បើទោះមិនត្រូវបានគណកម្មការ ក្នុងកម្មវិធីប្រលងចម្រៀង ឌឹវ័យន៍ (The voice) ផ្តល់ឱកាសឱ្យជាប់​ទៅវគ្គ​បន្តទៀត តែយ៉ាងហោចណាស់បេក្ខជន ដែលមានភ្នែកពិការទាំងសងខាង និងមានស្រុកកំណើតមកពី​ខេត្ត​កំពង់ចាម ត្រូវបានផលិតកម្មក្នុងស្រុកមួយ ដែលទើបនឹងបង្កើតថ្មី ផ្តល់ឱកាសឱ្យក្លាយជាអ្នកចម្រៀង និង​បានចុះ​កិច្ច​សន្យារួចរាល់ ដើម្បីច្រៀងឱ្យផលិតកម្មមួយនេះ។

លោក ប្រុក ចាន់ថន ជាបេក្ខជនមួយរូបរបស់កម្មវិធីឌឹវ័យន៍ ដែលបានធ្វើឱ្យទស្សនិកជន មានចាប់អារម្មណ៍​យ៉ាងខ្លាំង រហូតធ្វើឱ្យគណកម្មការ ឬគ្រូបង្វឹក ព្រមទាំងទស្សនិកជាច្រើន ទ្រាំទប់ទឹកភ្នែកមិនបាន បើទោះជា​បេក្ខជនរូបនេះ បានធ្លាក់ចេញក្នុងវគ្គជម្រុះរបស់កម្មវិធី។ ក្រោយពីគ្រូបង្វឹក ឬ Coach ទាំងបួនរបស់កម្មវិធី​ប្រលងចម្រៀងដ៏ពេញនិយមលើពិភពលោកនេះ មិនបានជ្រើសរើសឱ្យបន្តទៅវគ្គក្រោយទៀត ទស្សនិក​ជន​​បានសម្តែង​ការសោកស្តាយជាខ្លាំង និងបានរិះគន់ទៅលើគណកម្មការទាំងបួនថា ផ្ដល់ឱកាស​ឱ្យតែ​បេក្ខជន​បេក្ខនារី ដែលបកស្រាយបចម្រៀងបែបសម័យ ដែលផ្ទុយពីបេក្ខជនពិការភ្នែករូបនេះ​ដែលជ្រើស​យក​បទ​បែបបុរាណមកប្រលងប្រជែង។

លោក ឈុន សុវណ្ណភក្កី អ្នកចាត់ការទូទៅប្រចាំផលិតកម្ម ប៊ីអ៊េសខេ (Best Khmer Sound) ដែលស្រង់សម្តី​ដោយគេហទំព័រក្នុងស្រុកមួយបានឱ្យដឹងថា លោកមានការពេញចិត្តយ៉ាងខ្លាំង នឹងទឹកដមសម្លេង​របស់​បេក្ខរូបនោះ ហើយផលិតកម្មរបស់លោកបានសម្រេចផ្ដល់កិច្ចសន្យា២ឆ្នាំឱ្យលោក ប្រុក ចាន់ថន ឱ្យធ្វើ​ជា​តារាចម្រៀង។ លោកបញ្ជាក់បន្ថែមថា យ៉ាងណាក៏ដោយលោក ប្រុក ចាន់ថន នឹងមានតែមួយបទប៉ុណ្ណោះ សម្រាប់CDបើកឆាក ដោយសារតែវ៉ុលទី១ដែលគ្រោងចេញឱ្យទាន់នៅចុងខែសីហានេះ ឬដើមខែក្រោយ ខាងផលិតកម្មបានរៀបចំបទចម្រៀងពេញអស់ហើយ ។

ទស្សនិកដែលបានស្តាប់នូវសំនៀងបុរស ដែលជាជនពិការភ្នែករូបនេះ បានសម្តែងនូវការ សប្បាយចិត្ត និង​រំភើបជំនួសលោក ប្រុក ចាន់ថន ដែលលោកត្រូវបានគេផ្តល់ឱកាសឱ្យក្លាយជាអ្នកចម្រៀង។ ការផ្តល់​ឱកាស​​ឱ្យជនពិការភ្នែករូបនេះ គឺសកម្មភាពមួយដែលជួយលើកស្ទួយ និងគាំទ្រដល់ជនពិការភ្នែក។

តាមរយៈកម្មវិធី ឌឹវ័យន៍ ដែលបានចាក់ផ្សាយនៅលើកញ្ចក់ទូរទស្សន៍ហង្សមាស កាលពីយប់ថ្ងៃអាទិត្យ ទី០៣ សីហា បេក្ខជន ប្រុក ចាន់ថន មកពីខេត្តកំពង់ចាម ត្រូវបានទស្សនិកជនជាច្រើន សរសើរថា​មាន​សម្លេងសំឡេងបែបបុរាណ មានសំឡេងខ្ពស់ និងល្អជាងបេក្ខជនមួយចំនួន​ទៀត ដែលត្រូវគណកម្មការ​ទាំងបួនជ្រើសរើសឱ្យបន្តទៅវគ្គទៀត ប៉ុន្តែបេក្ខរូបនេះបែរជាធ្លាក់ទៅវិញ៕