ជាបទល្មើសដ៏ប្លែកមួយទៀត ដែលបានកើតឡើង នៅលើលោកយើងនេះ។ លោក រ៉ៃអាន វ័ធើផូល (Ryan Watenpaugh) អ្នករស់នៅក្នុងរដ្ឋកាលីហ្វ័នី អាយុ៣៤ឆ្នាំ ដែលពោរពេញទៅដោយទេពកោសល្យ ខាងចំអិន​អាហារនោះ មិនបានយកភាពប៉ិនប្រសព្វនេះ មកបម្រើផ្គាប់ផ្គុនស្ត្រីជាគូរស្នេហ៍ រស់នៅក្នុងផ្ទះជាមួយគ្នាទេ។ តែបានបង្កើតស្នាដៃដ៏ពិសេសមួយ ដោយយកសាច់សត្វឆ្កែ ដែលចិញ្ចឹមស្រឡាញ់ដោយស្ត្រីគូរស្នេហ៍ យក​មក​ធ្វើជាអាហារពេលល្ងាច ឲ្យនាងទទួលទានទៅវិញ។

បុរសនេះ ត្រូវបានឃាត់ខ្លួន នៅថ្ងៃព្រហស្បត្តិ៍ ដោយនគរបាលក្រុង រ៉េដឌីញ (Redding) បន្ទាប់ពីស្ត្រីជាគូរ​ស្នេហ៍​បានដាក់ពាក្យបណ្ដឹង។ នៅក្នុងសេចក្ដីប្រកាសព័ត៌មានមួយ របស់កងកម្លាំងនគរបាល បានសរសេរ​ឲ្យដឹងថា ស្ត្រីវ័យក្មេងដែលរស់នៅ ជាគូកំណាន់ល្អូកល្អើន ជាច្រើនឆ្នាំមកហើយ បានអះអាងពីភាពរងគ្រោះ ដោយ​ការទះ​តប់​មិន​ឈប់ឈរ ពីជនសង្ស័យ រ៉ៃអាន ក្នុងរយៈពេលប៉ុន្មានខែចុងក្រោយនេះ។ នាងបញ្ជាក់ថា នាង​បាន​សាកល្បង​រត់​ចេញ​ពីផ្ទះនោះពីរដង តែតែងត្រូវបាន រ៉ៃអាន ចាប់ឲ្យត្រឡប់មកវិញ។

តែអ្វីដែលបានកើតឡើងយ៉ាងហួសហេតុនោះ គឺនៅថ្ងៃទី៤ ខែសីហាកន្លងទៅ បន្ទាប់ពីនាងបានខកខាន ក្នុង​ការ​រត់គេចខ្លួនពីជម្លោះដ៏ខ្លាំងក្លាជាមួយ រ៉ៃអាន នោះមក នៅពេលត្រឡប់មកផ្ទះវិញ ស្រាប់តែនាង​មិនបាន​ឃើញ ឆ្កែជាទីស្រឡាញ់របស់នាង បង្ហាញវត្តមានដូចរាល់ដង នៅចំពោះមុខនាងទៀតទេ។ ហើយនាង​ក៏​មិន​បាន​គិត​ដល់ថា តើវាមានរឿងអ្វី ដែលបានកើតឡើង ចំពោះឆ្កែដែលមានឈ្មោះថា «ខ្លាឃ្មុំ» របស់​នាង​នេះ​ដែរ។

មួយខែក្រោយមក គូរស្នេហ៍គូរកម្មទាំងពីរនាក់ បានត្រូវរ៉ូវគ្នាវិញ ហើយ រ៉ៃអាន សម្រេចចិត្តធ្វើ​អាហារពេល​ល្ងាច ឲ្យស្ត្រីដែលខ្លួនស្រឡាញ់ទទួលទាន។ តែនៅថ្ងៃអាទិត្យទី៩ ខែកញ្ញាកន្លងទៅនេះ រ៉ៃអាន បានផ្ញើរ​សារ​តាម​ទូរស័ព្ទ​ដៃ យ៉ាងចម្លែកជាច្រើនមកគូរស្នេហ៍របស់ខ្លួន ដោយសួរពីដំណឹងរបស់ឆ្កែនាង តែបាន​និយាយ​ប្រៀប​ធៀប​រឿងនេះ ទៅនឹងអាហារពេលល្ងាច ដែលបុរសម្នាក់នេះបានចំអិន។

ឲ្យសង្ស័យប៉ុណ្ណេះហើយ រ៉ៃអាន នៅមិនទាន់អស់ចិត្តនៅឡើយ ព្រោះនៅពីរថ្ងៃក្រោយមក បុរសរូបនេះ​បាន​យក​ស្បោង​មួយ មកដាក់ពីមុខទ្វាបន្ទប់សង្សារបស់ខ្លួនទៀត។ នៅក្នុងស្បោងនោះ មានជើងមួយគូររបស់ «ខ្លាឃ្មុំ» ឆ្កែដែលនាងកំពុងដើរស្វែងរក។ ហួសនឹងថ្លែង ស្ត្រីវ័យក្មេងមិនអាចអត់ទ្រាំតទៅទៀតបាន ក៏​សម្រេច​ចិត្ត​ប្ដឹង​ទៅអាជ្ញាធរនៅពេលនោះ រហូតឈានទៅដល់ការឃាត់ខ្លួនបុរស មេចុងភៅដ៏ចំណាន​ម្នាក់​នេះ។ នៅពេលសួរ​ចម្លើយ បុរសបានទទួលស្គាល់ថា ខ្លួនពិតជាបានផ្ញើរសារទៅឲ្យនារីគូរកម្មរបស់ខ្លួន ហើយ​បានដាក់ជើង​ឆ្កែ​ទាំង​គូរ នៅមុខទ្វានោះមែន។ តែបដិសេធមិនបានធ្វើម្ហូបពីសាច់ឆ្កែ ឲ្យស្ត្រី​ដែល​ខ្លួន​ស្រឡាញ់​នោះ​បរិភោគ​ឡើយ។ ការបដិសេធ ដែលមិនសូវធ្វើឲ្យនគរបាលជឿប៉ុន្មានទេ ...លុះត្រា​តែ​នគរបាល​អាច​រក​ឃើញ សាកសព​របស់ ឆ្កែ«ខ្លាឃ្មុំ»នោះសិន ...៕