រឿងរ៉ាវនៃការលោតទឹកសម្លាប់ខ្លួន របស់ស្រ្តីដែលគេស្គាល់ថា ជាតារាសម្តែង ប៉ុន្តែមិនសូវមានឈ្មោះ​បោះ​សម្លេង​ប៉ុន្មានឡើយ នៅក្នុងពិភពសិល្បៈ បានល្បីខ្ទខ្ទារ ពេញបណ្ដាញសារព័ត៌មានក្នុងស្រុកជាច្រើន ដែល​បាន​ធ្វើការ​ចុះ​ផ្សាយ អំពីករណីលោតទឹកសម្លាប់ខ្លួនរបស់នាង។

ស្ដ្រីវ័យក្មេង ដែលអាយុជាង២០ឆ្នាំ និងជាតារាសម្ដែង ប៉ងធ្វើអត្ដឃាត ដោយលោតសម្លាប់ខ្លួននេះ បាន​កើត​ឡើង​កាលថ្ងៃទី១២ ខែ សីហា ឆ្នាំ២០១៤ កន្លងមកនេះ វេលាម៉ោង ប្រមាណ ៨ និង៣០នាទីព្រឹក នៅ​លើ ស្ពាន​ជ្រោយ​ចង្វារ ប៉ែកខាងកើតស្ថិតក្នុង ទឹកដី សង្កាត់ជ្រោយចង្វារ ខណ្ឌជ្រោយចង្វារ។ ការសម្រេចចិត្ដ​ធ្វើ​អត្ដឃាតដោយ លោតពីលើស្ពានខាងលើនេះត្រូវបានប្រភពនានា ក៏ដូចសារព័ត៌មួយចំនួន​អះអាងថា នេះ​ដោយសារតែ តែរូបនាង​មានវិបត្ដិស្នេហាចុងក្រោយ ខណៈបុរសជាសង្សាររបស់ខ្លួន ដែលជាមន្ដ្រី​ថ្នាក់​ឧត្ដមសេនីយ៍បានវាយនាង ទើបនាងតូចចិត្ដសម្រេច មកលោត កសម្លាប់ខ្លួនតែម្ដង។

ចំណែកឯប្រិយមិត្ត នៅក្នុងបណ្តាញសង្គមហ្វេសប៊ុក បានលើកឡើងពីមូលហេតុ ​នៃការលោតទឹកសម្លាប់​ខ្លួន​នេះដែរថា ដោយសារតែបុរសដែលជាសង្សាចុងក្រោយរបស់នាង ដែលមានងារឧត្ដមសេនីយ៍ មាន​ប្រពន្ធរួចទៅហើយ រីឯការរស់នៅជាមួយនឹងបុរសវ័យចំណាស់នោះ ក្នុងនាមជាស្រីលួចលាក់តែប៉ុណ្ណោះ។ ហេតុដូច្នេះហើយ ទើបណ្តាលឱ្យនាងគិតខ្លីលោតទឹកសម្លាប់។

ប៉ុន្តែការលើកឡើងខាងលើ ត្រូវបានតារាស្រីរូបនេះបដិសេធថា បច្ចុប្បន្ននាងមានស្នេហា​ជាមួយ​បុរស​ម្នាក់​មានងារជាឧត្ដមសេនីយ៍មែន តែមិនមែនមានប្រពន្ធនោះទេ តែបុរសនោះនៅកំលោះ«ចេស»តែម្ដង។ ដោយសារតែនាង មិនអាចរស់នៅជាមួយគ្នាបាន ក៏បានសុំចែកផ្លូវគ្នាវិញ។ ហើយករណីដែលអះអាងថា ឧត្ដមសេនីយ៍រូបនោះ វាយធ្វើបាបលើរូបនាង មិនមែនជាការពិតនោះឡើយ។ កញ្ញាអាម៉ុច បានបញ្ជាក់ថា ឧត្ដមសេនីយ៍ម្នាក់នោះ មិនដែលធ្លាប់ធ្វើបាបនាងទេ ផ្ទុយទៅវិញ បុរសឧត្តមសេនីយ៍​ស្រលាញ់នាង​ខ្លាំង​ណាស់។

គេហាទំព័រក្នុងស្រុកមួយ ដែលបានជួបសម្ភាសន៍ជាមួយនាង បានស្រង់សម្តីរបស់នាង រៀបរាប់ពីបញ្ហា៣ ដែលនាំឱ្យនាងសម្រេចចិត្តលោតទឹកសម្លាប់ខ្លួន។

រឿងទី១៖ នាងតូចចិត្តនឹងខ្លួនឯង ដែលកើតមកជាក្មេងកំព្រាឪពុកតាំងពីវ័យ ១៣ ឆ្នាំ ហើយម្ដាយរបស់​នាង​មានស្វាមីថ្មី ចេញទៅរស់នៅអាមេរិកបាត់ ហើយមិនដែលនឹកនា នាងម្ដងណាឡើយ ដោយទុកឱ្យនាង រស់​នៅតែម្នាក់ឯង។

រឿងទី២៖ គឺ មានវិបត្តិស្នេហាយ៉ាងធ្ងន់ធ្ងរបំផុត។ អាម៉ុច ប្រាប់ថា នាងធ្លាប់មានគូដណ្ដឹង ២លើកមកហើយ ប៉ុន្តែដល់ថ្ងៃរៀបការ គឺ គូដណ្ដឹង ទាំង ២ នោះ ស្លាប់ទាំងអស់។ ស្នេហាទី ១ អាម៉ុច មានគូដណ្ដឹងជា​ជន​ជាតិ​ថៃ ដោយបានភ្ជាប់ពាក្យជាមួយគ្នា នៅសល់តែ ១ អាទិត្យប៉ុណ្ណោះ នាងត្រូវចូលរៀបអាពាហ៍ពិពាហ៍ ប៉ុន្តែ គូដណ្ដឹងរបស់នាង បានគាំងបេះដូងស្លាប់បាត់។ មិនបានប៉ុន្មានផង នាងបានជួបជាមួយ​បុរស​ជនជាតិ​ជប៉ុន​ម្នាក់ទៀត គ្រាដែលដែលនាងរស់នៅ សាំងហ្គាពួរ។ ជាមួយស្នេហាទី២ នោះ បានឈានដល់ការភ្ជាប់​ពាក្យ​ដូចស្នេហាទី១ ដែរ តែនៅសល់ពេល ២ សប្ដាហ៍ ប៉ុណ្ណោះ ត្រូវរៀបអាពាហ៍ពិពាហ៍ ប៉ុន្តែជាអកុសល បុរស​ជប៉ុនម្នាក់នោះ បានជួបគ្រោះថ្នាក់ចរាចរណ៍ ស្លាប់ទៀត។

រឿងទី៣៖ អាម៉ុច បានប្រាប់ថា ថ្មីៗនេះ នាងទើបតែចាញ់បោកមិត្តភ័ក្ដិជិតស្និទ្ធម្នាក់ អស់ជាង ៤០០០ ដុល្លារ ក្នុងគម្រោងបើកហាងអ៊ុតសក់ជាមួយគ្នា។ មិត្តភ័ក្ដិរបស់នាង បានយកប្រាក់ និងគ្រឿងអលង្ការ រត់ចោលនាងបាត់ កាលពីប៉ុន្មានថ្ងៃមុននេះ៕