បើជ្រុលជាលើកដៃវាយតប់ យាជើងទាត់ធាក់ ឬទាញកាំភ្លើង មកបាញ់ហើយ ត្រូវធ្វើឲ្យល្បី! ហើយបើល្បី ត្រឹម​តែក្នុងស្រុក មិនសូវពូកែទេ ត្រូវឲ្យបរទេសចាប់អារម្មណ៍ផង ទើបហៅថា ចំជាកំពូលអ្នកខ្លាំងមែន។ ហើយ​នេះ ជាអ្វីដែលបានកើតឡើង ចេញពីទង្វើ របស់អ្នកមានប្រាក់ម្នាក់ នៅក្នុងប្រទេសកម្ពុជា ដែលរួមជាមួយ នឹង​អង្គរក្ស​​របស់​ខ្លួន បានទទួលស្គាល់​ពីការវាយតប់ ទាត់ធាក់ បោចសក់ រហូតដល់ទៅសម្រាត អតីតពិធីការិនី​ទូរទស្សន៍​មួយ​រូប ឲ្យរាបដល់ដី ហើយដែលត្រូវបានសារព័ត៌មាន នៅអ៊ឺរ៉ុបខាងលិច យកទៅចុះផ្សាយ​យ៉ាង​ព្រោង​ព្រាត ដោយ​បាន​ធ្វើការវាយតម្លៃ ហេតុការណ៍នេះ ថាជា«រឿងអាស្រូវជាតិ»។

សម្រាប់ប្រទេសបារាំង សារព័ត៌មានមិនតិចជាង១០ទេ ដែលបានដកស្រង់ករណីនេះ ចេញពីអត្ថបទរបស់​ទីភ្នាក់ងារ សារព័ត៌មានបារាំង ហៅកាត់ថា អាអេហ្វប៉េ (AFP) ដើម្បីយកមកចុះផ្សាយ និងធ្វើអត្ថាធិប្បាយ ពាសពេញ និងយ៉ាងព្រោងព្រាត។ ពីក្នុងចំណោមនោះ សារព័ត៌មានល្បីរបស់បារាំង យ៉ាងហោច​ចំនួន៥ បាន​ចុះផ្សាយ ដូចជា ឡឺហ្វីហ្គារ៉ូ (Le Figaro) ឡឺប៉ារីស្យៀង (Le Parisien) ២០នាទី (20 Minutes) ទូរទស្សន៍​ប៉ុស្ដ៍​លេខ១ (TF1) និងអ៊ូអេសហ្វ្រង់ (Ouest-France) ជាដើម។

«Scandale national មានន័យថា រឿងអាស្រូវជាតិ»

នេះជារូបផ្តិតចេញពីអេក្រង់ គេហទំព័រ របស់សារព័ត៌មាន 20 Minutes។

បន្ទាប់ពីហេតុការណ៍នេះ ដែលបានកើតឡើង នៅយប់ថ្ងៃទី១ ចូលមកថ្ងៃទី២ ខែកក្កដានោះ លោកឧកញ៉ា សុខ ប៊ុន ដែលត្រូវបានសារព័ត៌មានខាងលើ ហៅថា ជាអ្នកមានប្រាក់ និងជាអ្នកជំនួយដ៏ធំ នៅកម្ពុជា បានគេចខ្លួនបាត់​ស្រមោលសូន្យឈឹង។ ចំណែកអ្នកនាង ឯក សុជាតា ហៅកញ្ញា សាសា វិញ ដែលបានចាត់ទុកករណីនេះ ថា​ជាការប៉ុនប៉ង ធ្វើឃាតលើរូបនាងនោះ បានបង្ហោះរូបភាពជាច្រើន បង្ហាញពីរបួស នៅលើដងខ្លួននាង នៅលើ​បណ្ដាញសង្គម ធ្វើឲ្យរលកចលនាប្រឆាំង នឹងអំពើហិង្សាលើស្ត្រី បានផ្ទុះឡើងពាសពេញប្រទេស។

ជាមួយនឹងរូបភាព របួសពេញមុខមាត់ ដៃជើង វីដេអូវាយតប់ ថតជាប់ដោយកាម៉េរ៉ាសុវត្ថិភាព និងវីដេអូ​កិច្ច​សម្ភាស របស់កញ្ញា សាសា ទៅឲ្យទូរទស្សន៍ ភីអ៊ិនអ៊ិន នោះផង សារព័ត៌មានបារាំងទាំងនោះ បានសរសេរ​ថា៖ «កម្ពុជា ជាប្រទេសនៅអាស៊ីផ្នែកអាគ្នេយ៍ ដែលអំពើហិង្សាទៅលើស្ត្រី នៅតែមានលក្ខណៈ យ៉ាង​សម្បើម​ដៃ»៕