្រុមគ្រួសារ និងជាពិសេសនោះ ដើម្បីថែរក្សាមរតកជាតិ ព្រលឹងជាតិរបស់ខ្មែរ ដែលដូនតាខ្មែរបន្សល់ទុក ឲ្យបានគង់វង្សល្អ ។
ក្រៅពីការប្តេជ្ញាចិត្តខាងលើថា នឹងខិតខំស្តារសមត្ថភាពខ្លួនឯង ក៏ដូចជាលើកស្ទួយវិស័យកីឡាប្រដាល់ វង្ស ណយ បានអំពាវនាវឱ្យ ទស្សនិកជន និងអ្នកស្នេហាវិស័យកីឡាប្រដាល់ ជួយលើកទឹកចិត្តដល់កីឡាករប្រដាល់ទាំងអស់ ដែលប្រើទាំងកម្លាំងកាយចិត្តឡើងប្រយុទ្ធ នៅលើសង្វៀននិងបញ្ឈប់ការរិះគន់តទៅទៀត។ លោកបានសរសេរទៀតថា៖ «សូមផ្តាំទៅទស្សនិកជន ដែលតែងតែរិះគន់ តិះដៀល កីឡាករអាក្រក់ៗ បើមិនដឹងពីការលំបាករបស់កីឡាករទេ កុំនិយាយអីល្អជាង (អ្នកមិនមែនខ្ញុំ អ្នកមិនដឹងទេ) ព្រោះពាក្យរិះគន់របស់អ្នក មិនដែលជួយរុញស្ថាបនា រឺ ក៏លើកស្ទួយ ដើម្បីអោយកីឡាប្រដាល់ជាតិ រីកចំរើននោះទេ។ ផ្ទុយទៅវិញ ការរិះគន់របស់អ្នក ធ្វើអោយកីឡាករបាក់ទឹកចិត្ត។»៕