«អាត្មាមិនអីទេ អាត្មាអាចរស់បាន តែមិនអាចគ្មាន វន់ ពៅបានទេ ដូច្នេះយើងត្រូវរួមគា្ន ទៅយកគាត់មកអោយ​បាន» នេះជាសង្ឃដីការរបស់ព្រះតេជគុណ ប៊ុត ប៊ុនតិញ ជាប្រធានបណ្តាញព្រះសង្ឃឯករាជ្យដើម្បីយុត្តិធម៌សង្គម ក្នុងការសំណូមពរអោយប្រជាពលរដ្ឋខ្មែរទាំងអស់ មកតវ៉ានៅតុលាការដំបូងរាជធានីភ្នំពេញ ដើម្បីដោះលែងលោក វន់ ពៅ និងជនជាប់ចោទដទៃដែលបានចាប់ខ្លួន កាលពីថ្ងៃទី២ ខែមករា ឆ្នាំ២០១៤ ។

ព្រះតេជគុណ ប៊ុត ប៊ុនតិញ ប្រធានបណ្តាញព្រះសង្ឃឯករាជ្យដើម្បីយុត្តិធម៌សង្គម។ (រូបថត ហ្វេសប៊ុក)

ប្រព័ន្ធយុត្តិធម៌ - វីដេអូប្រមាណជា៤០វិនាទី បានបង្ហោះនៅលើទំព័រហ្វេសប៊ុកមួយ  ដែលត្រូវបាន​គេស្គាល់ថា ជា​របស់ព្រះតេជគុណប៊ុត ប៊ុនតិញ ប្រធានបណ្តាញព្រះសង្ឃឯករាជ្យដើម្បីយុត្តិធម៌សង្គម។ ក្នុងឃ្លីបវីដេអូនោះដែរ​ក៏បានបង្ហាញពីការដោះលែងព្រះអង្គ បន្ទាប់ពីការចាប់ខ្លួនរបស់សមត្ថកិច្ចនៅខេត្តព្រះវិហារ កាលថ្ងៃទី២ ខែមករា ជាមួយមន្ត្រីអង្គការមិនមែនរដ្ឋាភិបាល ៣នាក់ទៀត ពេលព្រះអង្គនិមន្តត្រឡប់មកពីមើលដីសហគមន៍មួយកន្លែង ដែលត្រូវបានក្រុមហ៊ុនឈូសឆាយរំលោភយក។ ព្រះអង្គមានសង្ឃដីការថា «សូមញាតិញោមពុទ្ធិបរិស័ទទាំងអស់​ កុំបារម្ភពីអាត្មាអី អាត្មាត្រូវបានដោះលែងវិញហើយ»។

ក្នុងឃ្លីបវីដេអូដដែលនោះ ព្រះតេជគុណ ប៊ុត ប៊ុនតិញ បានបញ្ជាក់ពីអ្វីដែលព្រះអង្គ​មានការសោកស្តាយ​ដែល​ក្រុម​ការងាររបស់ព្រះអង្គគឺលោក វន់ ពៅ ត្រូវបានសមត្ថកិច្ចចាប់ខ្លួន ហើយត្រូវឡើងតុលាការ នៅព្រឹកថ្ងៃសុក្រនេះ។ ព្រះអង្គបានផ្ញើសារមួយ ដល់ប្រជាពលរដ្ឋខ្មែរទាំងអស់ ចូលរួមតវ៉ានៅមុខតុលាការដំបូងក្រុងភ្នំពេញ ដើម្បីអោយ​មានការដោះលែងលោក វន់ ពៅ ប្រធានសមាគមប្រជាធិបតេយ្យឯករាជ្យសេដ្ឋកិច្ចក្រៅប្រព័ន្ធ។

ព្រះអង្គមានសង្ឃដីកាទៀតថា «សូមញាតិញោម ព្រះករុណាគ្រប់ព្រះអង្គទាំងអស់ ទៅមុខតុលាការដំបូង​រាជធានី​ភ្នំពេញ ដើម្បី ជួយ វន់ ពៅ។ អាត្មាមិនអីទេ អាត្មាអាចរស់បាន តែមិនអាចគ្មាន វន់ ពៅបានទេ ដូច្នេះយើងត្រូវរួមគា្ន​ទៅយកគាត់មកអោយបាន។»

គូរម្លឹកថា លោក វន់ ពៅ ប្រធានសមាគមប្រជាធិបតេយ្យឯករាជ្យសេដ្ឋកិច្ចក្រៅប្រព័ន្ធ ត្រូវបាន​សមត្ថកិច្ចចាប់ខ្លួន រួមជាមួយអ្នកសម្របសម្រួលសម្ព័ន្ធសហគមន៍កសិករកម្ពុជា លោក ថេង សាវឿន សកម្មជនដីធ្លី និងកម្មករទាំង ១០នាក់ កាលពីថ្ងៃទី ២ ខែមករា ឆ្នាំ២០១៤ ខណៈពេលលោកទៅតវ៉ាជាមួយកម្មករ ក្នុងការទាមទារ​ប្រាក់ខែគោល ១៦០ដុល្លា នៅមុខរោងចក្រយ៉ាកជីន ដែលពេលនោះដែរកម្មករ និងសមត្ថកិច្ចបានប៉ះទង្គិចគា្ន​ទើបបណ្តាលអោយ​មាន​ការឃាត់ខ្លួននេះ។

ជាអតីតសាស្រ្តាចារ្យនៃសាកលវិទ្យាល័យបញ្ញាសាស្រ្តកម្ពុជាមួយអង្គ ព្រះតេជគុណ ប៊ុត ប៊ុនតិញ  បានបង្កើត​បណ្តាញព្រះសង្ឃឯករាជ្យដើម្បីយុត្តិធម៌សង្គមនេះឡើង ដោយសារឃើញសង្គមជាតិ​មាន​បញ្ហា មានភាពអយុត្តិធម៌ ហើយព្រះអង្គបានបោះចោលការងារស្នូលរបស់ព្រះអង្គ ជាសាស្ត្រាចារ្យ ដែលមានប្រាក់​ចំណូលជាង១ពាន់​ដុល្លារ​ក្នុងមួយខែ មកធ្វើការងារអត់ប្រាក់ខែនេះវិញ៕

---------------------------------------------------
ដោយ ៖ ក. ចាន់នីតា - ភ្នំពេញ ថ្ងៃទី០៣ ខែមករា ឆ្នាំ២០១៤
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