យន្ដហោះយោធារបស់ចិន ដែលបានហោះពីលើតំបន់រុករក ដែលសង្ស័យថាជាទីកន្លែងធ្លាក់របស់យន្ដហោះ ប៊ូអីង ៧៧៧ នៃជើងហោះហើរ MH370 នោះ បានរកឃើញវត្ថុអណ្ដែតនៅលើទឹកសមុទ្រចំនួនបី ក្នុងនោះវត្ថុចំនួនពីរ មាន​ពណ៌ដូចទៅនឹងពណ៌យន្ដហោះដែលបានបាត់។ អាជ្ញាធរនៅមិនទាន់បញ្ជាក់អះអាងបានភ្លាមៗ ពីអត្តសញ្ញាណ​របស់វត្ថុដែលទើបនឹងមើលឃើញនេះ ថាអាចមានការជាប់ពាក់ព័ន្ធ នឹងការស៊ើបអង្កេតនោះនៅឡើយ។

វត្ថុអណ្ដែតនៅលើទឹក ដែលថតឃើញ និងតំបន់រុករកយន្ដហោះបាត់ខ្លួន។ (រូបថត Reuters)

បាត់យន្ដហោះ - ទីភ្នាក់ងារសារព័ត៌មានចិន ស៊ីនហួរ បានរាយការណ៍ឲ្យដឹងថា យន្ដហោះយោធាប្រភេទ Ilyushin IL-76 បានរកឃើញវត្ថុអណ្ដែតនៅលើផ្ទៃទឹកចំនួនបី បន្ថែមទៀត បន្ទាប់ពីយន្ដហោះ និងនាវាជាច្រើនដែលបានប្ដូរ​ទីតាំងរុករុក មកជិតតំបន់ឆ្នេររបស់ប្រទេសអូស្ត្រាលីនោះ បានរកឃើញនូវវត្ថុអណ្ដែតជាច្រើនដែរនោះ។ ប៉ុន្តែយ៉ាង​ហោចណាស់ ក៏នៅលើកនេះ វត្ថុដែលមើលឃើញ មិនមែនជាលទ្ធផលនៃការថតឆ្លុះឃើញ របស់ប្រព័ន្ធផ្កាយ​រណប​ដូចមុនៗនោះទេ។

នៅក្នុងជំនួបមួយ នៅថ្ងៃសៅរ៍ទី២៩ ខែមីនា ក្នុងសណ្ឋាគារមួយក្បែររដ្ឋធានីកូឡាឡំពួរ ជាមួយក្រុមគ្រួសារ នៃអ្នក​ដំណើរក្នុងយន្ដហោះ ប៊ូអីង ៧៧៧ ដែលបានបាត់ខ្លួនតាំងពីបីសប្ដាហ៍មកនោះ រដ្ឋមន្ត្រីក្រសួង​ដឹកជញ្ជូន​ម៉ាឡេស៊ី លោក ហ៊ីស្សាមូឌីន ហ៊ូសេន (Hishammuddin Hussein) បានប្រកាសឲ្យដឹងថា លោកនៅមិនទាន់បានដឹង​ពីអ្វី​ឲ្យ​ច្រើន ទាក់ទងនឹងវត្ថុដែលត្រូវបានឃើញជាតម្រុយ ក្នុងបេសកកម្មរុករកដ៏អាថ៌កំបាំង។ វត្ថុដែលបានមើលឃើញ នៅមិនទាន់ត្រូវបានកំណត់អត្តសញ្ញាណបានថា វាពិតជាបំណែករបស់យន្ដហោះបាត់ខ្លួន នោះឬគ្រាន់តែជា​កម្ទេច​កម្ទីដែលធ្លាក់ក្នុងសមុទ្រប៉ុណ្ណោះ នោះនៅឡើយទេ។

លោករដ្ឋមន្ត្រីដែលមានវត្តមានរួមជាមួយភរិយា និងកូនរបស់លោកផង បានពន្យល់ថា លោកត្រូវតែរងចាំរហូត​ដល់​វត្ថុទាំងនោះ ត្រូវបានយកត្រឡប់មកវិភាគសិន មុននឹងធ្វើសេចក្ដីសន្និដ្ឋាន។

អាជ្ញាធរដែនសមុទ្ររបស់ប្រទេសអូស្ត្រាលី បានបញ្ជាក់ដូចគ្នាថា គេអាចនិយាយថាវត្ថុទាំងនោះ មានជាប់​ទាក់​ទង​នឹងយន្ដហោះនៃជើងហោះហើរ MH370 លុះត្រាតែវត្ថុទាំងនោះត្រូវបានរកឃើញ និងយកត្រឡប់មក​ធ្វើការ​វិភាគ​ជាមុន។ តែអាជ្ញាធរអូស្ត្រាលីដដែល ក៏បានបន្ថែមទៀតថា បរិមាណនៃកាកសំណល់រាយប៉ាយនៅក្នុងតំបន់នេះ ដែលអាចមកពីសកម្មភាពនេសាទសមុទ្រនោះ ក៏នៅមិនទាន់មានរបាយការណ៍ណាមួយមកបញ្ជាក់ដែរ។

យន្ដហោះដែលភ្ជាប់ជើងហោះហើរ MH370 ពីរដ្ឋធានីកូឡាឡំពួរ ឆ្ពោះទៅកាន់រដ្ឋធានីប៉េកាំង បានងាកចេញ​ពីផ្លូវ​ដើម នៅក្រោយបន្តិចពីពេលយន្ដហោះបានបង្ហើបជើង ចេញព្រលានយន្ដហោះ​អន្តរជាតិរបស់​ប្រទេស​ម៉ាឡេស៊ី។ ក្រុមអ្នកស៊ើបអង្កេត នៅមិនទាន់ច្បាស់នៅឡើយថា មានរឿងអ្វីពិតប្រាកដបានកើតឡើង បង្កឲ្យមានហេតុការណ៍​ដ៏សោកសៅនេះ។ ប៉ុន្តែការរកឃើញចុងក្រោយ ត្រូវបានទម្លាយឲ្យដឹងថា គ្រោះថ្នាក់យន្ដហោះនេះ ជាបញ្ហា​បច្ចេកទេសដែលបណ្ដាលមកពីការចាប់ពង្រត់មិនបានសម្រេច ក្នុងនោះអាចមានការសង្ស័យ ពីអំពើភេវរកម្ម និង​ក្ដីអស់សង្ឃឹមរបស់អ្នកបើកបរយន្ដហោះណាម្នាក់៕

-----------------------------------
ដោយ សេក មនោរកុមារ (ទំនាក់ទំនង៖ [email protected]) - ប៉ារីស​ ថ្ងៃទី២៨ មីនា ២០១៤