រហូតមកដល់ថ្ងៃនេះ ដោយមិនមានការកោះហៅពីខាងសាលាដំបូងរាជធានីភ្នំពេញ បន្ទាប់ពីជនរងគ្រោះ៧នាក់ ពី​ការបង្រ្កាបយ៉ាងហិង្សា បានដាក់ពាក្យបណ្តឹងប្តឹងអភិបាលខ័ណ្ឌ៧មករា និងគូកនមួយចំនួនទៀតនោះមក ប្រជា​សហគមន៍បូរីកីឡា និងបឹងកក់ បាននាំគ្នាមកតវ៉ា នៅខាងមុខសាលាដំបូង នៅថ្ងៃនេះ។ ក្រុមប្រជាអ្នកតវ៉ា​ទាំងនេះ បាន​ប្ដេជ្ញាថា ពួកគេនឹងត្រឡប់មកវិញ ប្រសិនណាជាតុលាការមិនឯករាជ្យ ឬមិនចាត់វិធានការ​លើពាក្យ​បណ្ដឹង​របស់​ក្រុមខ្លួន។

ប្រជា​សហគមន៍បូរីកីឡា និងបឹងកក់ នៅមុខសាលាដំបូងរាជធានីភ្នំពេញ ថ្ងៃទី១៩ ខែមីនា ឆ្នាំ២០១៤។ (រូបថត MONOROOM.info/ S.Tith)

ប្រព័ន្ធយុត្តិធម៌ - នៅម៉ោង ៩ព្រឹកនេះ មន្ត្រីសាលាដំបូងរាជធានីភ្នំពេញ បានអនុញ្ញាតឲ្យតំណាងម្ចាស់បណ្តឹង នៅ​សហគមន៍បុរីកីឡា ៤ នាក់ ចូលជួប ខណៈពេលប្រជាសហគមន៍បុរីកីឡា និងបឹងកក់ ប្រមាណជិត១០០នាក់ បាន​ប្រមូលផ្តុំគ្នា​តវ៉ានៅព្រឹកថ្ងៃទី១៩ ខែមិនា ឆ្នាំ២០១៤នេះ នៅសាលាដំបូងរាជធានីភ្នំពេញ ក្នុងគោលបំណង​ទាមទារឲ្យ​តុលាការពន្លឿន ការដោះស្រាយបណ្តឹងរបស់ក្រុមខ្លួន។ ស្រ្តីបូរីកីឡា៧នាក់ ដែលរងអំពើហឹង្សាពីសំណាក់អាជ្ញាធរ កាលពីថ្ងៃទី១៤ ខែកុម្ភៈ កន្លងទៅ បានប្តឹងអាជ្ញាធរខណ្ឌ៧មករា ពីបទប្រើហិង្សាលើប្រជាសហគមន៍បុរីកីឡា ជា​ពិសេសស្ត្រីមានផ្ទៃពោះ និងស្រ្តីទើបសំរាលកូនរួច។

តំណាងសហគមន៏បូរីកីឡា និងជាម្ចាស់បណ្តឹងម្នាក់ ក្នុងចំណោមម្ចាស់ទាំង៧នាក់ អ្នកស្រី ឆាយ គីមហ៊ន បាន​បញ្ជាក់ក្រោយជំនួបជាមួយ ព្រះរាជអាជ្ញាសាលាដំបូងរាជធានីថា តុលាការសុំពេលបីអាទិត្យទៀតដើម្បីរៀបចំ និង​ដោះស្រាយពីពាក្យបណ្តឹងរបស់អ្នកស្រី។ អ្នកស្រីបានអោយដឹងទៀតថា «ឥលូវនេះគាត់កំពុងតែរៀបចំ។ គាត់ថា គាត់នឹងព្យាយាមអោយលឿនបំផុតរយៈពេល ពីសប្តាហ៍ទៅបីសប្តាហ៍ទៀត។ ហើយអ្វីដែលពួកគាត់សរសេរ ទៅ​ក្នុងសំនុំរឿងរបស់ពួកខ្ញុំ ប្រសិនបើខុសពាក្យបណ្តឹងដែលពួកនាងខ្ញុំប្តឹង គាត់ថាអោយពួកខ្ញុំដែលប្តឹងហ្នឹង លើក​គ្នា​មកជេ​គាត់ចុះ ប្រសិនបើតុលាការមិនភាពឯករាជ្យ ទោះបីជាជេយ៉ាងម៉េចក៏ដោយក៏គាត់មិនប្រកាន់ទាំងអស់។»

