ក្រោយពីបានឆ្លងកាត់ ពីមួយវគ្គទៅមួយវគ្គមក បេក្ខជន មាស មុន្នីរាជ បានឈានជើងមកដល់វគ្គ Live show សប្តាហ៍ទី៥ នាថ្ងៃ អាទិត្យ ទី៤ ខែតុលា ឆ្នាំ២០១៥នេះ នឹងត្រូវបន្តទៅសប្តាហ៍ទី៦ ជាមួយនឹង បេក្ខជន​បេក្ខនារី​ចំនួន៦រូបទៀត នៅសប្តាហ៍ខាងមុខនេះ។

នៅសប្តាហ៍ទី៥នេះ តម្រូវឲ្យបេក្ខជន និងបេក្ខនារីទាំង៧រូប ច្រៀងបទចម្រៀងមរតកដើម ដែលដកស្រង់ ចេញ​ពីខ្សែភាពយន្ត។ បេក្ខជន មាស មុន្នីរាជ ដែលមានដើមកំណើត មកពីខេត្តកណ្តាល បានបកស្រាយ បទចម្រៀងមួយបទ មានចំណងជើងថា «ស្រណោះផ្កាក្ទម្ព» ដែលដកស្រងចេញរឿង កុលាបមាសបង និងជាសំនៀងដើម របស់អធិរាជសំលេងមាស ស៊ិន ស៊ីសាមុត ។

បន្ទាប់ពីបានបកស្រាយបទចម្រៀងនេះរួច បេក្ខជន មុន្នីរាជ បានទទួលការកោតសរសើរយ៉ាងខ្លាំង ពី​សំណាក់​គណះកម្មការ ថាច្រៀងបានពិរោះ ក្នុងបទនេះ ស្តាប់ទៅគ្មានកន្លែងទាស់ មិនថាចង្វាក់ ឬការលើកដាក់​សំលេង​​ឡើយ។ ចំណែកកញ្ញា ឱក សុគន្ធកញ្ញា វិញបានសរសើរថា ទឹកដបសំលេងរបស់បេក្ខជនរូប​នេះ មាន​«ជីវជាតិ» ហើយចំណុចសំខាន់ ក្នុងបទនេះ គឺធ្វើបានល្អទាំងអស់។

រីឯអ្នកប្រើប្រាស់បណ្តាញសង្គម បាននាំគ្នាកោតសរសើរ មិនធម្មតាផងដែរ ថាបេក្ខជនរូបនេះមានសមត្ថភាព ក្នុងការបកស្រាយបទម្រៀង បានយ៉ាងពិរោះ ស្តាប់យូទៅកាន់ពិរោះ ហើយទោះជាស្តាប់ប៉ុន្មានដង ក៏មិន​ធុញ​ដែរ។ ម្យ៉ាងទៀត មុន្នីរាជ ប្រៀបបានជាពេជ្រ មិនទាន់ច្នៃ៕

---------