ការសាងសង់ស្ថានីប្រេងសាំងសូគីម៉ិចមួយស្ថិតក្នុងខេត្តបាត់ដំបង ដែលនៅមិនឆ្ងាយប៉ុន្មាន ពីរង្វង់មូលតាដំបង​ក្រញូង ត្រូវបានមន្រ្តីម្នាក់នៃការិយាល័យសុរិយោដីខេត្តបាត់ដំបង លើកឡើងថា ការសាងសង់នោះខុសច្បាប់ ព្រោះ​តែអ្នកជំនាញ(ក្រុង) មិនទាន់អនុញ្ញាតិឲ្យសាងសង់ទេ តែម្ចាស់ស្ថានីយ៍កំពុងបន្ដការសាងសង់របស់ខ្លួន។ មន្រ្តី​រូប​នេះ បានលើកជាការសន្និដ្ឋានរបស់ខ្លួនថា ប្រហែលជាមានការអន្តរាគមន៍ពីថ្នាក់ខេត្ត។

បង្គោលផ្លាកបង្ហាញរបស់ក្រុមហ៊ុនប្រេង ស៊ូគីម៉ិច។ (រូបថត MONOROOM.info/ D. KEO)

វិវាទ - ការបែកធ្លាយភាពមិនប្រក្រី ដែលអាចលើកជាបញ្ហាមកថាមានអំពើពុករលួយ កំពុង«លាក់»ខ្លួននៅក្នុងនោះ តាមរយៈភាពស្ងៀមស្ងាត់ ដោយមិនបានបែងចែកចំណែកគ្នារវាងថ្នាក់លើ និងថ្នាក់ក្រោម។ ជាក់ស្តែងកើតចេញ​ពី ការកសាងស្ថានីយ៍ប្រេងសាំងមួយ ស្ថិតក្នុងភូមិរំចេកបួន សង្កាត់រតនៈ ក្រុងបាត់ដំបង ខេត្តបាត់ដំបង នៅកែង និង ជិតរង្វវង់មូលតាដំបងក្រញូង ដែលបច្ចុប្បន្នកំពុងបន្តការសាងសង់របស់ខ្លួន ប្រកបដោយលក្ខណៈបច្ចេកទេស​ទំនើបនោះ ប្រហែលដោយសារមានការអនុញ្ញាតិពីសាលាខេត្ត ព្រោះថាមន្រ្តីជំនាញនៅមិនទាន់បានអនុញ្ញាត​ក្នុង​ការសង់នេះនៅឡើយទេ។ នេះជាការបញ្ជាក់ ពីមន្រ្តីនៃការិយាល័យសុរិយោដីខេត្តបាត់ដំបង ក្នុងលក្ខខណ្ឌមិន​បញ្ចេញឈ្មោះ។

មន្រ្តីនៃការិយាល័យសុរិយោដីខាងលើ បានបន្ថែមថា ការសាងសង់ស្ថានីយ៍សាំងនេះ អាចមានការ​លាក់​លៀម នូវ​លាភសក្ការៈជាប្រយោជន៍បុគ្គល នៃអ្នកមានអំណាចណាម្នាក់។ មន្ត្រីរូបនោះនៅតែចាត់ទុកថា ជាការការសាងមួយ​ដោយសង់ខុសច្បាប់ ខុសបច្ចេកទេស ព្រោះតែមិនមានការអនុញ្ញាតិពីខាងជំនាញ។ ទោះយ៉ាងណាក៏ដោយ លោក​នៅតែចាត់ទុកថា ការសាងសង់ស្ថានីយ៍សាំងនោះនៅតែខុសច្បាប់ ដោយលោកសម្អាងដូច្នេះថា៖ «ក្រសួងបាន​ចេញលិខិតមួយ ទៅអភិបាលខេត្តកំណត់នូវទីតាំងឈប់ផ្តល់ លិខិតអនុញាតិសាងសង់ និងបញ្ឈប់ការសាងសង់​ការ៉ាសសាំង។ តែខាងខេត្តនៅមិនទាន់បានកំណត់ទីតាំងនោះ នៅឡើយទេ ។ នោះការរ៉ាសសាំងនោះ ត្រូវធ្វើឡើង​ដោយមិនទាន់មានច្បាប់។»

