ជាមួយនឹងភាពយន្ដ ដែល​សំដែង​ដោយ​តុក្កតា​សូន្យ​ពី​ដី តែ​ដើរ​តួ​តំណាង​ឲ្យ​អ្នក​និពន្ធ និង​ជន​រង​គ្រោះ ក្នុង​របប​ខ្មែរ​ក្រហម រឿង​«រូប​ភាព​ឈឺ​ផ្សារ ឬ The missing picture ឬ L'images manquante» សមិទ្ធិករ​ភាពយន្ដ​ខ្មែរ​បារាំង លោក ប៉ាន រិទ្ធី ត្រូវ​បាន​គណៈកម្មការ​វាយ​តម្លៃ របស់​វិទ្យាស្ថាន​ស្រាវជ្រាវ​សេដ្ឋកិច្ច សម្រាប់​អាស៊ាន និង​អាស៊ី​បូព៌ា ផ្ដល់​ពិន្ទុ​ឲ្យ​លោក​ជាប់ ជា​អ្នក​ឈ្នះ​ពាន​រង្វាន់​ផ្នែក​វប្បធម៌ នៃ​កម្មវិធី​«ពហុ​វិស័យ»​នៅ​អាស៊ី។

ថ្លែង​ក្នុង​ពិធី​ប្រកាស​អ្នក​ជាប់​ជ័យ​លាភី ដែល​បាន​ធ្វើ​នៅ​សណ្ឋាគារ អាំងទែរ​កុង​ទីណង់តាល់ នៅ​ពី​ព្រឹក​ថ្ងៃ​ទី ២២ ខែតុលា ឆ្នាំ​២០១៤នេះ សម្តេច នរោត្តម សេរីវុឌ្ឍ សមាជិក​នៅ​ក្នុង​គណៈកម្មការ​វាយ​តម្លៃ​នោះ បាន​មាន​បន្ទូល​ថា លោក ប៉ាន រិទ្ធី ពិត​ជា​ស័ក្កិ​សម​ក្នុង​ការ​ទទួល​បាន​នូវ​ពាន​រង្វាន់​នេះ ហើយ​ពិត​ជា​នាំ​មក​នូវ​កិត្តិយស ក៏​ដូច​ជា​សេចក្តី​ថ្លៃថ្នូរ​ជូន​ប្រជាជន​កម្ពុជា។ ព្រះ​អង្គ​មាន​បន្ទូល​បន្ត​ថា៖ «ក្នុង​នាម​គណកម្មាការ​ជ្រើស​រើស និង​ក្នុង​នាម​ខ្លួន​ខ្ញុំ​ផ្ទាល់ ខ្ញុំ​ពិត​ជា​គាំទ្រ ដោយ​សារ​តែ​កិច្ចការ​របស់​លោក ប៉ាន រិទ្ធី ដែល​លោក​បាន​ផលិត​ជា​ខ្សែរ​ភាពយន្ត ក៏​ដូច​ជា​ឯកសារ​ប្រវត្តិ​សាស្រ្ត​ផ្សេងៗ។»

ចំណែកឯម្ចាស់ពានជ័យលាភី លោក ប៉ាន់ រិទ្ធី វិញ បានថ្លែងថា លោកក៏ដូចសហការីរបស់លោក មានភាព​ត្រេក​អរ​យ៉ាងខ្លាំង ក្នុងការឈ្នះពានរង្វាន់នេះ ព្រោះក្រុមអ្នកផលិតរឿងរបស់លោក សុទ្ធនៅក្មេងខ្ចី និងមានបទពិសោធ​ស្តួចស្តើង។

ភាពជោគជ័យរបស់សមិទ្ធិកររូបនេះភាគច្រើន បានផ្ដោតទៅលើស្នាដែ ដែលលោកផលិត ឬដឹកនាំទាក់ទង​នឹង​របប​ខ្មែរក្រហម ប្រវត្តិសាស្ត្រដ៏ឈឺផ្សារ របស់ប្រទេសកម្ពុជា ក្នុងនោះដូចជាភាពយន្ដឯកសារ គុក ស២១ និង​ភាពយន្ដ «រូបភាពឈឹផ្សារ»ជាដើម។  លោក ប៉ាន រិទ្ធី បានបកស្រាយថា៖ «តាមពិត ការផលិតខ្សែរភាពយន្ត​របស់​ខ្ញុំ មិនមែនផ្តោតតែទៅលើរបស់ខ្មែរក្រហមទេ ប៉ុន្តែដោយសារតែរបបនេះ ជាប្រវត្តិសាស្រ្តរបស់យើង។ ជាក់​ស្តែង ខ្ញុំក៏មានគំនិតបង្កើតខ្សែភាពយន្តផ្សេងៗ ដូចជារឿងកំប្លែងអីផងដែរ។»។

