គល់ បញ្ញា៖ ប្រព័ន្ធបោះឆ្នោតថ្មី ផ្ដល់ជំនឿទុកចិត្ត ៩៨% មិន«ខុសបច្ចេកទេស»
- ដោយ: ក. វិច្ចនី ដោយ ក.វិច្ចនី (ទាក់ទង៖ [email protected]) - ភ្នំពេញ ថ្ងៃទី ២០ វិច្ឆិកា ២០១៤
- កែប្រែចុងក្រោយ: November 21, 2014
- ប្រធានបទ: បោះឆ្នោត
- អត្ថបទ: មានបញ្ហា?
- មតិ-យោបល់
-
លោក គល់ បញ្ញា នាយកប្រតិបត្តិនៃអង្គការ ខុមហ្រ្វែល បានបង្ហាញពីប្រព័ន្ធបោះឆ្នោតថ្មីមួយ ដែលអាចជួយ ដល់ការចុះឈ្មោះបោះឆ្នោត និងផ្ដល់ជំនឿទំនុកចិត្តរហូតដល់ទៅ ៩៨%។ ការថ្លែងរបស់លោក បានធ្វើឡើងកាលពីថ្ងៃទី២០ ខែវិច្ឆិកានេះ នៅក្នុងសិក្ខាសាលាមួយ របស់សម្ព័ន្ធកំណែទម្រង់ការបោះឆ្នោត ហៅកាត់ថា ERA នៅចំពោះមុខអ្នកសារព័ត៌មានច្រើននាក់ តំណាងសង្គមស៊ីវិល និងតំណាងគណបក្សជាច្រើននាក់។
នាយកប្រតិបត្តិនៃអង្គការ ខុមហ្វ្រែល បានបញ្ជាក់ថា ក្រុមអង្គការសង្គមស៊ីវិលមួយចំនួន ដែលមានជំនាញខាងកាងារបោះឆ្នោត បានដកស្រង់ នូវបច្ចេកវិទ្យាមួយចំនួនពីបរទេស និងមានការសហការជាមួយអ្នកជំនាញបច្ចេកវិទ្យាផងដែរ ដើម្បីជួយដល់ប្រព័ន្ធចុះឈ្មោះបោះឆ្នោត។ បច្ចេកវិទ្យានោះ នឹងផ្ដល់នូវទំនុកចិត្ត រហូតដល់ទៅ ៩៨% ថាគ្មានឈ្មោះស្ទួន គ្មានការខុសទិន្នន័យបញ្ជីឈ្មោះបោះឆ្នោតនោះទេ ដោយសារការធ្វើកាងារនេះ វាអាចត្រួតពិនិត្យទៅលើបញ្ជីឈ្មោះស្ទួន ការខុសទិន្នន័យបាន។
បញ្ហាចុះឈ្មោះបោះឆ្នោត ឬការធ្វើបញ្ជីបោះឆ្នោត ក្នុងពេលកន្លងមក បានរងការរិះគន់ ថាបានអនុវត្តតាមវិធីសាស្ត្រចាស់គំរិល ពោរពេញទៅដោយកំហុស និងឈ្មោះស្ទួន (ឬឈ្មោះខ្មោច) បង្កឲ្យពលរដ្ឋច្រើនសិបពាន់នាក់ មិនបានទៅបោះឆ្នោត ជាពិសេសនៅក្នុងសម័យកាលបោះឆ្នោតសកលអាណត្តិទី៥នេះជាដើម។ អ្វីដែលក្រុមសង្គមស៊ីវិល កំពុងធ្វើការផ្ដួចផ្ដើម សម្រាប់អាណត្តិថ្មីនេះ មានដូចជា បញ្ជីបោះឆ្នោតថ្មី និងត្រូវបង្កើតឡើងតាមរយៈប្រេព័ន្ធចុះឈ្មោះ និងពិនិត្យបញ្ជីឈ្មោះបោះឆ្នោតបែបទំនើប គ្មានឈ្មោះស្ទួន និងកំហុសនៃការបញ្ជូនទិន្នន័យរបស់អ្នកបោះឆ្នោត និងផលិតប័ណ្ណអ្នកបោះឆ្នោតជំនួស ឲ្យការប្រើប្រាស់ឯកសារផ្សេងៗ ជាពិសេសលិខិតសំគាល់សម្រាប់ការបោះឆ្នោត ដែលត្រូវយកមកប្រើដើម្បីបានចូលបោះឆ្នោត។
លោក គួយ ប៊ុនរឿន សមាជិកជាន់ខ្ពស់របស់គណបក្សសង្រ្គោះជាតិ បានថ្លែងប្រាប់អ្នកសារព័ត៌មានថា លោកគាំទ្រទាំងស្រុងចំពោះការរៀបចំប្រព័ន្ធថ្មីនេះ។ លោកថាគណៈបក្សសង្រ្គោះជាតិ និងពិនិត្យបន្ថែមទៀត ដើម្បីរកយន្តការយ៉ាងដូចម្តេច និងសមត្ថកិច្ចបែបណា ក្នុងការទទួលខុសត្រូវឲ្យបានពេញលេញ ព្រោះថាកន្លងមក ទោះមានសមត្ថកិច្ចរបស់ គ.ជ.ប ជួយរៀបចំមែនពិត ប៉ុន្តែបានបើកផ្លូវផ្តល់សិទ្ធិអំណាច ដល់ក្រុមប្រឹក្សាឃុំសង្កាត់ ជាអ្នករៀបចំបញ្ជីឈ្មោះ ដែលបានបណ្តាលឲ្យប្រជាពលរដ្ឋមួយចំនួន មិនបានបោះឆ្នោត និងអ្នកខ្លះទៀតរកឈ្មោះបោះឆ្នោតមិនឃើញ។
សូមបញ្ជាក់ដែរថា ប្រព័ន្ធនៃការបោះឆ្នោតថ្មីនេះ គឺជាប្រព័ន្ធមួយដែលមានលក្ខណៈទំនើប ដែលប្រទេសមួយចំនួន បានអនុវត្តគោលការណ៍នេះដែរ ដូចជានៅតាមបណ្តាប្រទេសស្ថិតក្នុងតំបន់អឺរ៉ុប និងប្រទេសដែលសិ្ថតនៅក្នុងតំបន់អាស៊ីមួយចំនួន។ ជាពិសេសប្រទេសជប៉ុន ដែលកំពុងមានបំណង ចង់ជួយរៀបចំការអនុវត្តការបោះឆ្នោតថ្មីនេះ នៅកម្ពុជាំ ក៍បានអនុវត្តប្រព័ន្ធនេះ នៅក្នុងប្រទេសរបស់គេរួចហើយដែរ៕