តារាភាពយន្ដដ៏ល្បី លោក រ៉ូប៊ីន វីល្លៀម (Robin Williams) ត្រូវបានគេរកឃើញស្លាប់ ក្នុងអាយុ៦៣ឆ្នាំ នៅក្នុង​លំនៅ​ដ្ឋាន​របស់លោក ក្នុងរដ្ឋកាលីហ្វ័នី សហរដ្ឋអាមេរិក កាលពីពាក់រសៀលថ្ងៃចន្ទទី១១ ខែសីហាម្សិលម៉ិញ។ បើតាម​ការ​កត់សម្គាល់នៅនឹងកន្លែង ដោយអាជ្ញាធរបានឲ្យដឹងថា នេះជាករណីធ្វើអត្តឃាត ដោយការអត់ដង្ហើម។

តារាភាពយន្ដដ៏ល្បី លោក រ៉ូប៊ីន វីល្លៀម នៅហូលីវូដ។

តារាភាពយន្ដ - នគរបាលប្រចាំតំបន់បានប្រកាស នៅក្នុងសេចក្ដីថ្លែងព័ត៌មានមួយថា៖ «ករណីមរណភាពដ៏​តក់​ស្លុត​មួយ ត្រូវបានប្រកាសឲ្យដឹង នៅម៉ោង១២និង២នាទី ហើយត្រូវបានកំណត់អត្តសញ្ញាណបាន ជាតារាភាពយន្ដ លោក រ៉ូប៊ីន វីល្លៀម អាយុ៦៣ឆ្នាំ ក្នុងលំនៅដ្ឋាននាក្រុង ទៀប៊ូរ៉ុង ផ្នែកខាងជើងនៃក្រុង សាន់ហ្វ្រាន់ស៊ីស្កូ សហរដ្ឋ​អាមេរិក»។ មូលហេតុនៃមរណភាពនេះ ទំនងជាការធ្វើអត្តឃាត ដោយការអត់ដង្ហើម។

សេចក្ដីប្រកាសនោះ បានបញ្ជាក់ទៀតថា៖ «ការស៊ើបអង្កេតកំពុងធ្វើនៅឡើយ ទៅលើមូលហេតុ និង​ហេតុការណ៍​ដែលឈានទៅដល់មរណភាព»។ បើតាមអាជ្ញាធរ បាននិយាយថា តារាភាពយន្ដជើងចាស់ ត្រូវបានគេមើល​ឃើញ​លោកមានជីវិតចុងក្រោយ  កាលពីថ្ងៃអាទិត្យកន្លងមក វេលាម៉ោង២២ នៅក្នុងលំនៅដ្ឋាន ដែលលោករស់​ជាមួយ​នឹងភរិយារបស់លោក។

លោក រ៉ូប៊ីន វីល្លៀម ត្រូវបានគេស្គាល់នៅក្នុងតួអង្គ លោក ដាប់ហ្វាយើ (Doubfire) ដ៏ល្បីនៅក្នុងប្រវត្តិរបស់ហូលីវូដ។ ជាពិសេសនៅក្នុងរឿង Good Will Hunting ដែលលោកទទួលបានពានរង្វាន់អូស្ការ ក្នុងនាមជាតួសម្ដែងរង។ល។

ក្រោយពីរងគ្រោះ ព្រោះឈ្លក់វង្វេងនឹងគ្រឿងញៀន ម្សៅកូកាអីន នៅក្នុងទស្សវត្តន៍ឆ្នាំ៧០ និង៨០ នោះមក លោក វីល្លៀមបានធ្វើការតស៊ូថែមទៀត ប្រឆាំងនឹងសុរា និងថែមទាំងបានចូលទៅនៅជាច្រើនថ្ងៃ ក្នុងកន្លែងលត់ដំ ក្នុងឆ្នាំ​២០០៦នោះផង។ បើតាមភ្នាក់ងារផ្ទាល់ខ្លួនរបស់លោក បានឲ្យដឹងថា លោក រ៉ូប៊ីន វីល្លៀម បានប្រយុទ្ធយ៉ាងខ្លាំងក្លា ក្នុងរយៈពេលចុងក្រោយនេះ ប្រឆាំងនឹង«ភាពអស់សង្ឃឹម»ដ៏សោកសៅមួយ៕