រយៈពេលបួនឆ្នាំហើយ ដែលកញ្ញា ទឹម រដ្ឋា និងបុរសជនជាតិប៉ាគីស្ថាន មានទំនាក់ទំនងជាមួយគ្នា ក៏ប៉ុន្តែបើទោះបី​ជាការស្គាល់យូរឆ្នាំហើយយ៉ាងណាក៏ដោយ អ្នកទាំងពីរនៅតែស្ថិតក្នុងការមើលចិត្តថ្លើមគ្នា និងមិនទាន់មានគម្រោង​ដឹកដៃគ្នា ចូលរោងការច្បាស់លាស់នៅឡើយទេ។

កញ្ញា ទឹម រដ្ឋា និងបុរសប៉ាគីស្ថាន។ (រូបថត ហ្វេសប៊ុក)

តារា - ភាពល្អូនល្អើនរវាងតារាម៉ូឌែលរាងខ្ពស់ស្រលះ កញ្ញា ទឹម រដ្ឋា ត្រូវបានគេមើលឃើញថា បានចាប់ផ្តើម​អស់​រយៈពេល​ប្រហែលជិត៤ឆ្នាំមកហើយ។ ប៉ុន្តែទើបតែពេលនេះទេ ដែលម្ចាស់ខ្លួនបានទម្លាយឱ្យដឹង ពីទំនាក់ទំនង​ស្នេហាមួយនេះ ក្រោយពីក្រដាសមិនអាចខ្ចប់ភ្លើងបាន និងជាលេចរូបរាងច្បាស់ និងផ្អែមល្ហែមជាងមុនទ្វេដង។

នៅក្នុងជំនួប ជាមួយនឹងអ្នកសារព័ត៌មាន ក្នុងថ្ងៃដាក់បញ្ចាំងរឿងទី១ របស់រោងភាពយន្តលំដាប់អន្តរជាតិ Major Cineplex ថ្មីៗនេះ តារាសម្តែងកញ្ញា ទឹម រដ្ឋា បានសារភាពជាលើកដំបូង ចំពោះទំនាក់ទំនងជាមួយនឹងបុរស ប៉ាគីស្ថាន​នេះ តែយ៉ាងណាតារារូបនេះបានបញ្ជាក់ថា នាងនៅមិនទាន់ហ៊ានប្រថុយដាក់ខ្លួនប្រាណរៀបការ ជា​មួយ​បុរសជាសង្សារនៅឡើយទេ ព្រោះតែនាងទើបតែស្វែងយល់ចិត្តគ្នាបាន៥០ភាគរយប៉ុណ្ណោះ។

កញ្ញាបានឱ្យដឹងទៀតថា បុរសប៉ាគីស្ថានជាសង្សារនោះ មានឈ្មោះថា Zaky ជានិស្សិតវិស្វករត្រៀមបញ្ចប់ការសិក្សា ហើយបច្ចុប្បន្នធ្វើជាអ្នកជំនួញ នាំថ្នាំពេទ្យពីប្រទេសប៉ាគីស្ថាន មកលក់នៅស្រុកខ្មែរ។ តារាបង្ហាញម៉ូត​ក្នុងក្រុម Cambodia Supermodel រូបនេះបញ្ជាក់បន្ថែមថា មកទល់បច្ចុប្បន្នចាស់ទុំបានដឹងលឺអស់ហើយ និងគ្មាន​ការរារាំង​ពី​ភាគីទាំងសងខាងនោះទេ រីឯបុរសជាសង្សាររបស់នាង ក៏បានស្គាល់គ្រួសារនាងរួចហើយដែរ មានកញ្ញា​ខ្លួនឯង​ប៉ុណ្ណោះ ដែលមិនទាន់បានជួបផ្ទាល់ ជាមួយគ្រួសារខាងប្រុសនៅឡើយ ព្រោះនៅឆ្ងាយពេក៕