តើលោកអ្នក ដែលដើរកំសាន្ដ នាមាត់សមុទ្រ នៅពេលទឹកសមុទ្រនាចឬទេ? ហើយសួរថា ការដើរកំសាន្ដរបៀបនេះ លោក​អ្នកនឹងមើលឃើញអ្វីខ្លះ? ប្រាកដហើយ ថាលោកអ្នកនឹងដើររកមើល នៅតាមកន្លៀតថ្ម ឬនៅលើឆ្នេរខ្សាច់ នូវអ្វី​ដែល​គួរឲ្យចាប់អារម្មណ៍ ដូចជាសម្បកខ្ចងខ្ចៅ ត្រី ក្ដាមឬយ៉ាងហោចណាស់ អ្វីៗផ្សេងទៀត ដែលទឹកសមុទ្របាននាំមក នៅពេលទឹកជោរ។

ចំណែកស្ត្រីទេសចរណ៍ម្នាក់នេះ ក៏មិនខុសពីលោកអ្នកដែរ។ មិនត្រឹមតែប៉ុណ្ណោះ អ្នកស្រី អាំងឌ្រីស៊ី ផូស្ស៍ (Indrisie Porsche) បានឆ្លៀតឱកាស ពីពេលវេលាដ៏សប្បាយនេះ ដើម្បីថតវីដេអូ ពីក្ដាមមួយក្បាល ដែលកំពុងនៅវង្វេង នៅលើ​ផ្ទាំងថ្ម នៅឡើយ។

ប៉ុន្តែរឿងដែលមិននឹកស្មានដល់នោះ គឺមឹកមួយក្បាល ដែលលាក់ខ្លួន នៅក្នុងក្រហែងថ្មក្បែរនោះ បានលោតមកសង្គ្រប់​ចាប់​ក្ដាម ហើយបានពញ៉ាក់ស្ត្រីម្ចាស់វីដេអូ ឲ្យភ្ញាក់ផ្អើលឡើង។ ជាហេតុការណ៍ ដែលបានកើតឡើង នៅលើឆ្នេរ យ៉ាលីងហ្គព (Yallingup) ភាគខាងលិចនៃកោះអូស្ត្រាលី។ នៅក្បែរវីដេអូ ដែលបង្ហោះនៅលើយូធូប កាលពីថ្ងៃទី១៩ ខែ​កុម្ភៈ​កន្លងមក អ្នកស្រី ផូស្ស៍ បានថ្លែងសរសេរពន្យល់ថា៖ «ជាវីដេអូដ៏អស្ចារ្យជាងគេ និងមិននឹកស្មានដល់ ក្នុង​ចំណោម​វីដេអូ ដែល​ខ្ញុំ​បាន​ថត​កន្លង​មក»។

នៅពេលនេះ វីដេអូត្រូវបានមនុស្សចុចចូលមកមើល ជាង៩លានដងហើយ គ្រាន់តែនៅលើគេហទំព័រយូធូបប៉ុណ្ណោះ។ ប៉ុន្តែ នៅលើបណ្ដាញសង្គមវិញ ការចែករំលែកបន្តគ្នា និងចំនួនអ្នកចូលចិត្ត ក៏កំពុងចង់បំបែកឯកត្តកម្មយ៉ាងសម្បើមដែរ សម្រាប់​រយៈ​ពេល​ដ៏ខ្លីបែបនេះ៕