ប្រព័ន្ធយុត្តិធម៌ - ប្រធានផ្នែកបច្ចេកទេសស៊ើបអង្កេត របស់អង្គការការពារសិទ្ធិមនុស្សលីកាដូ លោក អំ សំអាត បានលើកឡើងថា ស្របពេលដែលគណបក្សជាប់ឆ្នោតទាំងពីរ កំពុងតែនឹងមានគម្រោងក្នុងការចរចាគ្នានោះ ទំនង​ជាសវនាកា នៃការសម្រេចសេចក្តីរបស់អ្នកទាំង២៣ ហាក់បីជាកំពុងរងចាំមើល នូវសភាពការណ៍នៃជំនួប​រវាង​គណបក្សទាំងពីរនេះដែរ។

អំណះអំណាងចំពោះបញ្ហានេះ ត្រូវបានលោក អំ សំអាត ពន្យល់យ៉ាងដូច្នេះថា៖ «បើយើងមើលទៅ​ទិដ្ឋភាពនៃអ្នក​ទាំង២៣នេះ វាគ្រាន់តែជាចំណាត់ខ្មាំង ឬក៏កូនអុករបស់អ្នកនយោបាយ»។

លោកបន្តថា បើមើលទៅលើអង្គហេតុនេះ នៅក្នុងព្រឹត្តការណ៍នោះ មានទាំងអ្នកស្លាប់និងរបួស ត្រូវរកទាំងជនដែល​ប្រព្រឹត្ត​បទល្មើស ឱ្យមកប្រឈមមុខចំពោះមុខតុលាការដែរ ដើម្បីរកយុត្តិធម៌ដល់ជនរងគ្រោះ។ ប៉ុន្តែពេលនេះ​ ក្រៅ​តែពីមន្រ្តីសិទ្ធិអង្គការសង្គមស៊ីវិល និងកម្មករ ដែលត្រូវគេប្ដឹងឲ្យប្រឈមចំពោះមុខច្បាប់នោះ មិនមានជនដែល​ទាក់ទង​ នឹងការធ្វើឱ្យមនុស្សស្លាប់និងរបួស ណាម្នាក់ ត្រូវបានចាប់ឡើងតុលាការនោះទេ។

មន្រ្តីជាន់ខ្ពស់គណបក្សសង្រ្គោះជាតិម្នាក់ បានបង្ហើបឲ្យដឹង នៅថ្ងៃទី២២ ខែឧសភា នេះដែរថា ក្រោយពី​ការចរចា​រវាងគណបក្សទាំងពីរ បានទទួលបានជោគជ័យ និងដោះស្រាយបញ្ហា​ជាប់​គាំងរួចនោះ អ្នកទាំង២៣នាក់ ក៏នឹង​ត្រូវដោះលែងឱ្យមានសេរីភាពឡើងវិញ។ មន្ត្រីដែលនិយាយក្នុងលក្ខខណ្ឌ មិនបញ្ចេញឈ្មោះ បានថ្លែងទៀតថា៖ «វន់ ពៅ ក៏ត្រូវដោះលែងដែរ។ មិនឃើញម្សិលមិញទេ? រសេមរសាម (រញ៉េរញ៉ៃ) ពេញហ្នឹង។»។

ទាក់ទងនឹងសំនុំរឿងជនទាំង២៣នាក់នេះដែរ  ក្រុមសម្ព័ន្ធសហជីពកម្មករចំនួន៦ កាលពីថ្ងៃទី១៩ ខែឧសភា  បាន​ចេញសេចក្ដីថ្លែងការណ៍រួមមួយ ស្នើសុំទៅកាន់គណបក្សជាប់ឆ្នោតទាំងពីរ ឱ្យមានការជួបចរចាគ្នា ដើម្បីបញ្ចប់​ជម្លោះផ្នែកនយោបាយ​ និងសុំឲ្យអ្នកទាំង២៣នាក់ គួរត្រូវបានដោះលែងឱ្យមានសេរីភាព ដោយគ្មានលក្ខខណ្ឌ៕