មេបក្ស​ប្រឆាំង ប្ដេជ្ញា​​រក​យុត្តិធម៌​ឲ្យ​ជន​រង​គ្រោះ​នឹង​ការ​គប់​គ្រាប់​បែក

លោកសម រង្ស៊ី ប្រធានគណបក្សសង្រ្គោះជាតិ និងលោកកឹម សុខាជាអនុប្រធាន បានប្តេជ្ញាចំពោះគ្រួសារជនរងគ្រោះថា ដរាបណាលោកនៅមានដង្ហើម លោកត្រូវតែរកយុត្តិធម៌ជូនជនរងគ្រោះ ឲ្យទាល់តែបាន។
Loading...
  • ដោយ: ប្រាថ្នា
  • កែប្រែចុងក្រោយ: March 30, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

លោកសម រង្ស៊ី ប្រធានគណបក្សសង្រ្គោះជាតិ និងលោកកឹម សុខាជាអនុប្រធាន បានប្តេជ្ញាចំពោះគ្រួសារ​ជន​រងគ្រោះថា ដរាបណាលោកនៅមានដង្ហើម លោកត្រូវតែរកយុត្តិធម៌ជូនជនរងគ្រោះ ឲ្យទាល់តែបាន។


ចេតិយសម្រាប់ឧទ្ទិសឲ្យជនរងគ្រោះនឹងការគប់គ្រាប់បែក នៅថ្ងៃទី៣០ ខែមីនា ឆ្នាំ១៩៩៧។ (រូបថត MONOROOM.info/ O. Vary)

ប្រព័ន្ធយុត្តិធម៌ - ថ្លែងទៅកាន់អ្នកគាំទ្រនាថ្ងៃទី៣០ ខែមិនា ឆ្នាំ២០១៤នេះ ដែលជាថ្ងៃរំលឹកខួបទី១៧នៃ​ព្រិត្តិការណ៍​គប់បែក នៅមុខអតីតរដ្ឋសភា ក្រោយពីបានសម្តែងការសោកស្តាយ  លោក សម រង្ស៊ី បានអះអាងថា «ឥលូវនេះ ជា​ឆ្នាំពិសេស ខ្ញុំមិនដែលមានសង្ឃឹមខ្លាំងជាង ឆ្នាំនេះ ពេលនេះ ឆ្នាំ២០១៤នេះ ខ្ញុំមានជំនឿថាពន្លឺយុត្តិធម៌ មកដល់​ហើយ​បងប្អូន»។

ចំពោះអំណះអំណាង ដែលប្រធានគណបក្សប្រឆាំងមួយនេះ បានធានាអះអាងទៅកាន់អ្នកគាំទ្រខ្លួន ដោយយោង​ទៅលើហេតុផលថា ចំនួននៃប្រជាជន ដែលគាំទ្រការដឹកនាំ របស់គណបក្សសង្រ្គោះជាតិ កាន់តែមានសន្ទុះខ្លាំង និងករណីមួយទៀត តុលាការបារាំងបានចាត់ចៅក្រមថ្មីមួយ ដើម្បីពន្លឿនការស៊ើបអង្កេតនេះ ដូច្នេះក្រោមការដឹកនាំ​របស់ចៅក្រមថ្មីនេះ ការស៊ើបអង្កេតរបស់អាជ្ញាធរបារាំង នឹងអាចចាប់ជនល្មើសបានឆាប់ៗ។

ប្រធានក្រុមស៊ើបអង្កេត របស់សមាគមការពារសិទ្ឋិមនុស្សអាដហុក លោកចាន់ សុវ៉េត បានលើកឡើងថា ជនល្មើស​ដែលបានគប់គ្រាប់បែក នៅមុខអតីតរដ្ឋសភា បាននៅក្រៅសំណាញ់ច្បាប់១៧ឆ្នាំហើយ រីឯការលើកឡើង​របស់​លោកសម រង្ស៊ី ថាបារាំងបានទទួល ពាក្យបណ្តឹងនោះ មិនដឹងថាតើវាមានប្រសិទ្ធភាពប៉ុណ្ណានោះទេ ព្រោះប្រទេស​បារាំងជាប្រទេសផ្សេងពីកម្ពុជា ហើយបារាំងក៏មិនមែនជាប្រទេសមួយ ដែលមានឥទ្ធិពល ឬលទ្ធភាពមកធ្វើកិច្ចការ នៅក្នុងប្រទេសកម្ពុជាដែរ។ លោកបន្តថា «យើងហាក់បីដូចជាមានការរំពឹងគិតដែរ តែវាជាស្រមោល តែបើថា យក​ជាការជាក់ស្តែងហាក់បីដូចជានៅមានកំរិតនៅឡើយ យើងមិនទាន់មានការជឿជាក់មួយរយភាគរយទេ ព្រោះ​រយៈពេល​វាយូរហើយ»។

