ឈាង វុន ប្រតិកម្ម​តប អេង ឆៃអៀង ថា​កម្ពុជា​កំពុង​អនុវត្ត​ច្បាប់​អន្តោ​ប្រវេសន៍​យ៉ាង​«សកម្ម»

ឆ្លើយតបទៅនឹង លោក អេង ឆៃអៀង ដែលចង់ឲ្យរដ្ឋាភិបាលកម្ពុជា អនុវត្តច្បាប់អន្តោប្រវេសន៍ ទៅគ្រប់ជនអន្តោប្រវេសន៍ខុសច្បាប់ទាំងអស់ ក្នុងប្រទេសនោះ មន្ត្រីជាន់ខ្ពស់របស់គណបក្សប្រជាជនកម្ពុជា បានប្រតិកម្មវិញថា ក្រសួងមហាផ្ទៃកម្ពុជា បាននឹងកំពុងតែអនុវត្ត នូវច្បាប់អន្តោប្រវេសន៍ យ៉ាងសកម្ម តាមរយៈការធ្វើជំរឿន និងមានការប្រកាសជាព័ត៌មាន ប្រចាំខែជាបណ្តើរៗ។
Loading...
  • ដោយ: អ៊ុម វ៉ារី អត្ថបទ និងយកការណ៍៖ អ៊ុម វ៉ារី ([email protected]) -ភ្នំពេញថ្ងៃទី២៥ កុម្ភៈ ២០១៥
  • កែប្រែចុងក្រោយ: February 26, 2015
  • ប្រធានបទ: អន្តោប្រវេសន៍
  • អត្ថបទ: មានបញ្ហា?
  • មតិ-យោបល់

ក្រសួងមហាផ្ទៃ បានយកចិត្តទុកដាក់ខ្ពស់ ក្នុងការជំរុញ ឲ្យមានការអនុវត្តច្បាប់អន្តោប្រវេសន៍ នៅកម្ពុជា ឲ្យមាន​ភាព​ខ្ពស់។ ហើយក្រសួងមហាផ្ទៃ នឹងរកឲ្យឃើញនូវជនអន្តោប្រវេសន៍ ដែលខុសច្បាប់ ដើម្បីធ្វើការពិចារណាថា តើនឹង​ត្រូវ​បញ្ជូនទៅយ៉ាងណា? នេះជាការលើកឡើង របស់លោក ឈាង វុន មន្រ្តីជាន់ខ្ពស់គណបក្សប្រជាជនកម្ពុជា ក្នុងកិច្ច​សម្ភាស​ជាមួយទស្សនាវដ្តីមនោរម្យ.អាំងហ្វូ កាលពីថ្ងៃទី២៥ ខែកុម្ភៈ នេះ ដើម្បីប្រតិកម្មទៅនឹងការលើកឡើង របស់​លោក អេង ឆៃអៀង អគ្គលេខាគណបក្សសង្គ្រោះជាតិ ដែលបានលើកឡើងថា កម្ពុជាមានការអនុវត្តច្បាប់អន្តោប្រវេសន៍ «ទន់ខ្សោយ មិនស្មើភាព នឹងសំដៅលើជនណា ដែលខ្លួនមិនពេញចិត្ត ឬមិនគាំទ្រ និន្នាការនយោបាយរបស់ខ្លួន» ដែល​រួមមានលោក អេឡិច ជាតិអេស្បាញ ជាដើម។

លោក ឈាង វុន ដែលជាប្រធានគណកម្មការ កិច្ចការបរទេស នៃរដ្ឋសភាអាណត្តិទីប្រាំរូបនេះ បានលើកឡើងថា ចំពោះ​ជនអន្តោប្រវេសន៍ មកពីប្រទេសមួយ ដែលមានចំនួនតិច ឬក្រោម១០នាក់ លោកបានបង្ហាញថា កម្ពុជានឹងមិនមានបញ្ហា ក្នុងការចាប់បញ្ជូនចេញទៅក្រៅ វិញនោះឡើយ។ តែបើជនអន្តោន៍ប្រវេសន៍ នៃសាសន៍ណាមួយ ដែលមានចំនួនច្រើន រហូតដល់រាប់ម៉ឺននាក់ មិនអាចបញ្ជូនទៅភ្លាមៗនោះឡើយ ត្រូវតែមានជំនួបជាមុន រវាងថ្នាក់ដឹកនាំនៃប្រទេសទាំងពីរ ដើម្បី​ពិភាក្សគ្នា (ចរចារវាងប្រទេស និងប្រទេស) លើបញ្ហានេះ។

