​កង​បញ្ជា​ការ​ខណ្ឌ​សែន​សុខ​ បើក​កៀរ​រថយន្ដ​កម្មករ រួច​ចុះ​មក​ក្របួច​ក​អាវ

កម្មករ កម្មការនី មួយឡាន ដែលកំពុងធ្វើដំណើរ តាមឡានឈ្នួលមកធ្វើតេសឈាម ត្រូវបានគណៈបញ្ជាការឯកភាពរដ្ឋបាល ខណ្ឌសែសសុខ ស្ទាក់នៅកណ្តាលផ្លូវ ហើយគម្រាមម្ចាស់រថយន្តឈ្នួល ឲ្យហុចសោឡានឲ្យខ្លួន និងចង់ឲ្យរថយន្តនោះ ទៅខណ្ឌដោយគ្មានហេតុផលច្បាស់លាស់។
Loading...
  • ដោយ: ក. សោភណ្ឌ អត្ថបទ៖ ក.សោភ័ណ្ឌ ([email protected]) - យកការណ៍៖ ហេង វុទ្ធី - ភ្នំពេញថ្ងៃទី២៥ កុម្ភៈ២០១៥
  • កែប្រែចុងក្រោយ: February 25, 2015
  • ប្រធានបទ: គ្រោះថ្នាក់
  • អត្ថបទ: មានបញ្ហា?
  • មតិ-យោបល់

ការភ្ញាក់ផ្អើលមួយ បានកើតឡើង នៅវេលារសៀលម៉ោង ២និង៣០នាទី ថ្ងៃទី២៥ ខែកុម្ភៈ ឆ្នាំ២០១៥ នៅតាម​បណ្តោយ​ផ្លូវ សហព័ន្ធរុស្ស៊ី ខាងលិចស្ពានអាកាស៧មករា ប្រមាណជា៣០០ម៉ែត។ ហេតុការណ៍នេះ បង្កឡើងដោយ​រថយន្ត​ពីរ​គ្រឿង ដែលម្ខាងជារថយន្ត ធ្វើចររាចរណ៍ របស់អភិបាលខណ្ឌសែនសុខ និងម្ខាងទៀត ជារថយន្តឈ្នួល ដឹកអ្នក​ដំណើរ​មកពីខេត្តតាកែវ។ រថយន្ដទាំងពីរ បានប៉ះគ្នា បង្កឲ្យមានកាខូចខាត រថយន្តដឹកអ្នកដំណើរ ផ្នែកខាងមុខ។

សាក្សីនៅកន្លែងបានឲ្យដឹងថា រថយន្តទាំងពីរ បានបើកក្នុងទិសដៅស្របគ្នា ស្រាប់តែមកដល់កន្លែងកើតហេតុ រថយន្ត​របស់បញ្ជាការដ្ឋាន ខណ្ឌសែនសុខ ដែលគ្មានស្លាកលេខ បានកៀររថយន្តឈ្នួល ពណ៌សម្បកឪឡឹក ពាក់ស្លាកលេខ កណ្តាល 2A-5711 ដែលកំពុងបើកបរ ក្នុងទិសដូចគ្នា បណ្តាលឲ្យរថយន្តឈ្នួល រងការខូចខាតផ្នែកខាងមុខ។ សាក្សី​បាន​បន្តថា គេឃើញម្ចាស់រថយន្តខណ្ឌសែនសុខ ចាប់ទាញកអាវ ម្ចាស់រថយន្តឈ្នួល ទាំងសម្លេងសម្លុតខ្លាំងៗ ជាមួយ​នឹង​អាការៈ បង្កភាពរញេញៃលើសពីអ្វី ដែលខ្លួនកំពុងធ្វើសណ្តាប់ធ្នាប់ ទៅទៀត។

ម្ចាស់រថយន្តឈ្នួល លោក វ៉ាន់ ថន រស់នៅភូមិត្រពាំងភ្លោះ ឃុំអូរសារាយ ស្រុកត្រាំកក់ខេត្តតាកែវ បានឲ្យដឹងថា លោក​បើករថយន្ត ដឹកកម្មកកររោងចក្រ១១នាក់ ទៅធ្វើតេសឈាម ស្រាប់តែរថយន្តបង្ករខាងលើ បើកមកកៀរឡាន​របស់​លោក ហើយបានចុះមកនិយាយខ្លាំងៗ ថាឲ្យលោកប្រគល់សោឡាន ទាំងប្រើដៃទាំងពីរ ក្របួចកអាវរបស់លោកផង។ លោកបានសួរភ្លាមៗ ទៅម្ចាស់ឡានបង្កថា តើឡានលោកខុសអ្វី តែភាគីម្ខាងទៀតមិនឆ្លើយ ហើយនៅតែបង្ខំឲ្យលោក ប្រគល់សោឡានដដែល។

កម្មការិនីម្នាក់ អ្នកស្រី សោភា នៅជិះលើរថយន្តនេះដែរ បានឲ្យដឹងថា ពួកអ្នកស្រីទាំងអស់គ្នា មានសំបុត្រពេទ្យត្រឹមត្រូវ មានទាំងការបញ្ជាក់លេខ យ៉ាងច្បាស់ ចេញពីមន្ទីពេទ្យថែមទៀត។ ប៉ុន្តែអ្នកស្រីឆ្ងល់ថា ហេតុអ្វីបានជាមកចាប់ គម្រាម​កំហែងបែបនេះ ហើយឡាន មិនបានដាក់លើសចំណុះនោះទេ គឺមានគ្នាតែ១១នាក់ប៉ុណ្ណោះ។

ចំណែកឯម្ចាស់រថយន្តបង្កលោក យ៉ា សោភាន់ បាននិយាយក្នុងសម្តីធំៗ មកកាន់អ្នកសារព័ត៍មានថា លោកធ្វើការ​តាម​បញ្ជារបស់ថ្នាក់លើ គឺលោកអភិបាលរង ខណ្ឌសែនសុខឈ្មោះ ស៊ីធុល។ ហើយលោកបានប្រាប់ទៀតថា មានរថយន្ត​ច្រើនគ្រឿង តែលោកចាប់តែឡានមួយនេះ។ បុរសម្នាក់នេះ មិនបានប្រាប់ ពីហេតុផលច្បាស់លាស់នោះទេ ដោយនៅ​តែទាមទារយកសោរឡាន និងចង់យកឡានដឹកកម្មករ ទៅកាន់ខណ្ឌសែនសុខ ជាបន្ទាន់។ លោកបានស្រដីថា៖ «ការរៀបចំសណ្តាប់ធ្នាប់ តែងតែមានការប៉ះពាល់ហើយ!»។

បន្ទាប់ពីមានការឈ្លោះប្រកែកគ្នា នៅកន្លែងកើតហេតុ ម្ចាស់រថយន្តបង្ករ បានបើកឡានទៅកាន់ខណ្ឌវិញ ដោយមិន​មាន​ផ្តល់សំណងអ្វីទាំងអស់ ទៅឡានជនរងគ្រោះ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...