មន្ត្រីឃ្លាំមើលសិទ្ឋិមនុស្ស លោក ចាន់ សុវ៉េត បានបញ្ជាក់បន្ថែមថា បទល្មើសមួយនេះជាបទល្មើសព្រហ្មទណ្ឌ វាមាន​អាជ្ញាយុកាល។ ប៉ុន្តែបើមានការរួមសហការ និងឆន្ទះពីសំណាក់រដ្ឋាភិបាលកម្ពុជានោះ គេ អាចសង្ឃឹមថា នឹងធ្វើ​កិច្ចការ​នេះបាន។ លោកមើលឃើញថា ដល់ពេលបច្ចុប្បន្ន អាជ្ញាធរដែលគ្រប់គ្រងដោយរដ្ឋាភិបាលកម្ពុជា ហាក់បី​ដូច​ជាអត់មាននណារមួយធ្វើការងារអោយបានពេញលេញ ដើម្បីរកយុត្តិធម៌ជូនជនរងគ្រោះ នៅក្នុងរឿងបំផ្ទុះ​គ្រាប់​បែកនេះទេ។ សំរាប់មន្រ្តីសង្គមស៊ីវិលរូបនេះបានចាត់ទុកថា អំពើគប់គ្រាប់បែកកាលពីឆ្នាំ១៩៩៧នេះ ថាជាទម្រង់នៃ​អំពើនិទន្ទភាពនៅកម្ពុជា មុនដំបូងគេបំផុត។

បើទោះជាតុលាការបារាំង អាចនឹងគ្មានឥទ្ធិពលសម្រាប់ការអនុវត្តសាលក្រម នៅក្នុងប្រទេសកម្ពុជា តែសម្រាប់​លោក កឹម សុខា អនុប្រធានគណបក្សសង្រ្គោះជាតិវិញ លោកបានបង្ហាញជំនឿចិត្តខ្លាំង ថានៅមាន​តុលាការ​អន្តរជាតិ មានដូចជាតុលាការឧក្រិដ្ឋកម្មអន្តរជាតិផ្សេងទៀតជាដើម ដែលអាចរកយុត្តិធម៌ឲ្យជនរងគ្រោះបាន។ លោក​បាន​ថ្លែង​ទៀតថា «ខ្ញុំមានក្តីសង្ឃឹមថាថ្ងៃណាមួយ ឃាតករ​ដែលសំលាប់ នឹងដេកក្នុងគុកជាមិនខាន។»

អតីតប្រធានគណបក្សសិទ្ធិមនុស្សរូបនេះ បានថ្លែងបញ្ជាក់ដែរថា «ទោះបីយើងមិនទាន់រកឃើញ បង្ហាញមុខនូវ​ឃាតករ​ពិតប្រាកដហើយក៏ដោយ ក៏ពិភពលោកក៏ដូចជាប្រជារាស្រ្តខ្មែរដឹងហើយ ថានណាជាឃាតករ។ យើងដឹង​ច្បាស់ថា នណារជាឃាតករ ប៉ុន្តែក្នុងថ្ងៃនេះ ដោយសារឃាតករនៅមានអំណាចនៅឡើយ មិនទាន់បាត់បង់អំណាច ដូច្នេះហើយ ដោយសារសង្គមរបស់យើងតុលាការមិនមានយុត្តិធម៌ យើងមិនទាន់ចាប់យកឃាតករទាំងនោះ យក​មក​ផ្តន្ទាទោសអោយបានពេញចិត្ត របស់វិញ្ញាក្ខន្ធវិរៈបាតុករយើងបាន។»៕

-----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី ៣០ មិនា ២០១៤

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...