បន្ទាប់ពីបានបកស្រាយរួច លោក ឈាង វុន បានធ្វើការវាយបកវិញ ទៅលើការលើកឡើង របស់លោក អេង ឆៃអៀង​ ថា​ជា​ការលើកឡើង ដោយគ្មានមូលដ្ឋាន។ មន្ត្រីគណបក្សប្រជាជនកម្ពុជារូបនេះ បានថ្លែងបន្តថា៖ «ពួកគាត់មិនដែលកាន់​អំណាច មិនដែលដឹងថា រដ្ឋអំណាចគេធ្វើការយ៉ាងម៉េច គាត់មិនដែលកាន់ផងហ្នឹង!។ គាត់បានតែត្រឹមមកឈរថា!»

លោកក៏ស្នើសុំផងដែរ ដល់គណបក្សប្រឆាំង ឬគណបក្សណា ឬមន្រ្តីណាមួយ ដែលចូលរួមក្នុងការអនុវត្ត និងពង្រឹង​ច្បាប់​អន្តោប្រវេសន៍បច្ចុប្បន្ននេះ សុំកុំដាក់គោលដៅ ឬលើកជាឧទាហរណ៍ ទៅ«ចំ»ជនអន្តោប្រវេសន៍ នៃសាសន៍​ណា​មួយ ដែលនាំឲ្យមានការរើសអើងពូជសាសន៍ជាដើម។ លោកសុំឲ្យមានការប្រើប្រាស់នូវពាក្យថា «គ្រប់ជាតិសាសន៍ ដែល​បានធ្វើអន្តោប្រវេសន៍ ដោយខុសច្បាប់នៅកម្ពុជា» ដែលមិនឲ្យសំដៅលើជនជាតិវៀតណាម ឬថៃជាដើម។

លោក ឈាង វុន បានថ្លែងឲ្យដឹងទៀតថា៖ «ចុះគាត់ម្តេច ក៏ប្រឆាំងតែវៀតណាម!។ លើកយកតែជនជាតិវៀតណាម មក​ធ្វើជាឧទាហរណ៍!។ (ជន)អន្តោប្រវេសន៍ មិនមែនមានតែវៀតណាមមួយឯណា ដែលមក (រស់)នៅ ដោយខុសច្បាប់​នោះ? (…) ឧទាហរណ៍ នេះហើយ ដែលជាគំនិតនោះ កុំយកសាសន៍គេមួយមកធ្វើជាឧទាហរណ៍ នោះមិនកើតទេ។ នេះ​គេ​អាចចោទយើងបាន ពីបទប្រកាន់ពូជសាសន៍ហើយ។»

» សូមអានអត្ថបទដែលទាក់ទង ដោយចុចនៅលើទីនេះ

យ៉ាងណាក៏ដោយ ក្នុងជំហរចូលរួមក្នុងការប្រយុទ្ធប្រឆាំង នឹង«វត្តមាន»នៃជនបរទេស អន្តោប្រវេសន៍ខុសច្បាប់ទាំងអស់ នៅកម្ពុជាទាំងអស់នោះ ទាំងលោក ឈាង វុន ក៏ដូចលោក អេង ឆៃអៀង មានគោលជំហរ និងកិច្ចសហប្រតិបត្តិការ​តែ​មួយ ក្នុងការអនុវត្ត និងពង្រឹងច្បាប់ ដែលមានស្រាប់ដើម្បីជាតិទាំងអស់គ្នា។ លោកទាំងពីរ បានលើកឡើងថា៖ «ការ​ពង្រឹង​វិស័យអន្តោប្រវេសន៍ ជាកិច្ចចាំបាច់ណាស់ សម្រាប់ស្រុកយើង។ អ្វីដែលមានកន្លងមកត្រូវធ្វើការ និងនាំគ្នាដោះ​ស្រាយ។ ព្រោះនេះមិនមែនជារឿងរបស់មនុស្សម្នាក់ ឬបក្សណាមួយឡើយ។ វាជារឿងរបស់ជាតិទាំងមូល ដែលត្រូវ​ធ្វើ​ការ​ជួបគ្នា ពិភាក្សាគ្នា ស្វែងរកដំណោះស្រាយ។ ការចង្អុលដាក់គ្នា គឺគ្មានដំណោះស្រាយណាមួយ ដែលអាចដោះ​ចេញ​នោះ​ឡើយ។»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...