ខណៈពេលដែលសមាជិកគ.ជ.បថ្មី ក្រោមការព្រមព្រៀងគ្នា រវាងគណបក្សជាប់ឆ្នោតធំទាំងពីរ ក្នុង​អាណត្តិ​ទី៥ ក្នុងរូបមន្តបួន+បួន+មួយ ដែលបួនរូបមកពីរគណបក្សប្រជាជនកម្ពុជា បួនរូបមកពី​គណបក្ស​សង្រ្គោះ​ជាតិ និងមួយរូបទៀតជាបុគ្គលឯករាជ្យ មិនទានលេចរូបរាងនៅឡើយ នៅថ្ងៃទី១៣ ខែសីហា ឆ្នាំ២០១៤​នេះ អង្គការសង្គមស៊ីវិលចំនួនប្រាំពីរ ដែលសុទ្ធសឹងជាអង្គការយុវជន បានគៀងគរយុវជន ដើម្បីធ្វើការ​ពិភាក្សាគ្នា ពីបញ្ហាការជ្រើរើសសមាជិកគណៈកម្មការរៀបចំការបោះឆ្នោតថ្មីនេះ។

កម្មវិធីនេះដែរ រៀបចំឡើងក្នុងគោលបំណង ទី១ ដើម្បីពិភាក្សា និងផ្តល់យោបល់អំពីលក្ខណៈវិនច្ឆ័យ និង​លក្ខណៈសម្បត្តិរបស់សមាជិ គ.ជ.ប ថ្មី។ ទី២ ការផ្តល់យោបល់ អំពីការបើកទូលាយឲ្យ​សាធារណៈជន​ពិនិត្យ និងវាយតម្លៃបេក្ខជន ដែលជាសមាជិក គ.ជ.ប ថ្មីមុនការផ្តល់សេចក្តីទុកចិត្តដោយរដ្ឋសភា។ ទី៣ រៀបចំញត្តិស្តីពីជំហរ របស់ក្រុមយុវជនលើលក្ខណៈវិនិច្ឆ័យ និងលក្ខណៈសម្បត្តិរបស់សមាជិក គ.ជ.ប ថ្មី និងការបើកទូលាយឲ្យសាធារណៈជនពិនិត្យ និងវាយតម្លៃបេក្ខជនដែលជាសម្មជិក គ.ជ.ប ថ្មីមុនការផ្តល់​សេចក្តីទុកចិត្តដោយរដ្ឋសភា និងពិភាក្សាអំពីសកម្មភាពផ្សេងទៀតរបស់ក្រុមយុវជនលើបញ្ហានេះ។

លោកជាង សុខា ប្រធានអង្គការអភិវឌ្ឍន៍ធនធានយុវជនបានលើកឡើងថា ចំពោះសមាជិក គ.ជ.ប ត្រូវ​តែបំរើផលប្រយោជន៍រួមដល់ប្រជាពលរដ្ឋ ប៉ុន្តែបេក្ខភាពរបស់គណបក្សទាំងពីរ​ ហាក់ស្ថិតនៅ​ក្នុង​ភាព​អាថកំបាំង មិនបើកចំហឱ្យប្រជាពលរដ្ឋ ដឹងអំពីសមាសភាព សមត្ថភាព និងលក្ខណៈសម្បត្តិរបស់​បុគ្គលនៅឡើយនោះទេ។

ចំណែកលោក យ៉ង់ គីមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព បានថ្លែង​យ៉ាង​ដូច្នេះថា សម្រាប់សមាភាពថ្មីនៃសមាជិកគ.ជ.ប លោកចង់បាន គ.ជ.បដែលមិនកើតចេញមក​ពីរ​ខ្សែ​ស្រឡាយសាច់ញាតិរបស់គណបក្សទាំងពីរឡើយ តែជាបុគ្គកឯករាជ្យ មានការជឿជាក់​ពីសារធារណៈជន​ទូទៅ ដែលគេមើលឃើញថា ជាមនុស្សមានតម្លាភាព មានបទពិសោធន៍ទៅលើរឿងបោះឆ្នោត ជាបុគ្គល​ដែលឈរលើការបោះឆ្នោត ជាងឈរលើគោលការណ៍បក្ស និងជាពិសេសនោះជាមនុស្ស​ដែលប្រកាន់នូវ​អព្យាក្រិត មិនលំអៀងទៅលើម្ខាងណាឡើយ។

សម្រាប់រូបមន្តបួន+បួន+មួយ ដែលជាការព្រមព្រៀងរបស់គណបក្សទាំង មន្រ្តីសង្គមស៊ីវិលរូបនេះ​បាន​បញ្ជាក់​ថា «រូបមន្តបួន+បួន+មួយហ្នឹង វាមិនមែនជាការពេញចិត្ត និងការប្រាថ្នារបស់អង្គការសង្គមស៊ីវិល​យើងនោះទេ អង្គការសង្គមស៊ីវិល ចង់ឱ្យមានការជ្រើសពីខាងក្រៅមានលក្ខណៈវិនិច្ឆ័យត្រឹមត្រូវ។ ហើយ​នេះជាឱកាស សម្រាប់យើងធ្វើការផ្តល់អនុសាសន៍ ហើយយើងសង្ឃឹមថា គណបក្សទាំងពីរហ្នឹងពិចារណារ​ទៅ អនុសាសន៍​របស់យុវជន។»

ទស្សនាវដ្ដីមនោរម្យ.អាំងហ្វូ មិនអាចសុំប្រតិកម្មពីគណបក្សនយោបាយធំទាំងពីរ ដើម្បីបកស្រាយទៅនឹង​ការលើកឡើង របស់ក្រុមអង្គការសង្គមស៊ីវិលខាងលើនេះ បាននៅឡើយ៕