នាយកប្រតិបត្តិវិទ្យាស្ថាន ស្រាវជ្រាវសេដ្ឋកិច្ចសម្រាប់ អាស៊ាន និងអាស៊ីបូព៌ា លោក ហ៊ីដេតូស៊ី នីស៊ិមូរ៉ា (Hidetoshi Nishimura) បានបញ្ជាក់ថា ពាន់រង្វាន់ពហុវិស័យអាស៊ីនេះ គឺផ្ដល់ជូនទៅបុគ្គល និងសមាគមណា ដែល​បានសម្រេចសមិទ្ធផលកិត្តិយសធំបំផុត នៅក្នុងវិស័យសង្គម វិទ្យាសាស្ត្រ សេដ្ឋកិច្ច និង វប្បធម៌។ លោក​បន្តថា សមិទ្ធផលរបស់លោក ប៉ាន់ រិទ្ធី នេះចាត់ទុកថា គឺជាជោគជ័យដ៏រុងរឿងមួយរបស់អាស៊ាន។

សូមបញ្ជាក់ថា ពានរង្វាន់ពហុវិស័យអាស៊ី (ERIA) គឺជា ពានរង្វាន់ចម្រុះជាតិសាសន៍អាស៊ី ក្រោមការសហការ​រៀបចំរបស់វិទ្យាស្ថាន ស្រាវជ្រាវសេដ្ឋកិច្ចសម្រាប់អាស៊ាន និង បណ្ដាប្រទេសក្នុងតំបន់អាស៊ី។ ពានរង្វាន់នេះ ធ្វើ​ឡើងរៀងរាល់ពីរឆ្នាំម្ដង ក្នុងគោលបំណងទទួលស្គាល់ ទៅលើមូលដ្ឋានគ្រឹះបុគ្គល រឺអង្គភាព ដែលបង្កើតឡើង​យ៉ាងសំខាន់ និងកំណត់លើការផ្តល់ការអភិវឌ្ឍន៍ នៃសន្តិភាព និងបណ្តាប្រទេសអស៊ី ដើម្បីធ្វើឱ្យមានគម្លាតរវាង បណ្តាប្រទេសប្រចាំតំបន់ឱ្យកាន់តែតូច។

លោក ហ៊ីដេតូស៊ី នីស៊ិមូរ៉ា បានបញ្ជាក់បន្ថែមទៀតថា៖ «ភារកិច្ចរបស់លោក បានជម្រុញធ្វើឱ្យបណ្តាប្រទេស ជា​សមាជិអាស៊ានខិតខំប្រឹងប្រែង ដើម្បីបង្កតឱ្យមានការចងចាំ ពាក់ព័ន្ធនឹងព្រឹត្តិការណ៍សំខាន់ៗ នៅក្នុងប្រវត្តិ​សាស្រ្ត។ រង្វាន់ទាំងអស់នេះ មានការពាក់ព័ន្ធកិច្ចប្រឹងប្រែង ក្នុងការជំរុញធ្វើឱ្យបណ្តាប្រទេសអាស៊ាន ធ្វើ​សមាហរណកម្ម ក៏ដូចជាការបង្កើតឱ្យមានកិច្ចប្រែង ក្នុងការចងក្រងប្រវត្តិសាស្រ្ត។»

ពានរង្វាន់វប្បធម៌ ចំនួនពីរទៀត ត្រូវបានឈ្នះទៅលោក​ វ៉ាង ហ្គងវូ (Wang Gungwu) សាស្ត្រាចារ្យនៃ​សាកល​វិទ្យាល័យ​សិង្ហបុរី និង បានទៅក្រុមហ៊ុន The Takarazuka Revue ដែលជាក្រុមហ៊ុនល្ខោនតន្ត្រី បង្កើតឡើង​ពី​ក្រុម​នារីនៅទំនេរ។ រីឯអ្នកដែលទទួលបានពានរង្វាន់ធំ គឺរង្វាន់ពហុវិស័យអាស៊ី បានទៅលើលោក ម៉ាន់មហាន់ ស៊ីង (Manmohan Singh) អតីតនាយករដ្ឋមន្ត្រីឥណ្ឌា និងពានរង្វាន់ផ្នែកសេដ្ឋកិច្ច និង វិទ្យាសាស្ត្រសង្គម បាន​ទៅលើ​លោក ភីធើ ដេវិដ ឌ្រីស្តាល (Peter David Drysdale) ជាសាស្ត្រាចារ្យសេដ្ឋកិច្ច និងទស្សនៈកិច្ចសមាជិក នៃ​សាលា​សេដ្ឋកិច្ច និង រដ្ឋបាល Crawford នៃសកលវិទ្យាល័យជាតិអូស្ត្រាលី៕

សូមទស្សនាការដកស្រង់នូវវគ្គមួយ ពីភាពយន្ដ«រូបភាពឈឺផ្សារ»ដូចតទៅ៖