អ្នកស្រីបញ្ជាក់បន្ថែមថា «ប្រសិនបើបីអាទិត្យ នៅតែគ្មានដំណោះស្រាយលើរឿងហ្នឹង ពួកនាងខ្ញុំនឹងលើកគ្នា​មក​ទៀត ខ្ញុំមិនអាចរងចាំគាត់បន្តទៅទៀតទេ។»

យ៉ាងណាក៏ដោយ បើទោះបីជាតំណាងព្រះរាជអាជ្ញា អះអាងយ៉ាងដូច្នេះក៏ដោយ ប៉ុន្តែម្ចាស់បណ្តឹងរូបនេះ នៅតែ​បង្ហាញពីការមិនជឿជាក់ ទៅលើតុលាការថា «ទោះបីជាតុលាការនិយាយ អោយពួកខ្ញុំមានភាពទុកចិត្ត​យ៉ាងណាក៏​ដោយ ក៏ពួកខ្ញុំនៅគ្មានភាពជឿជាក់ដែរ»។ អ្នកស្រី ឆាយ គីមហ៊ន បានប្ដេជ្ញាថា នឹងធ្វើការដាក់ពាក្យបណ្តឹង ជាបន្ត​បន្ទាប់ទៅតាមស្ថានទូត ដើម្បីអោយស្ថានទូតទាំងនោះ ជួយអន្តរាគមន៍។

រីឯលោក ពេជ្រ លឹមឃួន ដែលឈរទាមទារជាមួយប្រជាពលរដ្ឋ នៅមុខសាលាតំបូងនោះ បានអះអាងដែរថា «បើ​រឿង​នេះមិនសម្រេច យើងនឹងធ្វើការទាមទារជាបន្តទៀត យើងនឹងការពាក្យបណ្តឹងទៅ អង្គការសហប្រជាជាតិទៀត អោយលោកជួយរកយុត្តិធម៌»។

ទស្សនាវដ្ដីមនោរម្យ.អាំងហ្វូ នៅមិនអាចទាក់ទង ព្រះរាជអាជ្ញាសាលាដំបូងរាជធានី ដើម្បីសុំការបកស្រាយ​បាន​នៅឡើយ។

គួរម្លឹកថា កាលពីថ្ងៃទី១១ ខែមិនា ឆ្នាំ២០១៤ ស្រ្តីនៅសហគមន៍បូរីកីឡា៧នាក់ ដែលទទួលរងអំពើហិង្សា ក្នុងពេល​បង្រ្កាបកាលពីថ្ងៃទី១៤ ខែកុម្ភៈកន្លងទៅ បានដាក់ពាក្យប្តឹងអភិបាលខណ្ឌ៧មករា លោកសោម សុវណ្ណ លោកលឹម សុភា អភិបាលរងខណ្ឌ៧មករា លោក ប្រាក់ ហាក់ ប្រធានសន្តិសុខខណ្ឌ៧មករា ព្រមទាំងសន្តិសុខខណ្ឌ៧មករា ប្រមាណជាង៣០នាក់ផ្សេងទៀតនិងបក្សពួក ទៅសាលាដំបូងរាជធានីភ្នំពេញ និងទារសំណងក្នុងម្នាក់២៥០០ដុល្លារ ពីបទប្រើហិង្សាលើប្រជាពលរដ្ឋបុរីកីឡា៕

-----------------------------------------------
ដោយ ក. ចាន់នីតា (ទំនាក់ទំនង៖ [email protected]) -ភ្នំពេញ ថ្ងៃទី ១៩ មិនា ២០១៤