«រឿងបញ្ហាគ្រួសារទោះធំ ឫតូចយ៉ាងណា ក៍មិនចោតជាបញ្ហាអីធំដុំ នោះដែរ..!!!តែរឿងគេ ចូលជ្រៀតជ្រែកក្នុង​គ្រួសារ​នេះ បានជាបញ្ហា» នេះរៀបរាប់របស់លោក ខាត់ ចំរើន ដែលបានទម្លាយពីបញ្ហារង្គោះរង្គើ ក្នុងគ្រួសាររបស់ខ្លួន។ អស់ជា​ច្រើនឆ្នាំ រាប់ចាប់តាំងពីប្រឡូកចូលសិល្បៈ រហូតមានឈ្មោះល្បីល្បាញ ក្នុងសង្វៀនសិល្បៈ គេសង្កេតឃើញថា គ្រួសារ​ត្រកូល«ខាត់» តែងតែទទួលបាន នូវការសរសើរពីទស្សនិកជន ថាជាគ្រួសារ ដែលចេះស្រលាញ់សាមគ្គីគ្នា បើទោះបីជា​គ្រួសារនេះ មានសមាជិកច្រើនក៏ដោយ។

ប៉ុន្តែស្រាប់តែពេលថ្មីៗនេះ លោក ខាត់ ចំរើន ដែលជាកូនទី២ក្នុងគ្រួសារ បានទម្លាយចេញ នូវជម្លោះក្នុងគ្រួសារ រហូត​មាន​ការប្រើប្រាស់អំពើហិង្សា។ សារជាច្រើនរបស់លោក ខាត់ ចំរើន តារាពូកែនិយាយកំប្លុកកំប្លែង ដែលបានសរសេរ នៅ​លើទំព័រហ្វេសប៊ុករបស់លោក បានរៀបរាប់ថា បង្កឡើងដោយមនុស្សឈ្មោះ«អាប៉ោយ»។

តើ«អាប៉ោយ»ជាអ្នកណា ហេតុអ្វីបានជាមានឥទ្ធិពល ធ្វើឱ្យគ្រួសារដ៏សុខសាន្តមួយនេះ រង្គោះរង្គើ? ទស្សនាវដ្តី​មនោរម្យ.អាំងហ្វូ​មិនអាចទំនាក់ទំនង សុំការបញ្ជាក់ពីបញ្ហានេះ ពីតារាកំប្លែងនេះបានឡើយ។

អមជាមួយរូបថត ដែលបង្ហាញភាពស្និត រវាងបងប្អូនត្រកូលខាត់ទាំងពីរ គឺរូបលោកផ្ទាល់ ជាមួយអ្នកនាង ខាត់ សុឃីម តារាសំបូវោហារស័ព្ទរូបនេះ បានសរសេរថា៖ «ខ្ញូំសូមទោសបងស្រីជាចំហរ ក្រែងលោប្អូនមានប្រព្រឹត្តខុសកន្លងមក។ ប្អូនសូមឱ្យបងអធ្យាស្រ័យដល់រូបប្អូនផង.!! តែសុំបងមេត្តា ដល់ចិត្តប្អូន។ សុំបងកុំឱ្យគេដឹកមុខជ្រុលពេក អាណិតដល់​ប្អូនៗ ដែលគ្រាន់តែសុំរស់តាមក្រោយបង និងអាណិតដល់អ្នកបម្រើជំនិត ដែលតាមបងអស់រយៈពេល ជាង២០ឆ្នាំ កន្លង​ទៅនេះ។ សុំតែម្យាង (បងលុបអាប៉ាយចេញពីត្រកូលខាត់ទៅ) បើវាជាមនុស្សល្អ វាជាគ្រួសារត្រកូលខាត់ វាមិន​យករឿង​គ្រួសារ ទៅលាតត្រដាងអោយអ្នកដ៍ទៃដឹងនោះទេ។»។

លោកខាត់ ចម្រើន បានដាក់ផ្លែ ឱ្យបងស្រីខ្លួនបន្តថា៖ «គិតៗទៅ ព្រោះតែមនុស្សម្នាក់សម្ដីផ្អែម ពូកែអែបអប ចរិកគ្មាន​គេ​ប្រៀប អាចធ្វើឱ្យមនុស្សម្នាក់ទៀត ជឿលង់ ហើយហ៊ានប្រព្រឹត្រទង្វើ បែបយង់ឃ្នងវាយទាត់ធាក់ កម្រោលចូលដូច​ធ្មឹល​តិរច្ឆាន ក៍ព្រោះតែសម្ដីលាក់គំនួច ពិសពល់អុចអាលរបស់ជនម្នាក់នោះ យ៉ាងងងើល។ ខ្ញុំយល់ថា បើវាបាត់ស្ងាត់ទៅ​ហើយ ឱ្យវារសាត់តាមវាយោទៅចុះ។ តែមនុស្សសាហាវ វាមិនដែលគិតដល់ការឈឺចាប់ របស់គេនោះទេ។ វាខំប្រឹងធ្វើ​រទង្វើរសព្វបែបយ៉ាង ទោះដឹងថាត្រូវមានរឿងឈ្លោះប្រកែកគ្នា ទាំងពូជក៏ដោយ ក៏វាហ៊ានធ្វើដែរ សម្បត្តិត្រឹម​មនុស្ស​ល្មើស​គុណម្នាក់ អាចយកមកជំនួសបងប្អូន កើតចេញពីផ្ទៃម្ដាយតែមួយបាន។ សុំសរសើរ។»

អាប៉ោយ ជាប្ដីអ្នកនាង ខាត់ សុឃីម?

លោក ខាត់ ចំរើន បានសរសេរ ទាំងហួសចិត្តបន្តទៀតថា៖ «ធម្មតា ប្ដីប្រពន្ធស្រលាញ់គ្នា គឺវាជារឿងល្អណាស់។ តែបើ​ស្រលាញ់​ផ្កាប់​មុខ ផ្កាប់ចាន ផ្កាប់ឆ្នាំ ងងងឹតងងុល លែងដឹងអ្វីជាខុស អ្វីជាត្រូវនោះ តើបងប្អូនយល់យ៉ាងណាដែរ..?»៕