ប្រធានមន្ទីររៀបចំដែនដី នគរូបនីយកម្ម សំណង់ និងសូរិយោដីខេត្តបាត់ដំបងលោក អ៊ូ ដារី បញ្ជាក់ថា ស្ថានីយ៍​សាំងនោះ ត្រូវបានសាងសង់ឡើងដោយមានច្បាប់ត្រឹមត្រូវ ជាមួយនឹងការបំពាក់គ្រឿងបច្ចេកទេស ទៅតាមច្បាប់​អនុញាតិរបស់ក្រសួង។ លើកឡើងស្របគ្នានិងលោក អ៊ូ ដារីនេះដែរ អនុប្រធានប្រធានមន្ទីររៀបចំដែនដី នគរូបនីយកម្ម សំណង់ និងសូរិយោដីខេត្តបាត់ដំបងលោក សួន សុភា បានបន្ថែមថា មានការឯកភាពពីមន្ទីរ និង​បញ្ជូនទៅខេត្ត ចេញពីខេត្តទៅក្រសួង ទើបសម្រេចចេញជាច្បាប់អនុញាតិ។

ទស្សនាវដ្តីមនោរម្យ.អាំងហ្វូ មិនអាចសុំការបញ្ជាក់ពីលោក ថោង សុភក្រ្តា ជាម្ចាស់ស្ថានីយ៍ប្រេងសាំងនោះ លើ​ការ​ចោទប្រកាន់ពីមន្រ្តីការិយាល័យខាងលើបានទេ ដោយមិនអាចភ្ជាប់ទំនាក់ទំនងបាន។

មន្រ្តីនៃការិយាល័យសុរិយោដី ដែលជាប្រភពមិនបញ្ចេញឈ្មោះខាងលើ បានថ្លែងបញ្ជាក់ពីហេតុផលជុំវិញការមិន​ទាន់អនុញ្ញាតឲ្យស្ថានីយ៍នេះសាងសង់នោះ ដោយមើលឃើញថា​អាចមានហានិភ័យ ប៉ះពាល់ដល់សុវត្ថិភាព​កូន​សិស្ស បើសិនជាអាចមានហេតុការណ៍ណាមួយ​កើតឡើងដោយ​ចៃដន្យ តាមរយៈការផ្ទុះ និងហៀរប្រេង​សាំងទាំង​នោះ និងអាចមានការឆាបឆេះខ្លាំង ណាមួយនៅទីប្រជុំជន និងជិត​សាលារៀនចំនួនប្រាំទៀត។

ដោយឡែកទាក់ទងនិងសុវត្តិភាពសិស្ស ដែលមានទីតាំងនៅក្បែរសំណង់ស្ថានីយ៍សាំងនោះ  នាយកវិទ្យាល័យ​នេតយ៉ង់ លោក សេង គុណ និងនាយកសាលាបឋមសិក្សាសម្តេច ជា ស៊ីម លោកទ្រី ហាក់ បានបង្ហាញតាម​កិច្ច​សម្ភាសជាមួយទស្សនាវដ្តី​មនោរម្យ.អាំងហ្វូ ថាលោកមិនមានការព្រួយបារម្មណ៍ ចំពោះហានិភ័យដែលកើត​ចេញ​ពីស្ថានីយ៍សាំងនោះខ្លាំងណាស់ណាទេ ព្រោះយ៉ាងហោចណាស់សាលារបស់លោកស្ថិតនៅផ្នែកម្ខាងទៀតនៃផ្លូវ ដែលមានចំងាយជាង៥០ម៉ែត្រពីស្ថានីយ៍សាំងនោះ។

ជាទស្សនៈផ្ទាល់របស់នាយកសាលាវិទ្យាល័យនេតយ៉ង់លោក សេង គុណ បានបង្ហាញថាតាមផ្លូវច្បាប់ មិនអាច​សាងសង់ស្ថានីយ៍សាំងនៅក្នុងទីក្រុង ឬទីប្រជុំជននោះទេ ព្រោះវាមានហានិភ័យខ្ពស់បំផុត។ លោកបានពន្យល់ថា ក្នុងទីក្រុងមានផ្ទះច្រើន នៅជាប់គ្នាៗ បើមានការឆាបឆេះនោះមានការពិបាក និងខូចខាងច្រើន។ «និយាយពី​រឿង​បច្ចេកទេស តាមលក្ខណៈវិទ្យាសាស្រ្តវិញ វាមិនត្រូវ ព្រោះការ៉ាសសាំងត្រូវនៅដាច់តែឯងក្នុងដីឡូតិ៍ណាមួយ។ (...) បើអាជ្ញាធរដែនដីអាចបញ្ជៀសបាន គួធ្វើលើដីឡូតិ៍ណាមួយ នៅជាយក្រុងបន្តិចទៅ។ (...) បើមានហេតុការណ៍អ្វី​កើតឡើង (វា)មិនមានការប៉ះពាល់ ឬរំខានដល់ប្រជាពលរដ្ឋ ដល់សាលារៀន ឬស្ថាប័នរដ្ឋផ្សេងៗទៀតនោះទេ។ បើសង់នៅជាយក្រុង បានជាការល្អណាស់៕»

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី២៩ មីនា ២០១៤