ក្រោមកិច្ចព្រមព្រៀងកាលថ្ងៃទី២២ ខែកក្កដា ថ្នាក់ដឹកនាំកំពូលគណបក្សទាំងពីរ បានសម្រេចឯកភាព​ប្រើ​ប្រាស់រូបមន្តផ្លាស់ប្តូរសមាសភាព គជប ថ្មីទាំង៩រូប ដោយ៤រូប ជ្រើសរើសដោយគណបក្សប្រជាជានកម្ពុជា ៤រូបដោយគណបក្សសង្រ្គោះជាតិ និង១រូបទៀត ជ្រើសរើសដោយការព្រមព្រៀងរបស់គណបក្ស។ ក្នុង​អំឡុងពេលដែលសមាសភាពទាំង៩រូប មិនទាន់លេចរូបរាង កាន់ក្បាលម៉ាស៊ីនគ ជ ប ក្រុមយុវជនដែល​អះអាងថាខ្លួនមានសមត្ថភាព និងជាផ្នែកមួយ ក្នុងការបញ្ចប់ជម្លោះនយោបាយក្នុងប្រទេសកម្ពុជា បានស្នើរ​ឱ្យបញ្ចូលបេក្ខភាពរបស់ខ្លួន ក្នុងចំណោមសមាជិកទាំង៩បួននេះផងដែរ។

ក្រុមយុវជនដែលមើលឃើញថា បើទោះបីជាសមាសភាពទាំង៩រូប ដែលគណបក្សទាំងពីរ​ធ្វើការ​ជ្រើស​រើស​បានក៏ដោយ បញ្ហានយោបាយនៅក្នុងប្រទេស អាចនឹងមានជម្លោះផលប្រយោជន៍ណាមួយកើតឡើង ហេតុ​ដូចនេះ ពួកគេសូមឱ្យគណបក្សទាំងពីរ បញ្ចូលបេក្ខភាពខ្លួននៅក្នុងស្ថាប័នឯករាជ្យមួយនេះ។

ក្រុមយុវជនទាំងនោះបានលើកឡើងថា នេះជាឱកាសល្អដែលខ្លួនត្រូវធ្វើការទាមទារ ឱ្យដាក់ខ្លួនជា​សមាស​ភាពគ.ជ.ប ក្នុងចំណោមបេក្ខជនទាំង៩រូប។ ជា ធារ៉ា យុវជនមួយរូប ជានិស្សិតឆ្នាំទី៣ ផ្នែកទស្សនៈវិទ្យា នៃ​សាកល​វិទ្យាល័យភូមិន្ទភ្នំពេញ បានលើកឡើងថា៖ «ខ្ញុំចង់ឱ្យមានបេក្ខភាពជាយុវជនមួយរូប ដែល​គាត់​ចង់​បង្ហាញពីសមត្ថភាព ក្នុងការបម្រើប្រទេសជាតិ»។

ធារ៉ា បន្តថា ការជ្រើសរើសបេក្ខភាព បម្រើឲ្យគណកម្មាធិការរៀបចំការបោះឆ្នោត ជារឿងមួយដ៏សំខាន់ ប៉ុន្តែ​គណបក្សដែលមានអសនៈកៅអីក្នុងរដ្ឋសភាទាំងពីរ គួរតែសម្រេច និងពិការណាឱ្យបានច្បាស់លាស់ ជា​ពិសេសគួរតែសួរនូវមតិរបស់ប្រជាពលរដ្ឋ និងយុវជនដោយកំណត់ឱ្យដឹង​ចម្លើយមួយថា តើពួក​គាត់​ចង់​បាន​បែបម៉េច?។

កញ្ញា សុង លាងហ៊ុយ មកពិវិទ្យាស្ថានភាសាបទេស បានអះអាងដែរថា ខ្លួនក៏ចង់ឱ្យ គណបក្សទាំងពីរ​បញ្ចូលបេក្ខភាពនៅក្នុង គ ជ ប ផងដែរ ព្រោះយុវជនដែលមានអាយុពី៣៥ឆ្នាំចុះក្រោម គាត់ក៏អាចមាន​ថាមពលខ្លាំងក្លា និងធ្វើការបានល្អជាងមនុស្សដែលមានអាយុច្រើន។

លោក យ៉ង គិមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព បានគាំទ្រយ៉ាង​ពេញ​ទំហឹងចំពោះបញ្ហានេះផងដែរថា៖ «ព្រោះយុវជនជាសម្លេងមួយ យុវជនមានការប្តេជ្ញាចិត្ត យុវជនត្រូវ​ការ​នូវ​យុត្តិធម៌ច្រើន ហើយយុវជនជាមនុស្សដែលមានតម្លាភាពភាគច្រើន»។ លោកបន្ថែមថា យ៉ាងហោចណាស់​គួរតែមានសមាសភាពជាយុវជនវ័យក្មេងមួយរូប នៅក្នុងសមាសភាព គ ជ ប នោះទើបជាការប្រសើរ។

យ៉ាងណាម៉ិញ លោក យ៉ង់ គីមអេង ព្រមទាំងយុវជននឹងស្នើរអនុសាសន៍ទាំងអស់ ដែលទាក់ទង​នឹង​ការ​ដាក់​​បេក្ខភាពយុវជនទៅក្នុងសមាសភាព គ.ជ.ប ទៅកាន់គណបក្សនយោបាយទាំងពីរ​ក្នុងពេល​ខាង​មុខ​នេះ៕