ម្ចាស់ជ័យលោភីនៃកម្មវិធី Cambodia’s Got Talent ត្រូវបានគេរំពឹងថា គឺជាបេក្ខជនដែលទទួលបាន ប៉ូតុងមាសទាំង៤ កាល​ពីវគ្គដំបូង Judge Audition។ ប៉ុន្តែមិនដូច្នោះទេ អ្នកដែលទទួលបាននូវជ័យលោភី ចំណាត់ថា្នក់លេខ១ ក្នុងរដូវ​កាល​ទីមួយនេះ គឺកុមារា យឿន ពិសី។ ពិសី ត្រូវបានទស្សនិកជន យ៉ាងច្រើនលើសលប់ បោះឆ្នោតគាំទ្រឱ្យ​ទទួលបាន​ជ័យជំនះ ដ៏មហាសាលមួយនេះ។

ម្ចាសជ័យលោភីលេខ របស់កម្មវិធីនេះ ទួលបានទឹកប្រាក់១០០លានរៀល ស្រាបៀរអង្គរចំនួន៣០កេស ទឹកបរិសុទ្ធ​អង្គរ​ពូរ៉ូចំនួន១០កេស និងក្លាយទៅជាសិល្បៈករជំនាន់ថ្មី របស់ស្ថានីយ៍ទូរទស្សន៍ហង្សមាស។

ពិការភ្នែកតាំងពីកំណើត និងមានស្រុកកំណើតនៅខេត្តកំពង់ចាម កុមារ យឿន ពិសី ជាកូនទីពីរ ក្នុងគ្រួសារក្រីក្រមួយ មាន​បងប្អូន៧នាក់ និងជាសិស្សនៃសាលាអង្គការថ្មី។ «បទជីវិតក្មេងកម្សត់» ដែលម្ចាស់ជ័យលោភី អាយុ១៥ឆ្នាំរូបនេះ បាន​ធ្វើការបកស្រាយ គឺរឿងជាពិតរបស់កុមារ ដែលខិតខំតស៊ូរហូតមានថ្ងៃនេះ ហើយក៏ជាការនិពន្ធរបស់កុមារ​ផ្ទាល់​ដែរ។

ការតស៊ូ និងភាពគួរឱ្យអាណិតអាសូនេះ គឺជាផ្នែកមួយ ដែលធ្វើឱ្យកុមារទទួលបានការគាំទ្រពីទស្សនិកជន រហូត​ទទួល​បានជ័យលោភីចំណាត់លេខ១។ បើទោះបីជាការលទ្ធផលនេះ ទទួលបានការគាំទ្រ ពីទស្សនិកជនជាច្រើនក៏ដោយ ប៉ុន្តែ​វា​ហាក់មិនទទួលបាន ការពេញចិត្តពីសំណាក់អ្នកទស្សនាមួយចំនួនទៀតឡើយ។ នៅលើបណ្ដាញសង្គម ប្រិយមិត្តមួយ​ចំនួន បានលើកឡើងថា ថ្វីត្បិតតែពិសីច្រៀងបានពិរោះស្តាប់ហើយ ចង់ស្រក់ទឹកភ្នែកក៏ពិតមែន ប៉ុន្តែរូបគេមិនស័ក្ដិសម នឹងទទួលបានជ័យលោភីនេះទេ ខណៈដែលមានបេក្ខជនដ៏ទៃទៀត ត្រូវបានគេមើលឃើញថា មានសមត្ថភាព​ជាងក្មេង​ប្រុសពិការរូបនេះ។

ទស្សនិកជនម្នាក់ បានបញ្ចេញមតិមិនយល់ស្របនឹងលទ្ធផលនេះថា៖ «ហេតុអ្វីប្រជាជនខ្មែរ ចូលចិត្តយកភាពអាណិត​ជាចំបងម៉្លេះ កម្មវិធីបទពិសោធន៍ប្លែកៗ ត្រូវការអ្នកដែលមានបទពិសោធន៍ប្លែកល្អ អ្នកផ្សេងមិនងាយនឹងធ្វើបាន អ្នក​ដែល​បានប៊ូតុងមាសពីមុន បាត់ទៅណា?»

អ្នកប្រើប្រាស់ហ្វេសប៊ុកម្នាក់ទៀត បានបន្ទរជាមួយដែរថា៖ «ចាំមើលកម្មវិធីហ្នឹងថា សមត្ថភាពអស្ចារ្យប៉ុណ្ណាទៅ សំរាប់​អ្នក​លេខមួយ? ដល់លទ្ធផលចេញមក... អត់សមសោះ។ សូមទោសដែលខ្ញុំនិយាយត្រង់។ ចំពោះខ្សែជីវិតគាត់ ខ្ញុំពិតជា​មានការអាណិតខ្លាំងណាស់ ហើយសូមសរសើរចំពោះការតស៊ូរបស់គាត់។ តែបើនិយាយពីសមត្ថភាពប្រលង ជាមួយ​បេក្ខជនដទៃទៀត គាត់អត់សមទទួលលេខមួយទេ។»

ដោយឡែកទស្សនិកជនម្នាក់ទៀត បានចេញមុចការពារពិសីថា៖ «ភាពអាណិត នឹងការគាំទ្រ នោះហើយដែលហៅថា ទេពកោសល្យដែលគាត់មាន។ ដូច្នេះមិនខុសទេ ដែលប្អូនមានសមត្ថភាព ក្នុង ការបង្ហាញពីទេពកោសល្យ នឹងក្តី​ស្រម៉ៃ​របស់ប្អូន យ៉ាងណាក៏ដោយប្អូនប្រុសអនាគតនឹងភ្លឺស្វាង។» ម្នាក់ទៀតបន្ថែមថា៖ «នេះហើយជាការបញ្ជាក់ថា ប្អូន​ប្រុស​ខំប្រឹងតស៊ូមិន អត់ប្រយោជន៍ទេ។ ព្រោះ អ្នកខ្លះមិនពិការផង ក៏គ្មានសមត្ថភាពដូច ប្អូនប្រុសនេះដែរ។»។

ចំពោះអ្នកដែលទទួលបានចំណាត់ថ្នាក់លេខ២ គឺក្រុមរបស់ វណ្ណៈ និងពិសី សម្ដែងរបាំសហសម័យ «ក្បាច់ការកកើត​នៃ​សត្វនាគ» និងចំណាត់ថ្នាក់លេខ៣ បានទៅលើបេក្ខជន ហ៊ុន ប៉ែន សម្ដែងរបាំដែលនិយាយ ពីការបាត់បង់អត្តសញ្ញាណ និងការស្វែងរកអត្តសញ្ញាណ៕